మరో ఇద్దరు పసికందుల మృతి.. విషాదంలో కుటుంబాలు
ఆసిఫాబాద్ లింగాపూర్, ఇంద్రవెల్లి దుబ్బగూడకు చెందిన శిశువులూ మృతి
మన భారత్, సెప్టెంబర్ 23, ఆదిలాబాద్: ఆదిలాబాద్ రిమ్స్ ఆస్పత్రిలోని ప్రత్యేక నవజాత శిశువుల సంరక్షణ విభాగం (ఎస్ఎన్సీయూ)లో జరిగిన అగ్ని ప్రమాదం తీవ్ర విషాదాన్ని మిగిల్చింది. ప్రమాదం అనంతరం చికిత్స పొందుతున్న మరో ఇద్దరు పసికందులు మృతి చెందినట్లు తాజా సమాచారం. దీంతో ఈ ప్రమాదంలో మృతి చెందిన నవజాత శిశువుల సంఖ్య ఐదుకు చేరినట్లు సమాచారం.
సోమవారం అర్ధరాత్రి రిమ్స్ ఎస్ఎన్సీయూ వార్డులో ఒక్కసారిగా మంటలు చెలరేగడంతో దట్టమైన పొగ వ్యాపించింది. ప్రాథమిక సమాచారం ప్రకారం ఎయిర్ కండిషనింగ్ యూనిట్లో విద్యుత్ షార్ట్సర్క్యూట్ కారణంగా ప్రమాదం జరిగినట్లు అధికారులు భావిస్తున్నారు. ఘటన సమయంలో వార్డులో చికిత్స పొందుతున్న పలువురు నవజాత శిశువులను సిబ్బంది, అగ్నిమాపక సిబ్బంది, పోలీసులు, బంధువులు అప్రమత్తంగా బయటకు తరలించారు.
ప్రమాదంలో అస్వస్థతకు గురైన కొందరు శిశువులను మెరుగైన వైద్యం కోసం ఆదిలాబాద్తో పాటు నిర్మల్, నిజామాబాద్ తదితర ప్రాంతాల్లోని ఆస్పత్రులకు తరలించారు. చికిత్స పొందుతున్న వారిలో మరో ఇద్దరు పసికందులు మృతి చెందినట్లు తాజా సమాచారం వెలువడింది. దీంతో ఇప్పటికే కుటుంబాల్లో విషాదం నెలకొనగా, మృతుల సంఖ్య పెరగడం మరింత ఆందోళనకు గురిచేసింది.
ఆసిఫాబాద్ జిల్లా కుటుంబంలో విషాదం
ఆసిఫాబాద్ జిల్లా లింగాపూర్కు చెందిన దుర్గబాయి బిడ్డ కూడా రిమ్స్లో మృతి చెందినట్లు కుటుంబ సభ్యుల ద్వారా సమాచారం అందింది. తమ బిడ్డను కాపాడుతారని ఆశించిన కుటుంబానికి విషాదం మిగిలింది. చిన్నారి మృతితో కుటుంబ సభ్యులు కన్నీరుమున్నీరయ్యారు.
నిర్మల్కు తరలిస్తుండగా మరో శిశువు మృతి
ఇంద్రవెల్లి మండలం దుబ్బగూడకు చెందిన నాగుబాయి బిడ్డను మెరుగైన వైద్యం కోసం నిర్మల్కు తరలిస్తుండగా మృతి చెందినట్లు సమాచారం. ప్రమాదం అనంతరం శిశువు పరిస్థితి విషమించడంతో మెరుగైన వైద్యం కోసం తరలించే ప్రయత్నం చేసినప్పటికీ ప్రాణాలు దక్కలేదని కుటుంబ సభ్యులు ఆవేదన వ్యక్తం చేశారు.
రిమ్స్ ఘటనపై అధికారులు ఇప్పటికే విచారణకు ఆదేశించారు. ప్రమాదానికి అసలు కారణం, ఆస్పత్రిలోని విద్యుత్, అగ్నిమాపక భద్రతా ఏర్పాట్లు, నిర్వహణలో ఏమైనా లోపాలు ఉన్నాయా అనే అంశాలపై సమగ్రంగా పరిశీలిస్తున్నట్లు అధికారులు తెలిపారు. ప్రమాదంలో మిగిలిన చిన్నారుల ఆరోగ్య పరిస్థితిని వైద్యులు నిరంతరం పర్యవేక్షిస్తున్నారు.
రిమ్స్ వంటి ప్రభుత్వ ఆస్పత్రుల్లో అత్యంత సున్నితమైన ఎస్ఎన్సీయూ విభాగాల్లో భద్రతా ప్రమాణాలను మరింత కట్టుదిట్టం చేయాల్సిన అవసరం ఉందనే అభిప్రాయాలు వ్యక్తమవుతున్నాయి. ఈ ఘటనపై పూర్తిస్థాయి విచారణ అనంతరం వాస్తవ కారణాలు, బాధ్యతలకు సంబంధించిన వివరాలు వెల్లడయ్యే అవకాశం ఉంది.
మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి
జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
