ఫ్రెండ్షిప్ డే వేళ విషాదం.. బీచ్‌లో ఇద్దరు మిత్రులు గల్లంతు

మన భారత్ | విశాఖపట్నం

ఫ్రెండ్షిప్ డే సందర్భంగా విశాఖపట్నంలో విషాదకర ఘటన చోటుచేసుకుంది. స్నేహితులతో కలిసి బీచ్‌కు వెళ్లిన ఇద్దరు యువకులు సముద్ర అలల్లో గల్లంతయ్యారు. ఈ ఘటన స్థానికంగా తీవ్ర విషాదాన్ని నింపింది.

పోలీసులు తెలిపిన వివరాల ప్రకారం, పెదజాలరిపేటకు చెందిన చురకాల నీతు (19), రాము మరో ఐదుగురు స్నేహితులతో కలిసి పాత గంగవరం బీచ్‌కు వెళ్లారు. అక్కడ అందరూ కలిసి సముద్ర తీరంలో నిలబడి ఫొటోలు దిగుతున్న సమయంలో ఒక్కసారిగా భారీ అలలు ఎగసిపడి వారిని చుట్టుముట్టాయి. ఈ క్రమంలో నీతు సముద్రంలో కొట్టుకుపోగా, ఆమెను కాపాడేందుకు ప్రయత్నించిన రాము కూడా అలల్లో చిక్కుకుని గల్లంతయ్యారు.

సమాచారం అందుకున్న వెంటనే పోలీసులు, తీర ప్రాంత భద్రతా సిబ్బంది, మత్స్యకారులు సంఘటనా స్థలానికి చేరుకుని గాలింపు చర్యలు చేపట్టారు. సముద్రంలో గల్లంతైన ఇద్దరి కోసం విస్తృతంగా శోధన కొనసాగిస్తున్నట్లు అధికారులు తెలిపారు. ప్రమాదం జరిగిన విషయం తెలిసిన వెంటనే బాధితుల కుటుంబ సభ్యులు బీచ్‌కు చేరుకుని కన్నీరుమున్నీరయ్యారు.

వర్షాకాలంలో సముద్రంలో అలలు ఉధృతంగా ఉండే అవకాశం ఉన్నందున పర్యాటకులు, యువత తీర ప్రాంతాల్లో అత్యంత అప్రమత్తంగా ఉండాలని అధికారులు సూచించారు. హెచ్చరిక బోర్డులు, భద్రతా సూచనలను తప్పనిసరిగా పాటించాలని, ప్రమాదకర ప్రాంతాల్లోకి వెళ్లవద్దని విజ్ఞప్తి చేశారు. ముఖ్యంగా ఫొటోలు, సెల్ఫీలు తీసుకునే సమయంలో సముద్రానికి అత్యంత సమీపంలో నిలబడకుండా జాగ్రత్తలు తీసుకోవాలని సూచించారు.

ఈ ఘటనతో ఫ్రెండ్షిప్ డే రోజున ఆనందంగా గడపాలని వెళ్లిన స్నేహితుల బృందంలో తీవ్ర విషాదం నెలకొంది. గల్లంతైన ఇద్దరు యువకుల కోసం గాలింపు చర్యలు కొనసాగుతున్నాయి.

మీ విశాల్ కుమార్, మన భారత్, ఎడిటర్.