ఆదిలాబాద్‌లో తొలి విజయం మహిళదే.. 48వ వార్డులో బీజేపీ అభ్యర్థి ఆకుల రేణుక ప్రవీణ్ గెలుపు

మన భారత్, ఆదిలాబాద్:

ఆదిలాబాద్ మున్సిపల్ ఎన్నికల కౌంటింగ్ నేపథ్యంలో తొలి ఫలితం వెలువడింది. 48వ వార్డులో బీజేపీ అభ్యర్థి ఆకుల రేణుక ప్రవీణ్ విజయం సాధించి మహిళా అభ్యర్థిగా తొలి గెలుపు నమోదు చేశారు.

తమ సమీప ప్రత్యర్థి ఏఐఎఫ్‌బీ పార్టీ అభ్యర్థిని మాజీ మున్సిపల్ చైర్మన్ రంగినేని మనీషాపై 34 ఓట్ల మెజారిటీతో రేణుక ప్రవీణ్ గెలుపొందారు. ప్రారంభ రౌండ్ల నుంచే ఉత్కంఠభరితంగా సాగిన లెక్కింపులో చివరి వరకూ పోటీ హోరాహోరీగా సాగింది. తుది ఫలితం ప్రకటించగానే బీజేపీ శ్రేణులు ఆనందోత్సాహాల్లో మునిగిపోయాయి.

మహిళా అభ్యర్థి తొలి విజయం సాధించడం స్థానికంగా చర్చనీయాంశమైంది. పార్టీ నాయకులు, కార్యకర్తలు ఆమెకు అభినందనలు తెలిపారు. అభివృద్ధి, పారదర్శక పాలనకు కట్టుబడి పనిచేస్తామని విజేత అభ్యర్థి పేర్కొన్నారు.

ఇంకా మిగిలిన వార్డుల ఫలితాలు వెలువడాల్సి ఉండటంతో పట్టణవ్యాప్తంగా ఉత్కంఠ వాతావరణం నెలకొంది. ప్రతి రౌండ్ లెక్కింపుతో రాజకీయ సమీకరణాలు ఎలా మారతాయన్న ఆసక్తి పెరుగుతోంది. మొత్తం మీద ఆదిలాబాద్ మున్సిపల్ ఎన్నికల ఫలితాలు రాజకీయ వర్గాల్లో చర్చకు దారితీశాయి.