ప్రతీ మంగళవారం మాంసంతో అన్నదానం… ప్రత్యేకతతో నిలుస్తున్న రేణుక ఎల్లమ్మ ఆలయం
మన భారత్, సిద్దిపేట: సిద్దిపేట పట్టణంలోని వ్యవసాయ మార్కెట్ యార్డు పక్కన చింతల్ చెరువు వద్ద వెలసిన రేణుక ఎల్లమ్మ తల్లి స్వయంభూ దేవాలయం భక్తి, సంప్రదాయం, విశిష్టతల సమ్మేళనంగా మారింది. ముఖ్యంగా ప్రతీ మంగళవారం మాంసాహార భోజనం వడ్డించే ఈ ఆలయం గురించి తెలిసిన వారు ఆశ్చర్యపోతారు. కానీ భక్తులు మాత్రం దీన్ని అమ్మవారి ప్రసాదంగా భావించి పెద్ద ఎత్తున తరలివస్తుంటారు.
🔹 పసుపులో వెలిసిన అమ్మవారు – 6 ఎకరాల స్థలం ఆలయానికి దానం
సిద్దిపేటకు చెందిన అందే కృష్ణారెడ్డి పూర్వీకులు పసుపులో అమ్మవారు ప్రత్యక్షమయ్యారని నమ్ముతూ, తమకు చెందిన 6 ఎకరాల 12 గుంటల స్థలాన్ని దేవాలయానికి అంకితమిచ్చారు. తరాలు గడిచేకొద్దీ కొంతభాగం విక్రయించినప్పటికీ… 15 ఏళ్ల క్రితం ఇంటి పెద్దలకు కలలో అమ్మవారు ప్రత్యక్షమై ఆలయాన్ని పునర్నిర్మించాలని ఆజ్ఞాపించిందని కుటుంబ సభ్యులు చెబుతున్నారు.
ఆ ఆజ్ఞను గౌరవిస్తూ రూ.25 లక్షల ఖర్చుతో ఆలయాన్ని పునర్నిర్మించడంతో భక్తుల రాకపోకలు భారీగా పెరిగాయి.
🔹 రాష్ట్రాల దాటి భక్తుల రద్దీ
చింతల్ చెరువు రేణుక ఎల్లమ్మను స్వయంభూ దేవతగా భావిస్తూ…
నిజామాబాద్, భోదన్, భైంసా, మహారాష్ట్ర, పెద్దపల్లి, మంచిర్యాలలతో సహా అనేక ప్రాంతాల నుంచి భక్తులు ప్రతీ రోజు భారీగా దర్శనానికి వస్తున్నారు. ఆలయ నిర్వహణను కృష్ణారెడ్డి కుటుంబం, మరో స్థానిక కుటుంబం కలిసి నిత్యం కొనసాగిస్తున్నారు.
🔹 మంగళవారం మాంసంతో భోజనం ఎందుకు?
మొదట్లో ఆలయంలో శాకాహారానికే ప్రాధాన్యం ఉండేది.
కానీ భక్తులు కోరికలు నెరవేరిన సందర్భంగా అమ్మవారికి బోనాలతో మేక బలి ఇవ్వడం ప్రారంభించడంతో… ఆ మేకతో నైవేద్యం చేసి, మిగిలిన మాంసంతో మంగళవారం రోజున అన్నదానం అందించడం ఆనవాయితీగా మారింది.
ఇలా గత మూడేళ్లుగా ప్రతీ మంగళవారం మటన్ భోజనం వడ్డించడం ప్రత్యేక సంప్రదాయంగా మారింది.
🔹 ఒక్కరోజే 300–400 మంది భక్తులకు మటన్ భోజనం
భక్తులు, మొక్కులు తీర్చుకునే దాతలు అందించే మేకలు, బియ్యంతో ఆలయ ప్రాంగణంలోనే వంట చేసి భక్తులకు వడ్డిస్తారు.
దాతలు లేకున్నా ఆలయ నిర్వాహకులే తమ సొంత ఖర్చుతో భోజనం పెడతారని ఆలయ నిర్వాహకుడు అందే కృష్ణారెడ్డి తెలిపారు.
“అమ్మవారి దీవెనలతో శాకాహారంతో పాటు మాంసాహార భోజనం అందిస్తున్నాం. దాతలు లేకున్నా మేమే వరుసగా నిర్వహిస్తున్నాం” — అందే కృష్ణారెడ్డి
🔹 మంగళవారం పండగ వాతావరణం!
ప్రతీ మంగళవారం ఆలయంలో కుటుంబ సభ్యుల్లా ఒక్కటై భక్తులు భోజనం చేసుకుంటూ ఆధ్యాత్మిక ఆనందాన్ని పంచుకుంటారు.
భక్తులు మొక్కు పెట్టేదే ఇదే — “అమ్మవారు కోరిక తీర్చితే, మేమూ యాటతో భోజనం పెడతాం” అని.
ఇలా ఈ ఆలయంలో మంగళవారం రోజున ప్రత్యేకమైన సంబురం నెలకొంటుంది. భక్తి, భోజనం, సంప్రదాయం—మూడింటి సమ్మేళనంగా ఈ ఆలయం ప్రాంతీయ ఆధ్యాత్మిక కేంద్రంగా నిలుస్తోంది.
