అప్రమత్తంగా విధులు నిర్వహించాలి: ఎస్పీ అఖిల్ మహాజన్

గణపతి నవరాత్రి ఉత్సవాలను సమిష్టి కృషితో విజయవంతం చేద్దాం

ప్రతి గణపతి మండపానికి ఆన్‌లైన్ రిజిస్ట్రేషన్, జియో ట్యాగింగ్ తప్పనిసరి

ఉత్సవాలు ముగిసే వరకు పోలీస్ సిబ్బంది అప్రమత్తంగా విధులు నిర్వహించాలి: ఎస్పీ అఖిల్ మహాజన్

మన భారత్, ఆదిలాబాద్: రానున్న గణపతి నవరాత్రి ఉత్సవాలను ప్రశాంత వాతావరణంలో విజయవంతంగా నిర్వహించేందుకు పోలీస్ అధికారులు, సిబ్బంది సమన్వయంతో పనిచేయాలని జిల్లా ఎస్పీ అఖిల్ మహాజన్ సూచించారు. శనివారం జిల్లా పోలీస్ హెడ్‌క్వార్టర్స్‌లో పోలీస్ అధికారులతో నిర్వహించిన నెలవారీ నేర సమీక్ష సమావేశంలో ఆయన మాట్లాడారు.

గణపతి ఉత్సవాల సందర్భంగా ఎలాంటి అవాంఛనీయ ఘటనలకు తావులేకుండా ముందస్తు ప్రణాళికతో భద్రతా చర్యలు చేపట్టాలని ఎస్పీ ఆదేశించారు. జిల్లాలో ఏర్పాటు చేసే ప్రతి గణపతి మండపాన్ని ఆన్‌లైన్‌లో రిజిస్ట్రేషన్ చేయడంతో పాటు జియో ట్యాగింగ్ ప్రక్రియను పూర్తి చేయాలని సూచించారు. మండలాల వారీగా గణపతి మండపాల నిర్వాహకులతో సమన్వయ సమావేశాలు నిర్వహించి, ప్రతిష్ఠాపన నుంచి నిమజ్జనం వరకు పాటించాల్సిన నిబంధనలు, భద్రతా చర్యలపై అవగాహన కల్పించాలని తెలిపారు.

గణపతి ప్రతిష్ఠాపన, నిమజ్జనం కార్యక్రమాల్లో డీజేలు, టపాకాయలు, స్మోక్ బాంబులు, పేపర్ చల్లే యంత్రాలకు అనుమతి లేదని ఎస్పీ స్పష్టం చేశారు. నిర్వాహకులు పోలీసుల సూచనలు, నిబంధనలను తప్పనిసరిగా పాటించాలని కోరారు. సోషల్ మీడియాలో వచ్చే వదంతులు, నిర్ధారణ లేని సమాచారాన్ని ప్రజలు నమ్మవద్దని, అనుమానాస్పద సమాచారం కనిపించినా లేదా ఎలాంటి సమస్య ఎదురైనా వెంటనే పోలీసులను సంప్రదించాలని సూచించారు.

అసాంఘిక కార్యకలాపాలపై ప్రత్యేక నిఘా

గణపతి ఉత్సవాలు పూర్తయ్యే వరకు అత్యవసర పరిస్థితులు మినహా సిబ్బంది సెలవులు తీసుకోకుండా పూర్తి అప్రమత్తతతో విధులు నిర్వహించాలని ఎస్పీ సూచించారు. రాత్రి వేళల్లో పటిష్టమైన పెట్రోలింగ్ నిర్వహిస్తూ ఆర్థిక నేరాలు, అసాంఘిక కార్యకలాపాలను అరికట్టాలని ఆదేశించారు.

