మన భారత్, తలమడుగు
ఎస్సీ కాలనీలో డ్రైనేజీ సమస్య తీవ్రం.. కొత్త నాలీలు నిర్మించాలని ప్రజల విజ్ఞప్తి
వర్షాకాలం ముందు చర్యలు చేపట్టాలని డిమాండ్ – ఇళ్లలోకి చేరుతున్న వర్షపు నీటితో అవస్థలు
తలమడుగు మండల కేంద్రంలోని ఎస్సీ కాలనీ వాసులు వర్షాకాలం సమీపిస్తున్న నేపథ్యంలో తమ సమస్యలను వెంటనే పరిష్కరించాలని అధికారులను, ప్రజాప్రతినిధులను కోరుతున్నారు. కాలనీలో సరైన డ్రైనేజీ వ్యవస్థ లేకపోవడంతో ప్రతి ఏడాది వర్షాకాలంలో తీవ్ర ఇబ్బందులు ఎదుర్కొంటున్నామని స్థానికులు ఆవేదన వ్యక్తం చేస్తున్నారు.
కాలనీలోని పలు ప్రాంతాలు లోతట్టు ప్రాంతాల్లో ఉండటంతో వర్షం కురిసిన ప్రతిసారి రోడ్లపై ప్రవహించే నీరు నేరుగా ఇళ్లలోకి చేరుతోందని వారు తెలిపారు. దీంతో కుటుంబాలు తీవ్ర ఇబ్బందులు పడటమే కాకుండా ఇంటి సామగ్రి, గృహోపకరణాలు, నిత్యావసర వస్తువులు దెబ్బతింటున్నాయని పేర్కొన్నారు. చిన్నపిల్లలు, వృద్ధులు నీటిలోనే సంచరించాల్సి వస్తోందని ఆవేదన వ్యక్తం చేశారు.
అంతేకాకుండా వర్షపు నీటితో పాటు మురుగు నీరు కాలనీలో నిల్వ ఉండటంతో దోమలు, క్రిమికీటకాలు విపరీతంగా పెరుగుతున్నాయని తెలిపారు. గతంలో డెంగ్యూ, వైరల్ జ్వరాలు వంటి వ్యాధులు వ్యాపించిన సందర్భాలు ఉన్నాయని, ఈసారి కూడా అదే పరిస్థితి పునరావృతమవుతుందేమోనని ప్రజలు ఆందోళన చెందుతున్నారు.
వర్షాల సమయంలో విష సర్పాలు, ఇతర హానికర జీవులు ఇళ్లలోకి ప్రవేశించే ప్రమాదం ఎక్కువగా ఉంటోందని కాలనీ వాసులు పేర్కొన్నారు. ముఖ్యంగా రాత్రి వేళల్లో పిల్లలు, వృద్ధులు భయాందోళనలకు గురవుతున్నారని చెప్పారు.
ఈ సమస్యపై పలుమార్లు సంబంధిత అధికారులకు, స్థానిక ప్రజాప్రతినిధులకు ఫిర్యాదు చేసినప్పటికీ ఇప్పటి వరకు శాశ్వత పరిష్కారం చూపలేదని స్థానికులు ఆరోపిస్తున్నారు. ఎన్నికల సమయంలో మాత్రమే హామీలు ఇస్తున్న నాయకులు, సమస్యల పరిష్కారంలో మాత్రం నిర్లక్ష్యం వహిస్తున్నారని విమర్శించారు.
వర్షాకాలం పూర్తిస్థాయిలో ప్రారంభం కాకముందే కాలనీలో కొత్త నాలీలు నిర్మించి వర్షపు నీరు, మురుగు నీరు సాఫీగా వెళ్లేలా చర్యలు తీసుకోవాలని కాలనీ వాసులు డిమాండ్ చేస్తున్నారు. ప్రజల ఆరోగ్యం, భద్రత దృష్ట్యా అధికారులు ప్రత్యేక దృష్టి సారించి డ్రైనేజీ వ్యవస్థను మెరుగుపరచాలని కోరుతున్నారు.
స్థానికుల సమస్యలను గుర్తించి తక్షణ చర్యలు తీసుకుంటేనే ఎస్సీ కాలనీ వాసులకు ఉపశమనం లభిస్తుందని గ్రామ ప్రజలు అభిప్రాయపడుతున్నారు.
గొంటి ముక్కుల ప్రసాద్ రిపోర్టర్ మన భారత్.
📲 మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి.
