మన భారత్, ఆదిలాబాద్
సీసీటీవీ ఆధారాలతో ద్విచక్ర వాహన చోరీ ముఠా గుట్టురట్టు.. 7 బైక్లు స్వాధీనం, నలుగురు అరెస్ట్
ఆదిలాబాద్, జూలై 18: జిల్లాలో వరుసగా చోటుచేసుకుంటున్న ద్విచక్ర వాహన చోరీలకు అడ్డుకట్ట వేస్తూ ఆదిలాబాద్ టూ టౌన్ పోలీసులు కీలక విజయాన్ని నమోదు చేశారు. సాంకేతిక ఆధారాలు, సీసీటీవీ ఫుటేజీలు, సమాచార వ్యవస్థ సహకారంతో వాహన చోరీ ముఠాను గుర్తించి కేసును ఛేదించినట్లు జిల్లా ఎస్పీ అఖిల్ మహాజన్, ఐపీఎస్ వెల్లడించారు. ఈ కేసులో మొత్తం ఏడుగురు నిందితులపై కేసు నమోదు చేయగా, నలుగురిని అరెస్ట్ చేసి వారి వద్ద నుంచి ఏడు దొంగిలించిన మోటార్ సైకిళ్లను స్వాధీనం చేసుకున్నారు. మరో ముగ్గురు నిందితులు పరారీలో ఉండగా, వారి కోసం ప్రత్యేక బృందాలతో గాలింపు కొనసాగుతోంది.
పోలీసులు తెలిపిన వివరాల ప్రకారం, గత ఏడాది డిసెంబర్ 23వ తేదీ రాత్రి జైనథ్ మండలానికి చెందిన ఫోటోగ్రాఫర్ కుంట రవితేజ తన పల్సర్ మోటార్ సైకిల్ను ఆదిలాబాద్ పట్టణంలోని రవితేజ హోటల్ సమీపంలో పార్క్ చేసి వెళ్లాడు. తిరిగి వచ్చేసరికి బైక్ కనిపించకపోవడంతో ఆదిలాబాద్ టూ టౌన్ పోలీస్ స్టేషన్లో ఫిర్యాదు చేశాడు. కేసు నమోదు చేసిన పోలీసులు అన్ని కోణాల్లో దర్యాప్తు చేపట్టి, సీసీటీవీ దృశ్యాలు, సాంకేతిక సమాచారం, ఇంటెలిజెన్స్ ఆధారాలను విశ్లేషించి నిందితులను గుర్తించారు.
దర్యాప్తులో భాగంగా కరణ్ షిండే, మేశ్రం సాయికిరణ్, పవార్ విక్రమ్, ఫర్దీన్ ఖాన్లను అదుపులోకి తీసుకుని విచారించగా, పలువురు కలిసి వాహన చోరీలకు పాల్పడినట్లు వెల్లడైంది. వారి వద్ద నుంచి ఏడు దొంగిలించిన మోటార్ సైకిళ్లను పోలీసులు స్వాధీనం చేసుకున్నారు. కేసులో అబ్దుల్ సాహిల్, అజర్ ఖాన్ అలియాస్ ఎమ్రోజ్ ఖాన్, పొల్లేకర్ గణేష్ పరారీలో ఉండగా, వారిని పట్టుకునేందుకు ప్రత్యేక చర్యలు కొనసాగుతున్నాయి.
ఈ సందర్భంగా జిల్లా ఎస్పీ అఖిల్ మహాజన్ మాట్లాడుతూ, ప్రజలు తమ వాహనాలను ఎల్లప్పుడూ సురక్షిత ప్రదేశాల్లోనే పార్క్ చేయాలని సూచించారు. ముఖ్యంగా సీసీటీవీ నిఘా ఉన్న ప్రాంతాలను ఎంపిక చేసుకోవాలని, ఇళ్లతో పాటు వ్యాపార సంస్థలు, కాలనీల్లో నాణ్యమైన సీసీటీవీ కెమెరాలు ఏర్పాటు చేసుకోవడం ద్వారా నేరాల నియంత్రణతో పాటు కేసుల ఛేదన కూడా వేగవంతమవుతుందని తెలిపారు. ఈ కేసు కూడా పూర్తిగా సీసీటీవీ ఆధారాల సహాయంతోనే ఛేదించగలిగామని పేర్కొన్నారు.
అనుమానాస్పద వ్యక్తులు కనిపించినా లేదా వాహన చోరీలకు సంబంధించిన సమాచారం తెలిసినా వెంటనే సమీప పోలీస్ స్టేషన్కు సమాచారం అందించాలని ప్రజలకు విజ్ఞప్తి చేశారు.
ఈ కార్యక్రమంలో ఆదిలాబాద్ డీఎస్పీ ఎల్. జీవన్ రెడ్డి, టూ టౌన్ సీఐ కె. నాగరాజు, సీసీఎస్ ఇన్స్పెక్టర్ చంద్రశేఖర్, ఎస్ఐలు ప్రణయ్, విష్ణు ప్రకాష్, పోలీసు సిబ్బంది పాల్గొన్నారు.
మీ గొంటి ముక్కుల ప్రసాద్ రిపోర్టర్ మన భారత్
ఆదిలాబాద్ జిల్లాలో పని చేయుటకు జిల్లా స్టాఫ్ రిపోర్టర్ తో పాటు నియోజకవర్గాలు, మండలాల వారీగా రిపోర్టర్స్ కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి..
