మన భారత్, హైదరాబాద్:
తెలంగాణ జాగృతి అధ్యక్షురాలు కల్వకుంట్ల కవిత బోథ్ మాజీ ఎమ్మెల్యే రాథోడ్ బాపురావును బంజారాహిల్స్ లో జాగృతి కండువా కప్పి పార్టీలోకి ఆదివారం ఆహ్వానించారు. ఈ సందర్భంగా వారికి కీలక బాధ్యతలు అప్పగించారు. ఆయనను ఆదిలాబాద్ జిల్లా లోని బోథ్ నియోజకవర్గ ఇంచార్జిగా నియమించినట్లు పార్టీ వర్గాలు వెల్లడించాయి. ఈ నియామకం స్థానిక రాజకీయాల్లో ప్రాధాన్యతను సంతరించుకుంది.
రాథోడ్ బాపురావు రాజకీయ అనుభవం, ప్రజలతో ఉన్న అనుబంధం దృష్ట్యా ఈ బాధ్యతలు అప్పగించినట్లు నాయకులు తెలిపారు. జిల్లాలో పార్టీ కార్యకలాపాలను బలోపేతం చేయడం, గ్రామీణ స్థాయిలో సంస్థ విస్తరణకు కృషి చేయాలని ఆయనకు సూచించారు.
ఈ సందర్భంగా రాథోడ్ బాపురావు మాట్లాడుతూ, తనపై నమ్మకం ఉంచి బాధ్యతలు అప్పగించినందుకు నాయకత్వానికి కృతజ్ఞతలు తెలిపారు. ఆదిలాబాద్ జిల్లా, బోథ్ ప్రాంతాల్లో జాగృతి కార్యక్రమాలను విస్తరించి, ప్రజల సమస్యల పరిష్కారానికి కృషి చేస్తానని తెలిపారు.
జిల్లాలో యువత, మహిళలను సంస్థలో భాగస్వామ్యం చేయడం ద్వారా సామాజిక కార్యక్రమాలను మరింత బలోపేతం చేయాలని లక్ష్యంగా పెట్టుకున్నట్లు పేర్కొన్నారు. గ్రామీణ అభివృద్ధి, సామాజిక చైతన్యం పెంపొందించడంలో జాగృతి కీలక పాత్ర పోషించనుందని ఆయన విశ్వాసం వ్యక్తం చేశారు.
ఈ నియామకంపై స్థానిక నాయకులు, కార్యకర్తలు హర్షం వ్యక్తం చేస్తూ రాథోడ్ బాపురావు కు శుభాకాంక్షలు తెలిపారు.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..
