మన భారత్, ఆదిలాబాద్
వీల్చైర్ కోసం గంటసేపు నిరీక్షణ
రోగుల ఇబ్బందులపై ఆందోళన – ఎమర్జెన్సీలో సీనియర్ వైద్యుల కొరతపై విమర్శలు
ఆదిలాబాద్ జిల్లా కేంద్రంలోని రిమ్స్ ఆసుపత్రిలో వికలాంగులు, వృద్ధులు, నడవలేని రోగులకు అవసరమైన ప్రాథమిక సదుపాయాలు లేక తీవ్ర ఇబ్బందులు ఎదురవుతున్నాయని రోగులు, వారి కుటుంబ సభ్యులు ఆవేదన వ్యక్తం చేస్తున్నారు. రాష్ట్ర స్థాయి వైద్య సేవలు అందించే ప్రధాన ఆసుపత్రిగా పేరుగాంచిన రిమ్స్లో వీల్చైర్ల కొరత కారణంగా రోగులు గంటల తరబడి వేచి చూడాల్సిన పరిస్థితి నెలకొనడం ఆందోళన కలిగిస్తోంది.
ఇటీవల దంత వైద్య సేవల కోసం ఆసుపత్రికి వచ్చిన ఓ వికలాంగుడు వీల్చైర్ అందుబాటులో లేక తీవ్ర ఇబ్బందులు ఎదుర్కొన్నాడు. ఉదయం సుమారు 10 గంటల సమయంలో ఆసుపత్రికి చేరుకున్న అతడు సంబంధిత అధికారులను సంప్రదించినప్పటికీ వెంటనే వీల్చైర్ లభించలేదు. సుమారు గంటకు పైగా నిరీక్షించిన అనంతరం ఒక వీల్చైర్ను అందించినా, అది కూడా సరిగా పనిచేయని స్థితిలో ఉండటంతో మరింత ఇబ్బందులు ఎదురయ్యాయని బాధితుడు తెలిపాడు.
ప్రతిరోజూ వేలాది మంది రోగులు రిమ్స్ ఆసుపత్రికి వస్తుంటారు. అయితే వికలాంగులు, వృద్ధులు, ప్రమాదాల్లో గాయపడినవారు, నడవలేని రోగుల కోసం సరిపడా వీల్చైర్లు లేకపోవడం పట్ల ప్రజలు అసంతృప్తి వ్యక్తం చేస్తున్నారు. ఆసుపత్రి విభాగాలు ఒకదానికొకటి దూరంగా ఉండటంతో వీరికి రాకపోకలు మరింత కష్టంగా మారుతున్నాయని చెబుతున్నారు.
అదేవిధంగా ఎమర్జెన్సీ విభాగంలో ఎక్కువగా జూనియర్ వైద్యులే విధులు నిర్వహిస్తున్నారని, అత్యవసర పరిస్థితుల్లో అనుభవజ్ఞులైన సీనియర్ వైద్యులు అందుబాటులో లేకపోవడం వల్ల రోగులకు తక్షణ నిర్ణయాలు, సరైన వైద్య మార్గదర్శకత్వం అందడంలో ఇబ్బందులు తలెత్తుతున్నాయని పలువురు అభిప్రాయపడుతున్నారు. అత్యవసర విభాగంలో సీనియర్ వైద్యుల సేవలు తప్పనిసరిగా ఉండాలని వారు కోరుతున్నారు.
వికలాంగులు, వృద్ధులు మరియు ప్రత్యేక అవసరాలు ఉన్న రోగుల కోసం అదనపు వీల్చైర్లను కొనుగోలు చేసి ప్రతి విభాగం వద్ద అందుబాటులో ఉంచాలని, పనిచేయని వీల్చైర్లు మరియు ఇతర పరికరాలను వెంటనే మరమ్మతు చేయాలని ప్రజలు డిమాండ్ చేస్తున్నారు. అలాగే రోగులకు మెరుగైన సేవలు అందించేందుకు అవసరమైన సిబ్బంది, వైద్యులను నియమించాలని విజ్ఞప్తి చేస్తున్నారు.
ప్రభుత్వం వైద్య రంగ అభివృద్ధికి భారీగా నిధులు వెచ్చిస్తున్న నేపథ్యంలో, రిమ్స్ వంటి ప్రధాన ఆసుపత్రుల్లో ప్రాథమిక సదుపాయాల కొరత ఉండకూడదని స్థానికులు అభిప్రాయపడుతున్నారు. సంబంధిత అధికారులు వెంటనే స్పందించి వికలాంగులు, వృద్ధులు, సాధారణ రోగులకు మెరుగైన సౌకర్యాలు కల్పించే దిశగా చర్యలు చేపట్టాలని కోరుతున్నారు.
గొంటి ముక్కుల ప్రసాద్ రిపోర్టర్ మన భారత్.
📲 మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్పై క్లిక్ చేయండి.
