e-paper
హోం ఆరోగ్యం క్రైం సినిమా క్రీడలు బిజినెస్
✖ Close Home Privacy Policy Disclaimer About Us Terms & Conditions
Sunday, November 22, 2026

ఫోన్‌లో మహిళకు వేధింపులు.. అసభ్య పదజాలంతో దూషణ

ఫోన్‌లో మహిళకు వేధింపులు.. అసభ్య పదజాలంతో దూషణ

వేర్వేరు నంబర్ల నుంచి కాల్స్ చేస్తూ లైంగిక వేధింపులు.. నిందితుడిని అరెస్ట్ చేసిన మావల పోలీసులు

మన భారత్, ఆదిలాబాద్:నవంబర్ 5,

మహిళను ఫోన్ కాల్స్ ద్వారా నిరంతరం వేధిస్తూ, అసభ్య పదజాలంతో దూషించిన వ్యక్తిని మావల పోలీసులు అరెస్ట్ చేశారు. మహిళ ఇష్టానికి వ్యతిరేకంగా పలుమార్లు ఫోన్ చేయడంతో పాటు, ఆమె ఫోన్ నంబర్‌ను బ్లాక్ చేసినప్పటికీ వేర్వేరు నంబర్ల నుంచి కాల్స్ చేస్తూ ఇబ్బందులకు గురిచేసినట్లు పోలీసుల విచారణలో వెల్లడైంది.

మావల పోలీస్ స్టేషన్ పరిధిలోని టీచర్స్ కాలనీకి చెందిన ఓ మహిళను మెరుగు మధుమోహన్ రెడ్డి గత సంవత్సరం నుంచి ఫోన్ కాల్స్ ద్వారా వేధిస్తున్నట్లు పోలీసులు తెలిపారు. ఆమె అనుమతి లేకుండా తరచూ ఫోన్ చేస్తూ అసభ్యకరమైన భాషలో మాట్లాడటమే కాకుండా లైంగిక వేధింపులకు పాల్పడినట్లు ఫిర్యాదులో పేర్కొన్నారు. పలుమార్లు ఫోన్ చేయవద్దని, తన వ్యక్తిగత జీవితానికి, కుటుంబానికి ఇబ్బందులు కలిగించవద్దని బాధితురాలు హెచ్చరించినప్పటికీ నిందితుడు తన ప్రవర్తన మార్చుకోకుండా వేధింపులు కొనసాగించినట్లు సమాచారం.

ఈ క్రమంలో బాధితురాలి భర్త నిందితుడిని ప్రశ్నించగా ఆయనను సైతం అసభ్య పదజాలంతో దూషించినట్లు పోలీసులు వెల్లడించారు. బాధితురాలు నిందితుడి ఫోన్ నంబర్‌ను బ్లాక్ చేసినప్పటికీ, ఇతర ఫోన్ నంబర్ల నుంచి కాల్స్ చేస్తూ వేధింపులకు పాల్పడ్డాడు. అంతేకాకుండా బాధితురాలిపై తప్పుడు ఆరోపణలు చేస్తూ ఆమె కుటుంబ గౌరవానికి భంగం కలిగించే ప్రయత్నం చేసినట్లు ఫిర్యాదులో పేర్కొన్నారు.

ఫిర్యాదుతో కేసు నమోదు.. నిందితుడి అరెస్ట్

నిందితుడి వేధింపులు భరించలేక బాధితురాలు మావల పోలీసులను ఆశ్రయించింది. ఆమె ఫిర్యాదు మేరకు మావల పోలీస్ స్టేషన్‌లో క్రైమ్ నంబర్ 739/2026, భారతీయ న్యాయ సంహిత (BNS) సెక్షన్లు 78, 296(b) కింద కేసు నమోదు చేసి దర్యాప్తు చేపట్టారు. అనంతరం నిందితుడు మెరుగు మధుమోహన్ రెడ్డిని అరెస్ట్ చేసినట్లు మావల పోలీసులు వెల్లడించారు.

మహిళల భద్రతకు ప్రాధాన్యం.. ఎస్‌హెచ్‌ఓ ప్రేమ్ కుమార్

ఈ సందర్భంగా మావల పోలీస్ స్టేషన్ ఎస్‌హెచ్‌ఓ బి.డి. ప్రేమ్ కుమార్ మాట్లాడుతూ మహిళలను ఫోన్ కాల్స్ ద్వారా వేధించడం, అసభ్య పదజాలంతో దూషించడం, వారి వ్యక్తిగత జీవితానికి భంగం కలిగించే చర్యలకు పాల్పడడం వంటి వాటిని ఎట్టి పరిస్థితుల్లోనూ సహించేది లేదని స్పష్టం చేశారు. మహిళల పట్ల అసభ్యంగా ప్రవర్తించే వారిపై చట్ట ప్రకారం కఠిన చర్యలు తీసుకుంటామని హెచ్చరించారు.

మహిళలు ఎలాంటి వేధింపులకు గురైనా భయపడకుండా వెంటనే సమీప పోలీస్ స్టేషన్‌ను సంప్రదించి ఫిర్యాదు చేయాలని సూచించారు. వేధింపులను మౌనంగా భరించకుండా పోలీసుల దృష్టికి తీసుకురావాలని, మహిళల భద్రతకు పోలీస్ శాఖ ప్రాధాన్యత ఇస్తుందని ఎస్‌హెచ్‌ఓ తెలిపారు.

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments

Bottom Navigation + Breaking Ticker
Breaking News LIVE