మన భారత్ , భక్తి:
కలియుగంలో భక్తులకు అత్యంత సులభమైన మరియు శక్తివంతమైన ఆధ్యాత్మిక సాధనగా కృష్ణనామ స్మరణను శాస్త్రాలు విశేషంగా ప్రస్తావిస్తున్నాయి. శ్రీకృష్ణుడు నామాన్ని జపించడం ద్వారా మనస్సులోని మలినాలు తొలగి, ఆత్మ శుద్ధి కలుగుతుందని పండితులు పేర్కొంటున్నారు.
‘కృష్ణ’ అనే నామ సంకీర్తనం కోటి సూర్యగ్రహణాలు, చంద్రగ్రహణ స్నానాలు చేసిన ఫలితంతో సమానమని పురాణాలు చెబుతున్నాయి. భక్తి భావంతో కృష్ణనామాన్ని స్మరించడం వల్ల పాపాలు నశించి, పుణ్యఫలాలు లభిస్తాయని విశ్వాసం. జీవితంలో ఎన్నో కష్టాలు ఎదురైనప్పటికీ, కృష్ణనామం పరమ ఔషధంలా పనిచేస్తుందని ఆధ్యాత్మిక వేత్తలు అభిప్రాయపడుతున్నారు.
పురాణ కథనాల ప్రకారం, నారదుడు బ్రహ్మదేవునిని కలియుగంలో ముక్తి సాధన మార్గం గురించి ప్రశ్నించగా, నామస్మరణే శ్రేష్ఠమైన మార్గమని సమాధానం లభించింది. సత్యయుగంలో ధ్యానం, త్రేతాయుగంలో యజ్ఞాలు, ద్వాపరయుగంలో పూజలు ద్వారా లభించే ఫలితాలు కలియుగంలో కేవలం నామ సంకీర్తన ద్వారానే పొందవచ్చని తెలిపారు.
ఈ నేపథ్యంలో ‘హరే రామ హరే రామ రామ రామ హరే హరే… హరే కృష్ణ హరే కృష్ణ కృష్ణ కృష్ణ హరే హరే’ అనే మహామంత్రం విశిష్ట స్థానం పొందింది. ఈ మంత్రంలోని ప్రతి పదం పరబ్రహ్మ స్వరూపాన్ని సూచిస్తుందని, భక్తికి, జ్ఞానానికి మార్గదర్శకమని విశ్లేషణలు చెబుతున్నాయి.
‘కృష్ణ’ అనే పదంలోని అక్షరాలకూ ప్రత్యేకమైన అర్థాలు ఉన్నాయని ఆధ్యాత్మిక గ్రంథాలు వివరిస్తున్నాయి. పాపాలను నశింపజేసే శక్తి కలిగిన నామంగా ఇది భావించబడుతుంది. భక్తులు నిత్యం కృష్ణనామాన్ని జపించడం ద్వారా జన్మ జన్మల పాపాలు తొలగి, భగవద్భక్తి పెరుగుతుందని విశ్వసిస్తున్నారు.
స్కంద పురాణం వంటి గ్రంథాలలో కూడా కృష్ణనామ మహిమను విశదీకరించారు. ఇతర నామాలను కోటి సార్లు జపించినా కలగని ఆనందం కృష్ణనామోచ్చరణతో కలుగుతుందని విశ్వాసం. అందుకే నారదుడు వంటి మహర్షులు ఎల్లప్పుడూ నామస్మరణలో లీనమై ఉంటారని చెబుతారు.
ద్వాపరయుగంలో అవతరించిన శ్రీకృష్ణుడు గీతామృతాన్ని అందించి, జీవులకు ధర్మ మార్గాన్ని చూపించాడు. భక్తుల దుఃఖాలను తొలగించే ‘భక్త దుఃఖ కర్షి’గా ఆయనను శాస్త్రాలు వర్ణిస్తున్నాయి.
కలియుగంలో మనుషులు సులభంగా ఆచరించగల సాధనగా కృష్ణనామ జపం నిలుస్తోంది. కష్టకాలంలో ధైర్యం, మనశ్శాంతి, ఆధ్యాత్మిక బలం కలిగించగల ఈ నామస్మరణ ప్రతి ఒక్కరి జీవితాన్ని ధన్యంగా మార్చగలదని భక్తులు విశ్వసిస్తున్నారు.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..
