పత్తి కొనుగోళ్లకు సర్వం సిద్ధం..

పత్తి కొనుగోళ్లకు సర్వం సిద్ధం.. రైతులకు ఇబ్బందులు కలగకుండా ప్రత్యేక ఏర్పాట్లు
పత్తి కొనుగోళ్లకు సర్వం సిద్ధం.. రైతులకు ఇబ్బందులు కలగకుండా ప్రత్యేక ఏర్పాట్లు

ఆదిలాబాద్ వ్యవసాయ మార్కెట్ యార్డును పరిశీలించిన ఏఎంసీ చైర్మన్ బోరంచు శ్రీకాంత్ రెడ్డి

మన భారత్, అక్టోబర్ 11, ఆదిలాబాద్: పత్తి కొనుగోళ్ల నేపథ్యంలో ఆదిలాబాద్ వ్యవసాయ మార్కెట్ యార్డులో రైతులకు ఎలాంటి ఇబ్బందులు కలగకుండా అవసరమైన అన్ని ఏర్పాట్లు చేస్తున్నట్లు ఆదిలాబాద్ వ్యవసాయ మార్కెట్ కమిటీ (ఏఎంసీ) చైర్మన్ బోరంచు శ్రీకాంత్ రెడ్డి తెలిపారు. పత్తి కొనుగోళ్ల నిర్వహణ, రైతులకు కల్పించాల్సిన సౌకర్యాలు, తూకం ప్రక్రియను పరిశీలించేందుకు ఆయన మార్కెట్ యార్డును సందర్శించారు. ఈ సందర్భంగా పత్తి తేమ శాతాన్ని నిర్ధారించే మాయిశ్చర్ మీటర్లు, కాంటాలను పరిశీలించి సంబంధిత ఏర్పాట్లపై వివరాలు తెలుసుకున్నారు.

ఈ సందర్భంగా శ్రీకాంత్ రెడ్డి మాట్లాడుతూ.. పత్తి విక్రయించేందుకు మార్కెట్‌కు వచ్చే రైతులకు ఎలాంటి అసౌకర్యాలు కలగకుండా అధికారులు సమన్వయంతో పనిచేయాలని సూచించారు. రైతులకు అవసరమైన మౌలిక సదుపాయాలను అందుబాటులో ఉంచడంతో పాటు కొనుగోళ్ల ప్రక్రియ సజావుగా జరిగేలా చర్యలు తీసుకుంటున్నామని వెల్లడించారు.

రైతులకు భోజనం, తాగునీరు.. మహిళలకు ప్రత్యేక సౌకర్యాలు

పత్తి విక్రయాల కోసం మార్కెట్‌కు వచ్చే రైతుల సౌకర్యార్థం భోజన వసతి, తాగునీటి సదుపాయాలు కల్పిస్తున్నట్లు శ్రీకాంత్ రెడ్డి తెలిపారు. మహిళా రైతుల కోసం ప్రత్యేక మరుగుదొడ్లను ఏర్పాటు చేయడంతో పాటు రైతులకు అవసరమైన సమాచారం అందించేందుకు హెల్ప్‌డెస్క్, డిజిటల్ డిస్‌ప్లేలను అందుబాటులోకి తీసుకురానున్నట్లు పేర్కొన్నారు. రైతులు మార్కెట్‌లో ఎక్కువ సమయం ఇబ్బందులు పడకుండా కొనుగోళ్ల నిర్వహణపై ప్రత్యేక దృష్టి సారిస్తున్నామని చెప్పారు.

పత్తి తేమ శాతాన్ని ముందుగానే నిర్ధారించుకోవాలి

ఈ ఏడాది పత్తి కొనుగోళ్ల కోసం మాయిశ్చర్ మీటర్లను అందుబాటులో ఉంచుతున్నట్లు తెలిపారు. రైతులు పత్తిని మార్కెట్‌కు తీసుకువచ్చే ముందే తేమ శాతంపై తమకున్న సందేహాలను నివృత్తి చేసుకోవాలని సూచించారు. పత్తి నాణ్యత, తేమ శాతానికి సంబంధించిన నిబంధనలను దృష్టిలో ఉంచుకుని పంటను విక్రయానికి తీసుకురావాలని కోరారు.

కిన్వట్, మహోర్ ప్రాంతాల నుంచి పత్తి తీసుకువచ్చే రైతుల కోసం ప్రత్యేకంగా జిన్నింగ్ మిల్లులను ఏర్పాటు చేస్తున్నట్లు వెల్లడించారు. రైతులకు కేటాయించిన జిన్నింగ్ మిల్లుల నిల్వ సామర్థ్యానికి అనుగుణంగానే పత్తిని తీసుకురావాలని సూచించారు. దీనివల్ల మార్కెట్ వద్ద వాహనాల రద్దీని తగ్గించడంతో పాటు కొనుగోళ్ల ప్రక్రియను క్రమబద్ధంగా నిర్వహించేందుకు వీలవుతుందని తెలిపారు.

ట్రాఫిక్ రద్దీ నివారణకు రైతులు సహకరించాలి

ఆదిలాబాద్ వ్యవసాయ మార్కెట్ యార్డు పరిసరాల్లో రోడ్డు పనులు కొనసాగుతున్న నేపథ్యంలో పత్తి రైతులు, వాహనదారులు రాంపూర్ రోడ్డు మీదుగా మార్కెట్‌కు చేరుకోవాలని శ్రీకాంత్ రెడ్డి సూచించారు. మార్కెట్ పరిసరాల్లో ట్రాఫిక్ రద్దీ ఏర్పడకుండా పోలీస్ యంత్రాంగానికి రైతులు, వాహనదారులు సహకరించాలని కోరారు. పత్తి రవాణా వాహనాలు సూచించిన మార్గాల్లోనే ప్రయాణిస్తూ కొనుగోళ్ల ప్రక్రియకు ఆటంకం కలగకుండా చూడాలని తెలిపారు.

మూడు రోజుల్లో చెల్లింపులు.. ఈ-కేవైసీ తప్పనిసరి

పత్తి విక్రయించిన రైతులకు చెల్లింపులు మూడు రోజుల్లోగా బ్యాంకు ఖాతాల్లో జమ కావడానికి అవసరమైన పత్రాలను ముందుగానే సిద్ధం చేసుకోవాలని ఏఎంసీ చైర్మన్ సూచించారు. రైతులు తమ బ్యాంకు ఖాతాలకు ఆధార్ అనుసంధానం చేసుకోవడంతో పాటు ఈ-కేవైసీ ప్రక్రియను పూర్తి చేయాలని కోరారు.

అదేవిధంగా పట్టా పాస్‌బుక్, స్లాట్ బుక్, ఫార్మర్ ఐడీ వంటి అవసరమైన పత్రాలను సిద్ధంగా ఉంచుకోవాలని తెలిపారు. పత్రాలు సక్రమంగా ఉండటం వల్ల కొనుగోళ్ల ప్రక్రియలో జాప్యం తగ్గి, రైతులకు చెల్లింపులు సకాలంలో అందేందుకు అవకాశం ఉంటుందని పేర్కొన్నారు.

పత్తి కొనుగోళ్ల సీజన్‌లో రైతులకు మెరుగైన సేవలు అందించడం, పారదర్శకంగా కొనుగోళ్లు నిర్వహించడం, రైతుల సమయాన్ని ఆదా చేయడం లక్ష్యంగా మార్కెట్ యార్డులో ఏర్పాట్లు చేస్తున్నట్లు బోరంచు శ్రీకాంత్ రెడ్డి వెల్లడించారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్‌చార్జి 

జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.[