అనుమతి లేకుండా డీజే ఏర్పాటు.. గణపతి మండప కమిటీ సభ్యులపై కేసు

డీజే, వాహనం సీజ్.. అనుమతులు లేకుండా వినియోగిస్తే కఠిన చర్యలు: టూ టౌన్ ఇన్‌స్పెక్టర్ కె. నాగరాజు

మన భారత్, సెప్టెంబర్14, ఆదిలాబాద్: వినాయక చవితి ఉత్సవాల సందర్భంగా పోలీసుల అనుమతి లేకుండా డీజే ఏర్పాటు చేసిన గణపతి మండప కమిటీ సభ్యులు, డీజే నిర్వాహకుడిపై ఆదిలాబాద్ టూ టౌన్ పోలీసులు కేసు నమోదు చేశారు. అనుమతులు లేకుండా అధిక శబ్దంతో డీజే ఏర్పాటు చేసిన ఘటన సుందరయ్య నగర్‌లో చోటుచేసుకున్నట్లు పోలీసులు తెలిపారు.

టూ టౌన్ పోలీస్ స్టేషన్ పరిధిలోని సుందరయ్య నగర్‌లో గత రాత్రి వినాయక ప్రతిష్ఠాపన కార్యక్రమం నిర్వహించారు. ఈ సందర్భంగా నిబంధనలకు విరుద్ధంగా డీజే ఏర్పాటు చేసినట్లు పోలీసుల దృష్టికి వచ్చింది. దీంతో పోలీసులు అక్కడికి చేరుకుని డీజేను పరిశీలించి, అనుమతులు లేవని నిర్ధారించారు.

ఈ ఘటనపై గణపతి మండప కమిటీ సభ్యులతో పాటు డీజే యజమాని మహమ్మద్ అబ్దుల్ బషీర్ పై కేసు నమోదు చేసినట్లు టూ టౌన్ ఇన్‌స్పెక్టర్ కె. నాగరాజు వెల్లడించారు. నిబంధనలకు విరుద్ధంగా ఏర్పాటు చేసిన డీజేను, దానికి వినియోగించిన వాహనాన్ని పోలీసులు స్వాధీనం చేసుకుని సీజ్ చేశారు.

డీజేలకు అనుమతులు లేవు

గణపతి ఉత్సవాల సందర్భంగా శాంతిభద్రతలకు ఎలాంటి విఘాతం కలగకుండా నిర్వాహకులు పోలీసుల సూచనలు, నిబంధనలు తప్పనిసరిగా పాటించాలని ఇన్‌స్పెక్టర్ కె. నాగరాజు సూచించారు. ముఖ్యంగా అధిక శబ్దాన్ని వెలువరించే డీజేలకు ఎలాంటి అనుమతులు లేవని స్పష్టం చేశారు.

ఉత్సవ కమిటీలు ముందుగానే పోలీసుల సూచనలను తెలుసుకుని వాటికి అనుగుణంగా కార్యక్రమాలను నిర్వహించాలని కోరారు. ప్రజలకు, వృద్ధులకు, చిన్నారులకు, విద్యార్థులకు ఇబ్బంది కలిగించే విధంగా అధిక శబ్దంతో డీజేలు నిర్వహిస్తే చట్టపరమైన చర్యలు తప్పవని పోలీసులు హెచ్చరించారు.

వినాయక ఉత్సవాలు ప్రశాంత వాతావరణంలో, భక్తిశ్రద్ధలతో నిర్వహించేందుకు ప్రతి ఒక్కరూ పోలీసులకు సహకరించాలని టూ టౌన్ పోలీసులు విజ్ఞప్తి చేశారు. అనుమతులు లేకుండా డీజేలు ఏర్పాటు చేయడం, నిబంధనలు ఉల్లంఘించడం వంటి చర్యలను ఎట్టి పరిస్థితుల్లోనూ ఉపేక్షించబోమని స్పష్టం చేశారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి

ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి