మన భారత్ ‘విశ్వ గురువు’ కావాలి: ఆర్ఎస్ఎస్ చీఫ్

ప్రపంచ సంక్షేమం కోసం భారత్ ‘విశ్వ గురువు’ కావాలి: ఆర్ఎస్ఎస్ చీఫ్ మోహన్ భాగవత్

మన భారత్, హైదరాబాద్:
ప్రపంచ సంక్షేమం దిశగా భారత్ ‘విశ్వ గురువు’గా ఎదగాల్సిన అవసరం ఉందని ఆర్ఎస్ఎస్ చీఫ్ మోహన్ భాగవత్ పిలుపునిచ్చారు. హిందూ సమాజం ఐక్యంగా నిలిచి భారతదేశాన్ని విశ్వ గురువుగా మార్చేందుకు కృషి చేయాలని ఆయన సూచించారు.

హైదరాబాద్‌లో నిర్వహించిన విశ్వ సంఘ్ శిబిర్ ముగింపు కార్యక్రమంలో భాగవత్ మాట్లాడారు. “ప్రపంచం ఈ రోజు భారత్ వైపు ఆశతో చూస్తోంది. భారత్ విశ్వ గురువు కావడం మన ఆశయం మాత్రమే కాదు, ప్రపంచానికి ఉన్న అవసరం. ఆ స్థాయికి చేరుకోవాలంటే ఎంతో కష్టపడి పని చేయాలి” అని ఆయన అన్నారు.

భారతీయ సంస్కృతి, విలువలు, జీవన విధానం ప్రపంచానికి మార్గదర్శకంగా నిలవగల శక్తి కలిగి ఉన్నాయని ఆయన పేర్కొన్నారు. సమాజంలో ఐక్యత, క్రమశిక్షణ, సేవాభావం పెంపొందించినప్పుడే దేశం అంతర్జాతీయ స్థాయిలో నాయకత్వ పాత్ర పోషించగలదని చెప్పారు.

హిందూ సమాజ నిర్మాణం ద్వారా దేశ బలోపేతం సాధ్యమవుతుందని, ప్రతి ఒక్కరూ తమ తమ బాధ్యతలను గుర్తించి దేశ హితానికి పని చేయాలని మోహన్ భాగవత్ పిలుపునిచ్చారు. భారతదేశ అభివృద్ధి ప్రపంచ శాంతి, సంక్షేమానికి దోహదపడుతుందని ఆయన అభిప్రాయపడ్డారు.