గంజాయి, గుడుంబా, గ్యాంబ్లింగ్, మట్కా వంటి అసాంఘిక కార్యకలాపాలపై ప్రత్యేక నిఘా ఏర్పాటు చేసి, వాటికి పాల్పడే వ్యక్తులపై కఠిన చర్యలు తీసుకోవాలని స్పష్టం చేశారు. డ్రంక్ అండ్ డ్రైవ్, ఓపెన్ డ్రింకింగ్, ఈ-పెట్టీ కేసులపై చర్యలు ముమ్మరం చేసి రోడ్డు ప్రమాదాల నివారణకు కృషి చేయాలని పోలీస్ అధికారులకు సూచించారు.

సైబర్ నేరాల దర్యాప్తులో నాణ్యత పాటించాలి

నెలవారీ నేర సమీక్షలో భాగంగా జిల్లాలో నమోదైన వివిధ కేసుల దర్యాప్తు పురోగతిని ఎస్పీ సమీక్షించారు. ముఖ్యంగా సైబర్ క్రైమ్ కేసుల దర్యాప్తును నాణ్యత ప్రమాణాలతో నిర్వహించాలని సూచించారు. శాస్త్రీయ ఆధారాలు, సాంకేతిక పరిజ్ఞానాన్ని వినియోగిస్తూ నిందితులకు శిక్ష పడే విధంగా పటిష్టమైన దర్యాప్తు చేపట్టాలని అధికారులను ఆదేశించారు.

అదేవిధంగా డయల్ 100/112కు వచ్చే ఫిర్యాదులపై పోలీసులు స్పందిస్తున్న తీరును సమీక్షించారు. ప్రతి పోలీస్ సిబ్బంది క్రమశిక్షణ, సమయపాలన, నీతి, నిజాయితీతో విధులు నిర్వహించాలని సూచించారు. సస్పెక్ట్‌లు, రౌడీ షీటర్ల కదలికలపై నిరంతర నిఘా కొనసాగించాలని తెలిపారు.

రహదారి భద్రతకు ప్రాధాన్యం

రహదారులపై సంచరించే పశువుల కారణంగా ప్రమాదాలు జరగకుండా సంబంధిత శాఖల అధికారులతో సమన్వయం చేసుకుని వాటిని రోడ్ల నుంచి తొలగించేలా చర్యలు చేపట్టాలని ఎస్పీ సూచించారు. ప్రజల భద్రతకు సంబంధించిన అంశాల్లో ఇతర శాఖలతో సమన్వయం చేసుకుంటూ ముందుకు సాగాలని తెలిపారు.
ఉత్తమ ప్రతిభ కనబరిచిన సిబ్బందికి ప్రశంసలు

ఈ సందర్భంగా గత నెల రోజులుగా విధుల్లో ఉత్తమ ప్రతిభ కనబరిచిన అధికారులు, పోలీస్ సిబ్బందికి ఎస్పీ అఖిల్ మహాజన్ ప్రశంసా పత్రాలను అందజేసి అభినందించారు. విధుల్లో ప్రతిభ కనబరిచే సిబ్బందిని ప్రోత్సహించడం ద్వారా ఇతరుల్లోనూ మరింత ఉత్సాహం పెరుగుతుందని పేర్కొన్నారు.

ఈ సమావేశంలో అదనపు ఎస్పీ బి. సురేందర్ రావు (ఓఎస్డీ), ఉట్నూర్ ఏఎస్పీ రుత్విక్ సాయి కొట్టే ఐపీఎస్, డీఎస్పీలు ఎల్. జీవన్ రెడ్డి, కమతం ఇంద్రవర్ధన్, ఎం. వెంకట నర్సయ్యతో పాటు స్పెషల్ బ్రాంచ్, ఐటీ కోర్, సైబర్ క్రైమ్, డీసీఆర్‌బీ అధికారులు, జిల్లాలోని సీఐలు, ఆర్‌ఐలు, ఎస్సైలు, ఆర్‌ఎస్‌ఐలు, పోలీస్ సిబ్బంది తదితరులు పాల్గొన్నారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి

ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.