రాష్ట్రవ్యాప్తంగా మహా ధర్నాలకు పిలుపు

మన భారత్, తెలంగాణ:

తెలంగాణ రాష్ట్ర రోడ్డు రవాణా సంస్థ (ఆర్టీసీ) కార్మికుల సమ్మె మరింత ఉధృతం కానుంది. ఈ నేపథ్యంలో రేపటి సమ్మె కార్యాచరణను ఆర్టీసీ జాయింట్ యాక్షన్ కమిటీ (జేఏసీ) అధికారికంగా ప్రకటించింది. రాష్ట్రవ్యాప్తంగా అన్ని ఆర్టీసీ డిపోల ఎదుట ఉదయం 5 గంటల నుంచే మహా ధర్నాలు నిర్వహించాలని జేఏసీ పిలుపునిచ్చింది.

సమ్మె మొదటి రోజున కార్మికులు పెద్ద ఎత్తున పాల్గొని విజయవంతం చేసినందుకు జేఏసీ నాయకత్వం ధన్యవాదాలు తెలిపింది. కార్మికుల ఐక్యతే తమ బలం అని పేర్కొంటూ, సమ్మెను మరింత బలంగా కొనసాగించాల్సిన అవసరం ఉందని నాయకులు అన్నారు.

ప్రభుత్వం, ఆర్టీసీ యాజమాన్యం చర్చల పేరుతో కార్మికులను, ప్రజలను తప్పుదారి పట్టిస్తున్నాయని జేఏసీ ఆరోపించింది. సమస్యల పరిష్కారం కోసం ప్రభుత్వం ఏర్పాటు చేసిన కమిటీ కూడా పరిష్కారం చూపలేమని చేతులెత్తేసిందని పేర్కొంది. దీంతో కార్మికుల్లో ఆగ్రహం మరింత పెరిగిందని తెలిపారు.

ఈ సందర్భంగా జేఏసీ పలు కీలక డిమాండ్లను ముందుకు తెచ్చింది. ఆర్టీసీ ఉద్యోగులను ప్రభుత్వంలో విలీనం చేయాలని, 2021 వేతన సవరణను కనీసం 30 శాతం తగ్గకుండా అమలు చేయాలని డిమాండ్ చేసింది. అలాగే హైదరాబాద్ నగరంలో ప్రైవేట్ ఎలక్ట్రిక్ బస్సులను రద్దు చేయాలని, ఉద్యోగులను ఇతర జోన్లకు బదిలీ చేసే ఉత్తర్వులను వెంటనే వెనక్కి తీసుకోవాలని కోరింది.

అదనంగా కార్మిక సంఘాలను పునరుద్ధరించి, గుర్తింపు సంఘం ఎన్నికలను తక్షణమే నిర్వహించాలని జేఏసీ స్పష్టం చేసింది. సమస్యలు పరిష్కారమయ్యే వరకు సమ్మెను విరమించబోమని, ఎంతటి ఒత్తిడి వచ్చినా వెనక్కి తగ్గబోమని ప్రభుత్వాన్ని జేఏసీ హెచ్చరించింది.

ప్రస్తుతం రాష్ట్రవ్యాప్తంగా ఆర్టీసీ సేవలు అంతరాయం కలగడంతో ప్రజలు ఇబ్బందులు ఎదుర్కొంటున్నారు. అయితే కార్మికుల న్యాయమైన డిమాండ్లను ప్రభుత్వం వెంటనే పరిష్కరించాలని జేఏసీ పిలుపునిచ్చింది.