మన భారత్, సెప్టెంబర్ 15, తలమడుగు మండలంలోని కొసాయి గ్రామంలో మంగళవారం న్యాయ విజ్ఞాన సదస్సును నిర్వహించారు. జిల్లా న్యాయ సేవాధికార సంస్థ కార్యదర్శి బి. హుస్సేన్ ఈ కార్యక్రమానికి హాజరై గ్రామస్తులకు వివిధ చట్టాలు, హక్కులు, న్యాయ సేవలపై అవగాహన కల్పించారు. ప్రతి ఒక్కరూ చట్టాలపై ప్రాథమిక అవగాహన కలిగి ఉండటం ద్వారా తమ హక్కులను కాపాడుకోవచ్చని ఆయన సూచించారు.
ఈ సందర్భంగా ఉచిత న్యాయ సహాయం, విద్యా హక్కు, బాల్య వివాహాల నిరోధం, అటవీ చట్టాలు, సోషల్ మీడియా వినియోగం తదితర అంశాలపై వివరించారు. ఆర్థికంగా వెనుకబడినవారు, న్యాయ సహాయం అవసరమైన పేదలకు ప్రభుత్వ న్యాయ సేవల ద్వారా ఉచితంగా న్యాయ సహాయం అందుబాటులో ఉంటుందని తెలిపారు. న్యాయ సమస్యలు ఎదురైనప్పుడు భయపడకుండా సంబంధిత న్యాయ సేవా సంస్థలను సంప్రదించాలని సూచించారు.
బాల్య వివాహాలు పిల్లల భవిష్యత్తుపై తీవ్ర ప్రభావం చూపుతాయని, వాటిని అరికట్టేందుకు ప్రతి ఒక్కరూ బాధ్యతగా వ్యవహరించాలని పేర్కొన్నారు. విద్య ప్రతి చిన్నారి హక్కు అని, పిల్లలను తప్పనిసరిగా పాఠశాలకు పంపించి వారి విద్యకు తల్లిదండ్రులు ప్రాధాన్యం ఇవ్వాలని సూచించారు.
అటవీ ప్రాంతాల్లో నివసించే ప్రజలు అటవీ చట్టాలు, నిబంధనలపై అవగాహన కలిగి ఉండాలని తెలిపారు. అదే విధంగా సోషల్ మీడియాను బాధ్యతాయుతంగా వినియోగించాలని, తెలియని సమాచారాన్ని నమ్మి ఇతరులకు పంపించకుండా జాగ్రత్త వహించాలని సూచించారు.
రైతులు వ్యవసాయంలో నకిలీ విత్తనాలు, నకిలీ పురుగుమందులు, ఇతర వ్యవసాయ మందుల విషయంలో అప్రమత్తంగా ఉండాలని బి. హుస్సేన్ సూచించారు. నాణ్యమైన విత్తనాలు, మందులను మాత్రమే కొనుగోలు చేసి, కొనుగోలు చేసిన ప్రతిసారీ బిల్లులు తప్పనిసరిగా తీసుకోవాలని సూచించారు.
చట్టాలపై అవగాహన కార్యక్రమాలు గ్రామీణ ప్రాంత ప్రజలకు ఎంతో ఉపయోగకరంగా ఉంటాయని గ్రామస్తులు పేర్కొన్నారు. న్యాయపరమైన సమస్యలు ఎదురైనప్పుడు సరైన మార్గదర్శకత్వం పొందేందుకు ఇలాంటి సదస్సులు దోహదపడతాయని తెలిపారు.
ఈ కార్యక్రమంలో కొసాయి గ్రామ సర్పంచ్ సీడం శైలజ రవి, గ్రామస్తులు, పోలీసు సిబ్బంది, గ్రామ పెద్దలు, ప్రజాప్రతినిధులు, తదితరులు పాల్గొన్నారు.
మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి
ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి
