600 మంది పోలీసులతో భద్రతా ఏర్పాట్లు..

గణేష్ నిమజ్జనానికి పటిష్ట పోలీస్ బందోబస్తు

600 మంది పోలీసులతో భద్రతా ఏర్పాట్లు.. 600 సీసీటీవీలు, డ్రోన్‌తో నిరంతర నిఘా

మన భారత్, సెప్టెంబర్ 25, ఆదిలాబాద్: ఆదిలాబాద్ పట్టణంలో గణేష్ నిమజ్జనోత్సవాలు ప్రశాంత వాతావరణంలో జరిగేలా జిల్లా పోలీసు యంత్రాంగం పటిష్ట భద్రతా ఏర్పాట్లు చేసింది. నిమజ్జన కార్యక్రమాల సందర్భంగా ఎలాంటి అవాంఛనీయ ఘటనలు చోటుచేసుకోకుండా 600 మంది పోలీసు సిబ్బందితో విస్తృత బందోబస్తు ఏర్పాటు చేసినట్లు జిల్లా ఎస్పీ అఖిల్ మహాజన్ ఐపీఎస్ తెలిపారు.

శుక్రవారం ఉదయం కమాండ్ కంట్రోల్ సెంటర్‌ను సందర్శించిన ఎస్పీ అఖిల్ మహాజన్ సీసీటీవీ కెమెరాల ద్వారా పట్టణంలోని పరిస్థితులను పరిశీలించారు. నిమజ్జన మార్గాలు, ప్రధాన కూడళ్లు, జనసమ్మర్థ ప్రాంతాలు, నిమజ్జన ప్రదేశాల్లో చేపట్టిన భద్రతా ఏర్పాట్లను పర్యవేక్షించారు.

13 క్లస్టర్లు.. 13 సెక్టార్లు

నిమజ్జన బందోబస్తు కోసం ఆదిలాబాద్ పట్టణాన్ని 13 క్లస్టర్లు, 13 సెక్టార్లుగా విభజించారు. మొత్తం 23 పికెట్లు ఏర్పాటు చేసి అదనపు భద్రతా చర్యలు చేపట్టారు. రూఫ్‌టాప్ బందోబస్తుతో పాటు హైవే పెట్రోలింగ్, రెండు స్ట్రైకింగ్ ఫోర్స్‌లను అందుబాటులో ఉంచారు. మఫ్టీ పోలీసు బృందాలు, స్పెషల్ బ్రాంచ్ సిబ్బందితో ప్రత్యేక నిఘా కొనసాగిస్తున్నట్లు ఎస్పీ తెలిపారు.

పట్టణంలోని కీలక ప్రాంతాల్లో ఏర్పాటు చేసిన 600 సీసీటీవీ కెమెరాలతో పాటు డ్రోన్ కెమెరా ద్వారా పరిస్థితులను నిరంతరం పర్యవేక్షిస్తున్నారు. పెన్గంగా, చాందటి నిమజ్జన ప్రదేశాల వద్ద ప్రత్యేక పోలీస్ బందోబస్తు ఏర్పాటు చేశారు.

ప్రజలతో ఓపికగా వ్యవహరించాలి

బందోబస్తులో విధులు నిర్వహించే పోలీసు సిబ్బంది ప్రజలతో ఓపికగా, ప్రశాంతంగా వ్యవహరించాలని ఎస్పీ అఖిల్ మహాజన్ సూచించారు. నిమజ్జనోత్సవాల సందర్భంగా విధుల్లో ఉన్న సిబ్బంది నిరంతరం అప్రమత్తంగా ఉండాలని, భక్తులకు అవసరమైన సహకారం అందించాలని ఆదేశించారు.

నిమజ్జన కార్యక్రమాల్లో డీజేలు, లేజర్ లైట్లు, పేపర్ సెల్ యంత్రాలకు అనుమతి లేదని ఎస్పీ స్పష్టం చేశారు. నిబంధనలు పాటిస్తూ ఉత్సవాలను ప్రశాంతంగా నిర్వహించుకోవాలని ప్రజలకు సూచించారు.

పిల్లల భద్రతపై ప్రత్యేక శ్రద్ధ

గణేష్ నిమజ్జనానికి వచ్చే ప్రజలు పోలీసులకు సహకరించాలని ఎస్పీ కోరారు. జనసమ్మర్థం ఎక్కువగా ఉండే ప్రాంతాల్లో పిల్లలను ప్రత్యేకంగా జాగ్రత్తగా చూసుకోవాలని సూచించారు. నిమజ్జన కార్యక్రమాలను ఎలాంటి అవాంఛనీయ ఘటనలకు తావులేకుండా ప్రశాంతంగా పూర్తి చేసేందుకు ప్రజలు, నిర్వాహకులు పోలీసు శాఖకు సహకరించాలని విజ్ఞప్తి చేశారు.

ఉన్నతాధికారుల పర్యవేక్షణ

నిమజ్జన బందోబస్తు ఏర్పాట్లలో భాగంగా అదనపు ఎస్పీలు పి. మౌనిక ఐపీఎస్, బి. సురేందర్ రావు, ఉట్నూర్ ఏఎస్పీ రుత్విక్ సాయి కొట్టే ఐపీఎస్, డీఎస్పీలు ఎల్. జీవన్ రెడ్డి, ఎం. వెంకట నర్సయ్య, సీఐలు, ఎస్సైలు, ఇతర పోలీసు సిబ్బంది పాల్గొన్నారు. నిమజ్జనోత్సవాలు పూర్తయ్యే వరకు పోలీసు యంత్రాంగం నిరంతరం అప్రమత్తంగా ఉండేలా అధికారులు చర్యలు చేపట్టారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి

ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.