జాగ్రత్త.. నేడు పిడుగులతో భారీ వర్షాలు

మన భారత్, అమరావతి/హైదరాబాద్: 

తెలుగు రాష్ట్రాల్లో అకాల వర్షాలు కొనసాగుతున్న నేపథ్యంలో ప్రజలు అప్రమత్తంగా ఉండాలని వాతావరణ శాఖలు హెచ్చరిస్తున్నాయి. రేపు పలు జిల్లాల్లో పిడుగులతో కూడిన మోస్తరు నుంచి భారీ వర్షాలు కురిసే అవకాశం ఉందని అధికారులు వెల్లడించారు.

ఆంధ్రప్రదేశ్ రాష్ట్ర విపత్తు నిర్వహణ సంస్థ (APSDMA) తాజా అంచనాల ప్రకారం శ్రీకాకుళం, విజయనగరం, మన్యం, అల్లూరి సీతారామరాజు, పోలవరం పరిసరాలు, తూర్పు గోదావరి, కృష్ణా, ఎన్టీఆర్, గుంటూరు, బాపట్ల జిల్లాల్లో ఉరుములు, పిడుగులతో కూడిన వర్షాలు పడే అవకాశముంది. కొన్ని ప్రాంతాల్లో గాలులు కూడా బలంగా వీచే సూచనలు ఉన్నాయి.

ఇక తెలంగాణలో కూడా వర్షాల ప్రభావం కనిపించనుంది. హైదరాబాద్ వాతావరణ కేంద్రం పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, నల్గొండ, సూర్యాపేట జిల్లాలకు ఎల్లో అలర్ట్ జారీ చేసింది. ఈ ప్రాంతాల్లో ఉరుములు, మెరుపులతో కూడిన వర్షాలు పడే అవకాశముందని తెలిపింది.

ప్రజలకు సూచనలు:

* పిడుగులు పడే సమయంలో చెట్ల కింద నిలబడవద్దు

* ఓపెన్ ప్రదేశాల్లో ఉండకుండా సురక్షిత స్థలాల్లోకి వెళ్లాలి

* మొబైల్ ఫోన్లు, ఎలక్ట్రానిక్ పరికరాలను జాగ్రత్తగా వినియోగించాలి

* వ్యవసాయ పనులు చేస్తున్న రైతులు ముందస్తు జాగ్రత్తలు తీసుకోవాలి

వాతావరణ మార్పుల దృష్ట్యా అధికారులు పరిస్థితిని నిరంతరం పర్యవేక్షిస్తున్నట్లు తెలిపారు. అత్యవసర పరిస్థితుల్లో స్థానిక అధికారులను సంప్రదించాలని సూచించారు.