మన భారత్, ఆదిలాబాద్
ప్రేమ వివాహం పేరుతో రూ.30 వేల మోసం..
మంత్రశక్తులతో యువతిని తిరిగి తీసుకొస్తానని నమ్మబలికి డబ్బు వసూలు..
కుటుంబాన్ని నాశనం చేస్తానంటూ బెదిరింపులు
మూఢనమ్మకాలకు దూరంగా ఉండాలని ప్రజలకు వన్టౌన్ ఇన్స్పెక్టర్ బి. సునీల్ కుమార్ సూచన
ఆదిలాబాద్, జూలై 8 (మన భారత్): ప్రేమ వివాహం చేసుకున్న యువతిని మంత్రశక్తులతో తిరిగి కుటుంబానికి తీసుకొస్తానని నమ్మబలికి రూ.30 వేల వరకు డబ్బు వసూలు చేసి మోసానికి పాల్పడిన ఓ నకిలీ బాబాను ఆదిలాబాద్ వన్టౌన్ పోలీసులు అరెస్టు చేసి రిమాండ్కు తరలించారు. ఈ విషయాన్ని వన్టౌన్ పోలీస్ స్టేషన్ ఇన్స్పెక్టర్ బి. సునీల్ కుమార్ వెల్లడించారు.
పోలీసుల వివరాల ప్రకారం, ఆదిలాబాద్ హౌసింగ్ బోర్డ్ కాలనీకి చెందిన గడ్డం శివప్రసాద్ను ఎస్.కె. మునీర్ అనే వ్యక్తి సంప్రదించాడు. ప్రేమ వివాహం చేసుకున్న తన అన్నయ్య కుమార్తెను ప్రత్యేక మంత్రశక్తులు, తంత్రాల ద్వారా తిరిగి కుటుంబానికి తీసుకొస్తానని నమ్మించాడు. ఇందుకోసం తొలి విడతగా రూ.25 వేల నగదు తీసుకున్నాడు.
అయితే నెలలు గడిచినా ఎలాంటి ఫలితం కనిపించకపోవడంతో బాధితుడు తన డబ్బు తిరిగి ఇవ్వాలని నిందితుడిని ప్రశ్నించాడు. దీంతో మరింత డబ్బు ఇవ్వాలని ఒత్తిడి తెచ్చిన నిందితుడు, ఇవ్వకపోతే మంత్రశక్తులతో కుటుంబాన్ని నాశనం చేస్తానని, ప్రాణహాని కలిగిస్తానంటూ బెదిరింపులకు పాల్పడ్డాడు. భయాందోళనకు గురైన బాధితుడు మరో రూ.5 వేల రూపాయలు కూడా చెల్లించాడు.
తర్వాత తాను మోసపోయానని గుర్తించిన గడ్డం శివప్రసాద్ వన్టౌన్ పోలీస్ స్టేషన్లో ఫిర్యాదు చేశాడు. ఫిర్యాదు ఆధారంగా కేసు నమోదు చేసిన పోలీసులు దర్యాప్తు చేపట్టి నిందితుడు ఎస్.కె. మునీర్ను అదుపులోకి తీసుకుని విచారించారు. అనంతరం న్యాయస్థానంలో హాజరుపరచగా కోర్టు రిమాండ్ విధించినట్లు పోలీసులు తెలిపారు.
ఈ సందర్భంగా వన్టౌన్ ఇన్స్పెక్టర్ బి. సునీల్ కుమార్ మాట్లాడుతూ, మంత్రాలు, తంత్రాలు, చేతబడి, బాబాల పేరుతో ప్రజలను మోసం చేసే వ్యక్తుల మాటలను నమ్మవద్దని సూచించారు. ఇలాంటి ఘటనలు ఎదురైతే ఆలస్యం చేయకుండా వెంటనే సమీప పోలీస్ స్టేషన్లో ఫిర్యాదు చేయాలని ప్రజలకు విజ్ఞప్తి చేశారు. మూఢనమ్మకాల కంటే చట్టంపై విశ్వాసం ఉంచడం ద్వారా ఇలాంటి మోసాలను నివారించవచ్చని పేర్కొన్నారు.
ఈ ఘటనతో ప్రజలను భయభ్రాంతులకు గురిచేసి అక్రమంగా డబ్బు దోచుకునే మోసగాళ్లపై పోలీసులు కఠిన చర్యలు తీసుకుంటున్నారని, ప్రజలు అప్రమత్తంగా ఉండాలని అధికారులు సూచించారు.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి
