ఆదిలాబాద్ ఎయిర్పోర్ట్ ప్రతిపాదనపై ప్రభుత్వం వెంటనే అధికారిక స్పష్టత ఇవ్వాలి: రైతుల డిమాండ్
ఆదిలాబాద్, జూలై 24: ఆదిలాబాద్లో ప్రతిపాదిత ఎయిర్పోర్ట్–ఎయిర్ఫోర్స్ ప్రాజెక్టు పేరుతో రైతులను పదేపదే అయోమయానికి గురిచేయడం సరికాదని రైతులు ఆవేదన వ్యక్తం చేశారు. ఎయిర్పోర్ట్ ప్రతిపాదనపై రాష్ట్ర ప్రభుత్వం, జిల్లా యంత్రాంగం వెంటనే అధికారిక స్పష్టత ఇవ్వాలని డిమాండ్ చేశారు.
గతంలో జూన్ 2న ఎయిర్పోర్ట్కు భూమిపూజ జరుగుతుందని ప్రచారం జరిగిందని, అనంతరం వారం రోజుల్లో నోటిఫికేషన్ విడుదల అవుతుందని వార్తలు రావడంతో సంబంధిత ప్రాంతాల రైతులు తీవ్ర ఆందోళనకు గురయ్యారని తెలిపారు. అయితే ఇప్పటివరకు ఎయిర్పోర్ట్ ప్రతిపాదనకు సంబంధించి రైతులతో ప్రభుత్వం అధికారికంగా ఎలాంటి చర్చలు జరపలేదని, భూసేకరణకు సంబంధించిన నోటీసులు కూడా జారీ చేయలేదని పేర్కొన్నారు.
మరోవైపు, సంబంధిత ప్రాంతాల్లో భూముల రిజిస్ట్రేషన్లు, అనుమతులు యథావిధిగా కొనసాగుతున్నాయని రైతులు తెలిపారు. అధికారిక ప్రక్రియపై స్పష్టత లేకుండానే ఎయిర్పోర్ట్ పేరుతో రాజకీయ ప్రకటనలు, ప్రచారాలు చేయడం వల్ల రైతులు, భూ యజమానులు, ప్రజలు తీవ్ర అయోమయానికి గురవుతున్నారని ఆవేదన వ్యక్తం చేశారు.
ఎయిర్పోర్ట్ ప్రతిపాదనపై నెలకొన్న అనిశ్చితి కారణంగా రైతులు తమ భూములు, ప్లాట్లను విక్రయించలేక ఆర్థికంగా ఇబ్బందులు ఎదుర్కొంటున్నారని తెలిపారు. భూములపై పెట్టుబడులు పెట్టిన వారు, విక్రయాలు చేయాలనుకునే వారు ప్రస్తుతం సందిగ్ధ పరిస్థితిలో ఉన్నారని అన్నారు. ప్రభుత్వం ఒకవైపు ఎయిర్పోర్ట్కు సంబంధించిన సర్వే పూర్తయిందని చెబుతుండగా, మరోవైపు సంబంధిత రైతులకు అధికారిక సమాచారం ఇవ్వకపోవడం పలు అనుమానాలకు తావిస్తోందని పేర్కొన్నారు.
ఎయిర్పోర్ట్ నిర్మాణానికి నిజంగా ప్రతిపాదన ఉందా? ఉంటే దాని పరిధి ఎంత? ఏ ప్రాంతాల్లో భూసేకరణ చేపడతారు? భూముల సర్వే ఎప్పుడు పూర్తయింది? రైతులకు ఎప్పుడు అధికారిక నోటీసులు ఇస్తారు? అనే అంశాలపై ప్రభుత్వం స్పష్టమైన వివరాలు వెల్లడించాలని రైతులు డిమాండ్ చేశారు.
రైతులను భయాందోళనలకు గురిచేసే విధంగా అస్పష్టమైన ప్రకటనలు చేయకుండా ప్రభుత్వం వాస్తవ పరిస్థితిని ప్రజలకు తెలియజేయాలని కోరారు. ఎయిర్పోర్ట్ ప్రతిపాదనపై రాష్ట్ర ప్రభుత్వం, ముఖ్యమంత్రి, జిల్లా కలెక్టర్, జిల్లా యంత్రాంగం వెంటనే స్పందించి అధికారిక ప్రకటన చేయాలని విజ్ఞప్తి చేశారు.
ఈ అంశంపై జిల్లా కలెక్టర్ను పలుమార్లు కోరినప్పటికీ ఇప్పటివరకు స్పష్టమైన స్పందన లభించలేదని రైతులు తెలిపారు. రైతుల సమస్యలను పరిగణనలోకి తీసుకుని ప్రభుత్వం తక్షణమే సమావేశం ఏర్పాటు చేసి, సంబంధిత రైతులతో చర్చించాలని డిమాండ్ చేశారు.
ఈ కార్యక్రమంలో సి. నర్సింగరావు, కస్తాల అరుణ్, ముదిగొండ గంగాధర్, ముదిగొండ రమేష్, గొర్ల రాజు, జక్కుల దత్తు, రకుల్ జోషి, సిలారి పోశెట్టి, ముదిగొండి రమేష్ తదితరులు పాల్గొన్నారు.
మీ గొంటి ముక్కుల ప్రసాద్ రిపోర్టర్ మన భారత్ ఆదిలాబాద్ జిల్లా ఆర్సీ ఇన్చార్జి
జిల్లా స్టాప్ రిపోర్టర్ తో పాటు నియోజకవర్గాలు మండలాల వారీగా రిపోర్టర్స్ కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
