చెప్పినట్టే కడిగిన ముత్యంలా బయటికొచ్చా: జాగృతి కవితక్క

మన భారత్, తెలంగాణ:

ఢిల్లీ లిక్కర్ స్కామ్ కేసులో క్లీన్చిట్ లభించడంతో ఎమ్మెల్సీ K. Kavitha హర్షం వ్యక్తం చేశారు. న్యాయవ్యవస్థపై పెట్టుకున్న నమ్మకం నిలబడిందని ఆమె పేర్కొన్నారు. తనపై మోపిన ఆరోపణలు రాజకీయ కుట్రలో భాగమేనని తాను మొదటి నుంచీ చెబుతూ వచ్చానని స్పష్టం చేశారు.

కడిగిన ముత్యంలా వస్తానని ముందే చెప్పాను. అదే జరిగింది” అని ఆమె వ్యాఖ్యానించారు. ఈ సందర్భంగా కష్టకాలంలో తనకు అండగా నిలిచిన జాగృతి కార్యకర్తలు, కుటుంబ సభ్యులు—భర్త, అత్తామామలు, కొడుకులకు ప్రత్యేకంగా ధన్యవాదాలు తెలిపారు. ప్రజల విశ్వాసమే తనకు బలమని, సత్యం ఎప్పటికీ గెలుస్తుందనే నమ్మకం తనకు ఉందన్నారు.

ఢిల్లీ లిక్కర్ స్కామ్ కేసు దేశవ్యాప్తంగా రాజకీయంగా చర్చనీయాంశంగా మారిన నేపథ్యంలో, ఈ క్లీన్చిట్ నిర్ణయం తెలంగాణ రాజకీయాల్లోనూ ప్రాధాన్యం సంతరించుకుంది. ఈ కేసు ద్వారా తనను లక్ష్యంగా చేసుకుని రాజకీయంగా దెబ్బతీయాలనే ప్రయత్నం జరిగిందని ఆమె ఆరోపించారు. అయితే న్యాయస్థాన తీర్పుతో నిజం వెలుగులోకి వచ్చిందని, ప్రజాస్వామ్యంలో న్యాయవ్యవస్థపై విశ్వాసం మరింత బలపడిందని తెలిపారు.

తన రాజకీయ ప్రయాణం ప్రజాసేవకే అంకితం అని, భవిష్యత్తులో కూడా తెలంగాణ ప్రజల కోసం మరింత శక్తితో పనిచేస్తానని K. Kavitha స్పష్టం చేశారు. ఈ పరిణామం నేపథ్యంలో ఆమె అనుచరులు, పార్టీ కార్యకర్తలు ఆనందం వ్యక్తం చేస్తూ శుభాకాంక్షలు తెలియజేశారు.