బీఆర్ఎస్ ఎమ్మెల్యే అనిల్ జాదవ్ మహా ధర్నా.!

కళ్యాణ లక్ష్మీ, షాదీ ముబారక్ పథకాన్ని కొనసాగించాలి

తులం బంగారం హామీని అమలు చేయాలి.. ఇచ్చోడలో బీఆర్‌ఎస్ ఆధ్వర్యంలో ధర్నా

ఇచ్చోడ, ఆగస్టు 18, మన భారత్: పేదింటి ఆడబిడ్డల వివాహాలకు ఆర్థిక భరోసా కల్పించే కళ్యాణ లక్ష్మీ, షాదీ ముబారక్ పథకాన్ని కొనసాగించడంతో పాటు ఎన్నికల సమయంలో ఇచ్చిన తులం బంగారం హామీని అమలు చేయాలని బోథ్ ఎమ్మెల్యే అనిల్ జాదవ్ డిమాండ్ చేశారు. బీఆర్‌ఎస్ వర్కింగ్ ప్రెసిడెంట్ కేటీఆర్ ఆదేశాల మేరకు ఇచ్చోడ మండల కేంద్రంలోని అంబేద్కర్ చౌరస్తాలో కాంగ్రెస్ ప్రభుత్వ వైఖరిని నిరసిస్తూ బీఆర్‌ఎస్ ఆధ్వర్యంలో ధర్నా నిర్వహించారు.

ఈ కార్యక్రమంలో ఎమ్మెల్యే అనిల్ జాదవ్‌తో పాటు బీఆర్‌ఎస్ నాయకులు, కార్యకర్తలు పాల్గొని ప్రభుత్వానికి వ్యతిరేకంగా నినాదాలు చేశారు.

పేద కుటుంబాలకు కళ్యాణ లక్ష్మీ అండ

ఈ సందర్భంగా ఎమ్మెల్యే అనిల్ జాదవ్ మాట్లాడుతూ.. తెలంగాణ రాష్ట్రం ఏర్పడిన అనంతరం పేద కుటుంబాల్లో ఆడబిడ్డ వివాహం ఆర్థిక భారంగా మారకూడదనే ఉద్దేశంతో అప్పటి ముఖ్యమంత్రి కేసీఆర్ కళ్యాణ లక్ష్మీ, షాదీ ముబారక్ పథకాలను ప్రారంభించారని తెలిపారు. ప్రారంభంలో రూ.51 వేలుగా ఉన్న ఆర్థిక సహాయాన్ని తరువాత రూ.1,00,116కు పెంచారని పేర్కొన్నారు.

కేసీఆర్ ప్రభుత్వ హయాంలో లక్షలాది మంది పేద కుటుంబాల ఆడబిడ్డలకు ఈ పథకం ద్వారా ఆర్థిక సహాయం అందిందని, పేద కుటుంబాలకు ఇది ఎంతో ఉపయోగకరంగా నిలిచిందని అన్నారు. ప్రభుత్వం ఒక కుటుంబ సభ్యుడిలా అండగా నిలిచే విధంగా ఈ పథకాన్ని అమలు చేశారని పేర్కొన్నారు.

తులం బంగారం హామీ ఏమైంది?

2023 ఎన్నికల సమయంలో కాంగ్రెస్ పార్టీ అధికారంలోకి వస్తే కళ్యాణ లక్ష్మీ, షాదీ ముబారక్ ఆర్థిక సహాయంతో పాటు తులం బంగారం అందిస్తామని హామీ ఇచ్చిందని ఎమ్మెల్యే గుర్తుచేశారు. అధికారంలోకి వచ్చిన తరువాత ఆ హామీ అమలుకు సంబంధించి స్పష్టత లేకపోవడంపై ఆయన ప్రశ్నించారు.

ఎన్నికల సమయంలో ఇచ్చిన హామీలను అమలు చేయకుండా పేద కుటుంబాలను ఇబ్బందులకు గురిచేయడం సరికాదని అన్నారు. పెండింగ్‌లో ఉన్న అర్హులైన లబ్ధిదారులకు వెంటనే ఆర్థిక సహాయం విడుదల చేయాలని డిమాండ్ చేశారు.

దరఖాస్తుదారులకు ఇబ్బందులు

కేసీఆర్ ప్రభుత్వ హయాంలో దరఖాస్తు చేసుకున్న కొద్ది రోజుల్లోనే ఆర్థిక సహాయం అందేదని, ప్రస్తుతం అర్హులైన లబ్ధిదారులు కార్యాలయాల చుట్టూ తిరగాల్సిన పరిస్థితి ఏర్పడిందని అనిల్ జాదవ్ ఆరోపించారు. పెళ్లిళ్లు జరిగి, పిల్లలు పుట్టే పరిస్థితి వచ్చినా కొంతమంది లబ్ధిదారులకు ఆర్థిక సహాయం అందకపోవడం బాధాకరమన్నారు.

కళ్యాణ లక్ష్మీ, షాదీ ముబారక్ పథకానికి సంబంధించి హైకోర్టులో గడువు లభించినప్పటికీ ప్రభుత్వం కౌంటర్ ఎందుకు దాఖలు చేయలేదని ఆయన ప్రశ్నించారు. కీలక కేసుల్లో ప్రైవేట్ న్యాయవాదుల సేవలను వినియోగించే ప్రభుత్వం పేద ఆడబిడ్డలకు సంబంధించిన పథకం విషయంలో ఎందుకు తగిన చర్యలు తీసుకోవడం లేదో ప్రజలకు వివరించాలని డిమాండ్ చేశారు.

 ఉద్యమాన్ని ఉధృతం చేస్తాం

కళ్యాణ లక్ష్మీ, షాదీ ముబారక్ పథకాన్ని నిర్వీర్యం చేసే ప్రయత్నాలను ప్రభుత్వం విరమించుకోవాలని ఎమ్మెల్యే హెచ్చరించారు. పెండింగ్‌లో ఉన్న అర్హులందరికీ ఆలస్యం లేకుండా ఆర్థిక సహాయం విడుదల చేయాలని, హైకోర్టు కేసులో ప్రభుత్వం తీసుకున్న చర్యలపై స్పష్టత ఇవ్వాలని కోరారు.

ఎన్నికల సమయంలో ఇచ్చిన తులం బంగారం హామీని ఎప్పుడు, ఎలా అమలు చేస్తారో ప్రభుత్వం స్పష్టమైన ప్రకటన చేయాలని డిమాండ్ చేశారు. లేనిపక్షంలో బీఆర్‌ఎస్ ఆధ్వర్యంలో రానున్న రోజుల్లో ఉద్యమాన్ని మరింత ఉధృతం చేస్తామని హెచ్చరించారు.

రైతు బీమాపై విమర్శలు..

రైతుల ప్రయోజనాల విషయంలోనూ కాంగ్రెస్ ప్రభుత్వం నిర్లక్ష్యంగా వ్యవహరిస్తోందని ఎమ్మెల్యే అనిల్ జాదవ్ ఆరోపించారు. రైతు బీమా పథకానికి సంబంధించి ప్రీమియం చెల్లింపులపై ప్రభుత్వం స్పష్టత ఇవ్వాలని కోరారు. రైతులకు అండగా నిలిచే సంక్షేమ పథకాలను కొనసాగించాల్సిన బాధ్యత ప్రభుత్వంపై ఉందని పేర్కొన్నారు.

పేదలు, రైతులు, మహిళలకు సంబంధించిన సంక్షేమ పథకాల అమలులో ప్రభుత్వం జాప్యం చేయకుండా అర్హులైన ప్రతి లబ్ధిదారుడికి ప్రయోజనం అందించాలని బీఆర్‌ఎస్ నాయకులు డిమాండ్ చేశారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి

ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.