టీ టైమ్ లో ఆరోగ్యానికి మేలు చేసే స్నాక్స్

మన భారత్ , ఆరోగ్యం: 

మన రోజువారీ జీవితంలో టీకి ప్రత్యేక స్థానం ఉంది. ఉదయం లేవగానే లేదా సాయంత్రం సమయంలో చాలామంది టీతో పాటు బిస్కెట్లు, రస్కులు, ఫ్రైడ్ స్నాక్స్ వంటి పదార్థాలను తింటుంటారు. అయితే ఈ అలవాటు ఆరోగ్యానికి అంత మంచిది కాదని వైద్యులు హెచ్చరిస్తున్నారు.

బిస్కెట్లు, రస్కులు, ఎక్కువగా వేయించిన స్నాక్స్‌లలో చక్కెర మరియు కార్బోహైడ్రేట్లు అధికంగా ఉంటాయి. వీటిని తరచూ టీతో కలిపి తీసుకోవడం వల్ల రక్తంలో చక్కెర స్థాయి పెరిగే ప్రమాదం ఉందని ఆరోగ్య నిపుణులు చెబుతున్నారు. దీని వల్ల బరువు పెరగడం, డయాబెటిస్ వంటి మెటబాలిక్ సమస్యలు వచ్చే అవకాశం ఉంటుంది.

అందువల్ల టీ తాగేటప్పుడు ఆరోగ్యానికి మేలు చేసే స్నాక్స్‌ను ఎంచుకోవడం మంచిదని వైద్యులు సూచిస్తున్నారు. వేయించిన శనగలు, పల్లీలు, నట్స్, డ్రైఫ్రూట్స్, మఖానా వంటి ఫైబర్ మరియు ప్రొటీన్ అధికంగా ఉండే ఆహారాలు తీసుకోవడం ఆరోగ్యానికి మంచిదని తెలిపారు. ఇవి శరీరానికి అవసరమైన శక్తిని అందించడమే కాకుండా ఎక్కువసేపు తృప్తిని కలిగిస్తాయి.

టీ తాగిన తర్వాత లేదా ముందుగా ఫలాలు తీసుకోవడం కూడా ఆరోగ్యానికి మంచిదని నిపుణులు చెబుతున్నారు. అలాగే స్ప్రౌట్స్, పనీర్ క్యూబ్స్ వంటి ప్రొటీన్ రిచ్ ఆహారాలు తీసుకుంటే శరీరానికి అవసరమైన పోషకాలు అందుతాయి.

ప్రస్తుతం జీవనశైలిలో మార్పులతో అనేక ఆరోగ్య సమస్యలు పెరుగుతున్న నేపథ్యంలో ఆహారపు అలవాట్లపై ప్రత్యేక శ్రద్ధ అవసరమని వైద్యులు సూచిస్తున్నారు. టీతో పాటు సరైన స్నాక్స్ తీసుకోవడం ద్వారా ఆరోగ్యాన్ని కాపాడుకోవచ్చని వారు చెబుతున్నారు.