మన భారత్, తెలంగాణ:
తెలంగాణ రాష్ట్ర అభివృద్ధి లక్ష్యంగా ప్రభుత్వం కీలక నిర్ణయం తీసుకుంది. మార్చి 6వ తేదీ నుంచి ‘ప్రజా పాలన–ప్రగతి ప్రణాళిక’ పేరిట 99 రోజుల ప్రత్యేక కార్యక్రమాన్ని నిర్వహించనున్నట్లు ముఖ్యమంత్రి Revanth Reddy ప్రకటించారు. అభివృద్ధి ప్రణాళికల అమలును వేగవంతం చేయడం, పరిపాలనలో పారదర్శకతను పెంపొందించడం ఈ కార్యక్రమం ప్రధాన ఉద్దేశ్యమని తెలిపారు.
సచివాలయంలో నిర్వహించిన ఉన్నతస్థాయి సమావేశంలో మాట్లాడిన సీఎం రేవంత్ రెడ్డి, ప్రభుత్వ పనితీరులో గణనీయమైన మార్పులు తీసుకురావాలని అధికారులకు దిశానిర్దేశం చేశారు. ఇకపై ప్రభుత్వ కార్యాలయాలు అద్దె భవనాల్లో కొనసాగకూడదని, అవసరమైన చోట ప్రభుత్వ భవనాల నిర్మాణం చేపట్టాలని సూచించారు.
అలాగే ఫైళ్ల క్లియరెన్స్ నిర్దిష్ట కాలపరిమితిలో పూర్తిచేయాలని, పెండింగ్ అంశాలపై కఠినంగా వ్యవహరించాలని అధికారులను ఆదేశించారు. రాష్ట్రానికి వచ్చిన పరిశ్రమల పెట్టుబడులు, కుదిరిన ఒప్పందాలు భూమి మీద అమలులోకి రావాలనే దిశగా చర్యలు తీసుకోవాలని స్పష్టం చేశారు.
విద్యా రంగంలో సంస్కరణలపై ప్రత్యేక దృష్టి సారించిన సీఎం, ప్రభుత్వ పాఠశాలల ప్రక్షాళనకు ప్రాధాన్యం ఇవ్వాలని చెప్పారు. రాష్ట్రంలోని 100 నియోజకవర్గాల్లో ‘టీజీ పబ్లిక్ స్కూళ్లు’ ప్రారంభించేందుకు కార్యాచరణ రూపొందించాలని ఆదేశించారు. నాణ్యమైన విద్య అందించడం ద్వారా ప్రభుత్వ విద్యా వ్యవస్థపై ప్రజల విశ్వాసాన్ని మరింత పెంచాలనే లక్ష్యాన్ని వెల్లడించారు.
‘ప్రజా పాలన–ప్రగతి ప్రణాళిక’ 99 రోజుల కార్యక్రమం ద్వారా శాఖల వారీగా లక్ష్యాలను నిర్దేశించి, అమలుపై క్రమం తప్పకుండా సమీక్షలు నిర్వహిస్తామని సీఎం తెలిపారు. ప్రజలకు వేగవంతమైన, సమర్థవంతమైన పరిపాలన అందించడం ఈ కార్యాచరణ ప్రధాన ఉద్దేశ్యమని స్పష్టం చేశారు.
