ఉట్నూర్ పోలీస్ స్టేషన్, సర్కిల్ కార్యాలయంలో వార్షిక తనిఖీలు..

రికార్డుల నిర్వహణ, కేసుల దర్యాప్తుపై ప్రత్యేక దృష్టి

ఉట్నూర్, ఆగస్టు 11: పోలీసు విధుల్లో ప్రతి ఒక్కరూ జవాబుదారితనం, క్రమశిక్షణ, నిజాయితీతో పనిచేస్తూ ప్రజల్లో పోలీసులపై నమ్మకాన్ని మరింత పెంచాలని ