స్పీడ్ బ్రేకర్లు ఏర్పాటు చేసి.. ప్రాణాలను కాపాడండి

సుంకిడి అంతర్రాష్ట్ర రహదారిపై వాహనాల అతివేగం..

ప్రమాదాలపై స్థానికుల ఆందోళన

స్కూల్ విద్యార్థులు, రైతులు, వారపు సంతకు వచ్చే ప్రజలకు తప్పని ప్రమాద భయం

తలమడుగు, ఆగస్టు 3 (మన భారత్): తలమడుగు మండల పరిధిలోని సుంకిడి గ్రామం మీదుగా వెళ్లే ప్రధాన అంతర్రాష్ట్ర రహదారిపై వాహనాల అతివేగం స్థానికులకు ఆందోళన కలిగిస్తోంది. సుంకిడి నుంచి నాదెండ్, కిన్వట్, ఆదిలాబాద్ తదితర ప్రాంతాలను కలుపుతూ ఉన్న ఈ ప్రధాన రహదారిపై నిత్యం వందలాది భారీ వాహనాలు, లారీలు, ఇతర వాహనాలు రాకపోకలు సాగిస్తుంటాయి.

రహదారిపై వాహనాల రద్దీ అధికంగా ఉండటంతో పాటు కొందరు డ్రైవర్లు అతివేగంగా వాహనాలను నడుపుతున్నారని స్థానికులు ఆవేదన వ్యక్తం చేస్తున్నారు. ముఖ్యంగా సుంకిడి ప్రధాన రహదారి వద్ద వేగ నియంత్రణకు అవసరమైన స్పీడ్ బ్రేకర్లు సక్రమంగా లేకపోవడంతో ప్రమాదాల ముప్పు మరింత పెరుగుతోందని గ్రామస్తులు చెబుతున్నారు.

స్కూల్ విద్యార్థులకు ప్రమాద భయం

సుంకిడి గ్రామంలోని పాఠశాలలకు వెళ్లే విద్యార్థులు, రహదారిని దాటే సమయంలో తీవ్ర ఇబ్బందులు ఎదుర్కొంటున్నారని స్థానికులు పేర్కొంటున్నారు. ఉదయం, సాయంత్రం పాఠశాల సమయాల్లో వాహనాల రాకపోకలు ఎక్కువగా ఉండటంతో విద్యార్థుల భద్రతపై తల్లిదండ్రులు ఆందోళన చెందుతున్నారు. భారీ వాహనాలు వేగంగా వెళ్లడం వల్ల ఎప్పుడు ఏ ప్రమాదం జరుగుతుందోనని భయపడాల్సిన పరిస్థితి ఉందని వారు అంటున్నారు.

వారపు సంతకు వచ్చే ప్రజలకు ఇబ్బందులు

ప్రతి ఆదివారం సుంకిడిలో వారపు సంత జరుగుతుండటంతో పరిసర గ్రామాల నుంచి పెద్ద సంఖ్యలో ప్రజలు వివిధ రకాల సామాగ్రి, నిత్యావసర వస్తువులు కొనుగోలు చేసేందుకు వస్తుంటారు. దీంతో సంత రోజుల్లో రహదారిపై రద్దీ మరింత పెరుగుతుంది. పాదచారులు, ద్విచక్ర వాహనదారులు, రైతులు రహదారి దాటే సమయంలో భారీ వాహనాల వేగం కారణంగా ప్రమాదకర పరిస్థితులు నెలకొంటున్నాయని స్థానికులు చెబుతున్నారు.

ఇప్పటికే ప్రమాదాలు జరిగినా..

గతంలోనూ ఈ ప్రాంతంలో రోడ్డు ప్రమాదాలు చోటుచేసుకున్నాయని గ్రామస్తులు గుర్తుచేస్తున్నారు. తరచూ వాహనాలు అతివేగంగా ప్రయాణిస్తుండటంతో భవిష్యత్తులో మరిన్ని ప్రమాదాలు జరిగే అవకాశం ఉందని ఆందోళన వ్యక్తం చేస్తున్నారు. ప్రమాదం జరిగిన తర్వాత చర్యలు తీసుకోవడం కంటే ముందుగానే నివారణ చర్యలు చేపట్టడం ఎంతో అవసరమని వారు కోరుతున్నారు. అధికారులు వెంటనే స్పందించాలి

సుంకిడి ప్రధాన అంతర్రాష్ట్ర రహదారిపై అవసరమైన ప్రాంతాల్లో ప్రమాణాలకు అనుగుణంగా స్పీడ్ బ్రేకర్లు ఏర్పాటు చేయడంతో పాటు ప్రమాద సూచిక బోర్డులు, వేగ నియంత్రణ సూచనలు ఏర్పాటు చేయాలని స్థానికులు కోరుతున్నారు. ముఖ్యంగా పాఠశాల పరిసరాలు, సంత జరిగే ప్రాంతం వద్ద వాహనాల వేగాన్ని నియంత్రించే చర్యలు తీసుకోవాలని విజ్ఞప్తి చేస్తున్నారు.

ప్రజాప్రతినిధులు, సంబంధిత రహదారి అధికారులు, పోలీసు శాఖ స్పందించి పరిస్థితిని పరిశీలించి వీలైనంత త్వరగా స్పీడ్ బ్రేకర్లు ఏర్పాటు చేయాలని గ్రామస్తులు కోరుతున్నారు. ప్రజల ప్రాణాలకు భద్రత కల్పించేందుకు అధికారులు తక్షణ చర్యలు చేపట్టి సుంకిడి రహదారిపై ప్రమాదాల నివారణకు శాశ్వత పరిష్కారం చూపాలని వారు విజ్ఞప్తి చేస్తున్నారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి ఆదిలాబాద్

జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.