ప్రజాస్వామ్య పద్ధతిలో పోరాడుదాం
అంటరానితనం, కుల వివక్ష ఆరోపణలపై చర్యలు తీసుకోవాలి: ఎస్సీ విభాగం జిల్లా ఉపాధ్యక్షుడు బొమ్మెత నర్సయ్య
మన భారత్, బజార్హత్నూర్:
దళితుల ఆత్మగౌరవాన్ని కాపాడేందుకు ప్రజాస్వామ్య పద్ధతిలో పోరాటం కొనసాగిస్తామని కాంగ్రెస్ పార్టీ ఎస్సీ విభాగం ఆదిలాబాద్ జిల్లా ఉపాధ్యక్షుడు బొమ్మెత నర్సయ్య అన్నారు. దళితులు నడిచిన ప్రజా రహదారిని ‘మైలైంది, అపవిత్రమైంది’ అంటూ పసుపు నీటితో శుద్ధి చేశారనే ఆరోపణలపై బజార్హత్నూర్ పోలీస్ స్టేషన్ ఎస్సైకి వినతిపత్రం అందజేసినట్లు తెలిపారు.
ఈ సందర్భంగా నర్సయ్య మాట్లాడుతూ.. ప్రజా రహదారిని కుల వివక్షకు సంబంధించిన భావజాలంతో శుద్ధి చేశారనే ఆరోపణలు తీవ్రంగా పరిగణించాల్సిన అంశమన్నారు. ఈ ఘటనలో పాల్గొన్నట్లు ఆరోపణలు ఎదుర్కొంటున్న వ్యక్తులపై అంటరానితనం, కుల వివక్షకు సంబంధించిన చట్టాల ప్రకారం విచారణ జరిపి, నిబంధనల మేరకు కఠిన చర్యలు తీసుకోవాలని పోలీసులను కోరినట్లు చెప్పారు.
అలాగే తెలంగాణ శాసనసభ స్పీకర్ గడ్డం ప్రసాద్ కుమార్ పై తాత మధు చేసినట్లు పేర్కొంటున్న అనుచిత వ్యాఖ్యలను ప్రతి పౌర సమాజం ఖండించాలని నర్సయ్య కోరారు. ఈ అంశంపై ఎస్సీ, ఎస్టీ అట్రాసిటీస్ చట్టం-1989 కింద చట్టపరమైన చర్యలు తీసుకోవాలని డిమాండ్ చేశారు. సెప్టెంబర్ 7, 2026న కేసు నమోదు చేసి, సంబంధిత ఆరోపణలపై సమగ్ర దర్యాప్తు చేయాలని కోరినట్లు తెలిపారు.
బడుగు, బలహీన, పేద, అణగారిన వర్గాల నుంచి ఎదిగి ఉన్నత పదవులను చేపట్టిన నాయకులపై అవమానకర వ్యాఖ్యలు చేయడం ప్రజాస్వామ్య విలువలకు విరుద్ధమని నర్సయ్య అన్నారు. ఇది కేవలం ఒక వ్యక్తికి సంబంధించిన అంశంగా కాకుండా సామాజికంగా వెనుకబడిన వర్గాల గౌరవం, ఆత్మగౌరవానికి సంబంధించిన విషయంగా చూడాల్సిన అవసరం ఉందన్నారు.
దళితులకు అధికారం, గౌరవం, సమాన అవకాశాలు కల్పించేందుకు రాజకీయ పార్టీలు, ప్రజా సంఘాలు, ప్రజాస్వామ్య సంస్థలు ముందుకు రావాలని పిలుపునిచ్చారు. రాజ్యాంగం కల్పించిన సమానత్వ హక్కులను ప్రతి ఒక్కరూ గౌరవించాలని, కుల వివక్షకు తావులేని సమాజ నిర్మాణానికి అందరూ కృషి చేయాలని అన్నారు.
గతంలో దళితుడిని ముఖ్యమంత్రిని చేస్తామని హామీ ఇచ్చిన కేసీఆర్ ప్రభుత్వం ఆ హామీని అమలు చేయలేదనే విమర్శలు ఉన్నాయని నర్సయ్య పేర్కొన్నారు. ప్రస్తుత కాంగ్రెస్ ప్రభుత్వం దళిత సామాజిక వర్గానికి చెందిన గడ్డం ప్రసాద్ కుమార్కు తెలంగాణ శాసనసభ స్పీకర్ వంటి కీలక రాజ్యాంగ పదవి కల్పించిందని తెలిపారు. అలాంటి పదవిలో ఉన్న వ్యక్తిపై అవమానకర వ్యాఖ్యలు చేయడం సమర్థనీయం కాదని అన్నారు.
ప్రజాస్వామ్యంలో ప్రతి ఒక్కరికీ తమ అభిప్రాయాలను వ్యక్తం చేసే హక్కు ఉన్నప్పటికీ, ఇతరుల గౌరవానికి భంగం కలిగించే వ్యాఖ్యలు చేయకుండా బాధ్యతాయుతంగా వ్యవహరించాలని నర్సయ్య సూచించారు. కుల వివక్ష, అంటరానితనం వంటి సామాజిక దురాచారాలకు వ్యతిరేకంగా చట్టపరమైన, ప్రజాస్వామ్య మార్గాల్లో పోరాటం కొనసాగిస్తామని స్పష్టం చేశారు.
ఈ కార్యక్రమంలో మండల కన్వీనర్ కళ్లెం విట్టల్, మాజీ కన్వీనర్ జెల్కే పాండురంగ, మండల ఎస్సీ విభాగం అధ్యక్షుడు ఆకుల సుభాష్, సూర్యవంశం పాండురంగ, గిర్నూర్ సర్పంచ్ పూసల భీమేష్, పడవల రాజు, మేస్త్రం జంగు బాపు, విజేందర్, కీర్తి రమణ, దొమ్మటి పోశెట్టి, కేశవరావు తో పాటు పలువురు కాంగ్రెస్ పార్టీ కార్యకర్తలు పాల్గొన్నారు.
మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి
ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
