మన భారత్, తెలంగాణ:

జిల్లా జైలు మరోసారి రాష్ట్ర స్థాయి రాజకీయ నేత రిమాండ్‌కు వేదికైంది. గతంలో ద్వేషపూరిత ప్రసంగాల కేసులో జనవరి 8, 2013న ఎమ్మెల్యే అక్బరుద్దీన్ ఒవైసీ ఇక్కడికి తరలింపబడి సుమారు 40 రోజుల పాటు రిమాండ్‌లో ఉన్న సంగతి తెలిసిందే. అదే జైలుకు తాజాగా మాజీ ఎంపీ బాల్క సుమన్ను పోలీసులు తరలించడం రాజకీయ వర్గాల్లో చర్చనీయాంశమైంది.

క్యాతన్ పల్లి మున్సిపల్ ఛైర్మన్ ఎన్నికల సందర్భంగా చోటుచేసుకున్న ఉద్రిక్తతలు, గొడవల నేపథ్యంలో పోలీసులు బాల్క సుమన్‌ను అరెస్ట్ చేశారు. అనంతరం కోర్టు ఆదేశాల మేరకు ఆయనను జిల్లా జైలుకు రిమాండ్‌పై పంపించారు. దీంతో జిల్లా జైలు పరిసరాల్లో భద్రతను కట్టుదిట్టం చేశారు.

గతం గుర్తుచేసుకుంటున్న రాజకీయ వర్గాలు

2013లో అక్బరుద్దీన్ ఒవైసీ అరెస్టు రాష్ట్రవ్యాప్తంగా సంచలనం సృష్టించింది. ఆయనపై నమోదైన ద్వేషపూరిత ప్రసంగాల కేసులో కోర్టు రిమాండ్ విధించగా, దాదాపు 40 రోజుల పాటు ఇదే జైలులో ఉన్నారు. ఆ సమయంలో జిల్లా జైలు రాష్ట్ర రాజకీయాల్లో ప్రధాన చర్చగా మారింది.

ఇప్పుడూ బాల్క సుమన్ రిమాండ్ నేపథ్యంలో అదే పరిస్థితి నెలకొంది. “అక్బరుద్దీన్ దీర్ఘకాలం రిమాండ్‌లో ఉన్నారు.. సుమన్ ఎన్ని రోజులు ఉంటారు?” అనే ప్రశ్న రాజకీయ వర్గాల్లో వినిపిస్తోంది.

స్థానికంగా ఉత్కంఠ..

క్యాతన్పల్లి మున్సిపల్ రాజకీయాలు ఇటీవల ఉద్రిక్తంగా మారాయి. ఎన్నికల ఫలితాల తర్వాత ఏర్పడిన వివాదాలు, ఆరోపణలు, ప్రత్యారోపణల మధ్య పరిస్థితి ఉద్రిక్తంగా మారింది. ఈ నేపథ్యంలో పోలీసులు జోక్యం చేసుకుని బాల్క సుమన్‌ను అదుపులోకి తీసుకున్నారు.

జిల్లా జైలులో ప్రస్తుతం భద్రతా ఏర్పాట్లు పెంచినట్లు సమాచారం. అధికార వర్గాలు చట్టపరమైన చర్యలు కొనసాగుతున్నాయని వెల్లడించాయి. రాబోయే రోజుల్లో కోర్టు విచారణలపై అందరి దృష్టి నిలిచింది.

రాజకీయ విశ్లేషకుల అభిప్రాయం ప్రకారం, ఈ ఘటన జిల్లా స్థాయిలోనే కాక రాష్ట్ర స్థాయిలోనూ ప్రభావం చూపే అవకాశముంది.