మన భారత్, విశాఖపట్నం:
మద్యం మత్తులో ఓ వ్యక్తి ఏకంగా ఆర్టీసీ బస్సును ఎత్తుకెళ్లిన ఘటన విశాఖపట్నంలో చోటుచేసుకుంది. ఈ సంఘటనతో నగరంలో కలకలం రేగగా, ప్రయాణికులు భయాందోళనకు గురయ్యారు.
వివరాల ప్రకారం, ప్రయాణికులతో వెళ్తున్న ఆర్టీసీ బస్సును డ్రైవర్ కొద్దిసేపు రోడ్డుపక్కన ఆపి టాయిలెట్కు వెళ్లాడు. అదే సమయంలో కండక్టర్ బస్సులో టికెట్లు ఇస్తూ ఉండగా, మద్యం మత్తులో ఉన్న ఓ వ్యక్తి డ్రైవర్ సీటులోకి ఎక్కి బస్సును స్టార్ట్ చేశాడు. ఎవరికీ అర్థం కాకముందే బస్సును ముందుకు నడిపించాడు.
సుమారు ఒక కిలోమీటర్ దూరం వరకు బస్సును నడిపిన ఆ వ్యక్తి నియంత్రణ కోల్పోయి మార్గమధ్యంలో పలు వాహనాలు, షాపులను ఢీకొట్టాడు. దీంతో అక్కడ తీవ్ర గందరగోళ పరిస్థితులు నెలకొన్నాయి. బస్సులో ఉన్న ప్రయాణికులు ఒక్కసారిగా భయంతో అరుస్తూ దిగేందుకు ప్రయత్నించారు.
సమాచారం అందుకున్న ట్రాఫిక్ పోలీసులు వెంటనే సంఘటనా స్థలానికి చేరుకుని, ఆ వ్యక్తిని అదుపులోకి తీసుకున్నారు. ఈ ఘటనలో కొంత ఆస్తి నష్టం జరిగినట్లు తెలుస్తోంది. అదృష్టవశాత్తూ ఎలాంటి ప్రాణనష్టం జరగలేదని అధికారులు తెలిపారు.
ఈ ఘటనపై కేసు నమోదు చేసి దర్యాప్తు చేపట్టిన పోలీసులు, మద్యం మత్తులో వాహనం నడపడం ఎంత ప్రమాదకరమో ప్రజలు గుర్తుంచుకోవాలని సూచించారు.
