దళిత యువకుడి కుటుంబానికి న్యాయం చేయాలి

హత్యకు గురైన దళిత యువకుడి కుటుంబానికి న్యాయం చేయాలి
బాధిత కుటుంబానికి పరిహారం, పునరావాసం కల్పించాలి: ఎమ్మార్పీఎస్ నేతల డిమాండ్

మన భారత్, నేరడిగొండ: అక్టోబర్ 13: నేరడిగొండ మండలం బుగ్గారం గ్రామానికి చెందిన దళిత యువకుడు నాతరి సతీష్ హత్యకు గురై నాలుగు నెలలు గడుస్తున్నా, బాధిత కుటుంబానికి ప్రభుత్వం నుంచి తగిన న్యాయం అందలేదని ఎమ్మార్పీఎస్ నాయకులు ఆవేదన వ్యక్తం చేశారు. బాధిత కుటుంబానికి చట్టపరంగా అందాల్సిన పరిహారం, పునరావాసం, విద్యా, ఉపాధి సదుపాయాలను కల్పించాలని ప్రభుత్వాన్ని డిమాండ్ చేశారు.

ఎమ్మార్పీఎస్ వ్యవస్థాపకులు మందకృష్ణ మాదిగ ఆదేశాల మేరకు ఎమ్మార్పీఎస్ రాష్ట్ర ఉపాధ్యక్షులు కూడల స్వామి మాదిగ, జిల్లా అధ్యక్షులు ఆరెల్లి మల్లేష్ మాదిగ తదితర నాయకులు బాధిత కుటుంబాన్ని పరామర్శించారు. కుటుంబ సభ్యులకు ధైర్యం చెప్పి, న్యాయం జరిగే వరకు అండగా ఉంటామని భరోసా ఇచ్చారు.

కుల వివక్షతో హత్య చేసినట్లు ఆరోపణలు

నాయకులు తెలిపిన వివరాల ప్రకారం.. బుగ్గారం గ్రామానికి చెందిన నాతరి సతీష్ (25) ఈ ఏడాది జూన్ 17న హత్యకు గురయ్యాడు. కుల వివక్ష నేపథ్యంలో కొందరు యువకులు పథకం ప్రకారం అతడిని తీసుకెళ్లి హత్య చేసి, మృతదేహాన్ని బోథ్ మండలంలోని కరత్‌వాడ ప్రాజెక్టులో పడేసినట్లు వారు ఆరోపించారు. ఈ ఘటనపై దర్యాప్తు చేపట్టిన పోలీసులు నిందితులపై హత్య, ఎస్సీ, ఎస్టీ అట్రాసిటీ చట్టం, మోసం తదితర అభియోగాల కింద కేసులు నమోదు చేసి రిమాండ్‌కు తరలించినట్లు పేర్కొన్నారు.

కుటుంబానికి ప్రభుత్వ సాయం అందించాలి

సతీష్ కుటుంబ పరిస్థితిని వివరిస్తూ నాయకులు ఆవేదన వ్యక్తం చేశారు. ఇప్పటికే భర్తను కోల్పోయిన తల్లికి ఇద్దరు కుమార్తెలు ఉండగా, కుటుంబానికి అండగా ఉంటాడనుకున్న కుమారుడు హత్యకు గురికావడంతో ఆమె తీవ్ర విషాదంలో మునిగిపోయిందన్నారు. ఇలాంటి పరిస్థితుల్లో బాధిత కుటుంబానికి అండగా నిలవాల్సిన అధికారులు ఇప్పటివరకు తగిన చర్యలు తీసుకోకపోవడం బాధాకరమని విమర్శించారు.

జిల్లా కలెక్టర్ తక్షణమే స్పందించి బాధిత కుటుంబానికి చట్టప్రకారం అందాల్సిన పరిహారాన్ని మంజూరు చేయాలని కోరారు. కుటుంబానికి పునరావాసం కల్పించడంతో పాటు పిల్లల విద్య, కుటుంబ సభ్యుల ఉపాధికి అవసరమైన సహకారం అందించేలా చర్యలు తీసుకోవాలని విజ్ఞప్తి చేశారు. ఈ కేసులో బాధిత కుటుంబానికి అందాల్సిన న్యాయం విషయంలో జాప్యం చేసిన అధికారులపై విచారణ జరిపి, బాధ్యత నిర్ధారణ అయిన పక్షంలో శాఖాపరమైన చర్యలు తీసుకోవాలని డిమాండ్ చేశారు.

న్యాయం జరిగే వరకు పోరాటం

నాతరి సతీష్ కుటుంబానికి న్యాయం జరిగే వరకు ఎమ్మార్పీఎస్ పూర్తిస్థాయిలో అండగా ఉంటుందని నాయకులు స్పష్టం చేశారు. బాధిత కుటుంబానికి న్యాయం, ప్రభుత్వపరమైన సహాయం అందించే విషయంలో స్పందన రాకపోతే జిల్లా వ్యాప్తంగా ఆందోళనలు చేపట్టి పోరాటాన్ని కొనసాగిస్తామని హెచ్చరించారు.

ఈ పరామర్శ కార్యక్రమంలో ఎమ్మార్పీఎస్ జిల్లా అధ్యక్షులు ఆరెల్లి మల్లేష్ మాదిగ, రాష్ట్ర నాయకులు గజ్జల శంకర్ మాదిగ, కారెం రవి మాదిగ, సంతోష్ మాదిగ, రోడ్డ గంగన్న, అశోక్, సారంగ రవి తదితరులు పాల్గొన్నారు.

Cell Number : cell_number : 9573391945

User Name : user_name : Gontimukkula prasad