మన భారత్, హైదరాబాద్
నేరెళ్ల బాధిత కుటుంబాలకు రూ. కోటి నష్టపరిహారం, ప్రభుత్వ ఉద్యోగం ఇవ్వాలి: బీఎస్పీ రాష్ట్ర అధ్యక్షుడు ఇబ్రాం శేఖర్
హైదరాబాద్, జూలై 11 (మన భారత్): నేరెళ్ల దళితులపై జరిగిన దాడి ఘటనకు దాదాపు పదేళ్లు పూర్తవుతున్నా బాధితులకు పూర్తిస్థాయి న్యాయం జరగకపోవడం బాధాకరమని బహుజన్ సమాజ్ పార్టీ (బీఎస్పీ) తెలంగాణ రాష్ట్ర అధ్యక్షుడు ఇబ్రాం శేఖర్ పేర్కొన్నారు. నేరెళ్ల ఘటనలో బాధితుడైన గంధం గోపాల్ మృతి పట్ల ఆయన తీవ్ర సంతాపం వ్యక్తం చేస్తూ, బాధిత కుటుంబాలకు ప్రభుత్వం వెంటనే న్యాయం చేయాలని డిమాండ్ చేశారు.
శనివారం విడుదల చేసిన ప్రకటనలో ఆయన మాట్లాడుతూ, మృతుడు గంధం గోపాల్ కుటుంబానికి రూ.1 కోటి నష్టపరిహారం ప్రకటించడంతో పాటు కుటుంబంలోని ఒకరికి ప్రభుత్వ ఉద్యోగం కల్పించాలని ప్రభుత్వాన్ని కోరారు. అలాగే నేరెళ్ల ఘటనలో బాధితులైన మిగిలిన కుటుంబాలకు కూడా ఒక్కో కుటుంబానికి రూ.1 కోటి చొప్పున నష్టపరిహారం, అర్హులైన సభ్యులకు ప్రభుత్వ ఉద్యోగాలు ఇవ్వాలని డిమాండ్ చేశారు.
ఇబ్రాం శేఖర్ మాట్లాడుతూ, 2017 జూలైలో ఇసుక అక్రమ రవాణాను అడ్డుకుంటున్నారనే కారణంతో అప్పటి పాలకులు, పోలీసులు, కాంట్రాక్టర్లు కుమ్మక్కై ఎనిమిది మంది దళితులపై దాడులకు పాల్పడ్డారని ఆరోపించారు. ఆ ఘటనలో బాధితులైన వారు ఇప్పటికీ శారీరక, మానసిక ఇబ్బందులు ఎదుర్కొంటూ సాధారణ జీవితం గడపలేని పరిస్థితిలో ఉన్నారని ఆవేదన వ్యక్తం చేశారు.
గత బీఆర్ఎస్ ప్రభుత్వం, ప్రస్తుత కాంగ్రెస్ ప్రభుత్వాలపై విమర్శలు చేసిన ఆయన, నేరెళ్ల ఘటనలో నిందితులపై ఇప్పటికీ తగిన చర్యలు తీసుకోకపోవడం ఆందోళనకరమన్నారు. ఎన్నికల సమయంలో నేరెళ్ల బాధితులకు న్యాయం చేస్తామని, నిందితులకు శిక్ష పడేలా చర్యలు తీసుకుంటామని ముఖ్యమంత్రి రేవంత్ రెడ్డి హామీ ఇచ్చారని గుర్తు చేశారు. అయితే ఇప్పటి వరకు కేసులో గణనీయమైన పురోగతి కనిపించకపోవడం నిరాశ కలిగిస్తోందని అన్నారు.
అలాగే మాజీ ముఖ్యమంత్రి కేసీఆర్ కుమార్తె కల్వకుంట్ల కవిత గతంలో చేసిన వ్యాఖ్యలను ప్రస్తావిస్తూ, నేరెళ్ల ఘటనపై సమగ్ర విచారణ జరిపి బాధ్యులపై చట్టపరమైన చర్యలు తీసుకోవాలని ప్రభుత్వాన్ని కోరారు.
నేరెళ్ల బాధితులకు పూర్తి స్థాయిలో న్యాయం జరిగే వరకు బీఎస్పీ తన పోరాటాన్ని కొనసాగిస్తుందని ఇబ్రాం శేఖర్ స్పష్టం చేశారు. బాధిత కుటుంబాల ఆర్థిక, సామాజిక పునరావాసానికి ప్రభుత్వం ప్రత్యేక చర్యలు తీసుకోవాలని ఆయన విజ్ఞప్తి చేశారు.
మీ గొంటి ముక్కుల ప్రసాద్ రిపోర్టర్ మన భారత్.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..
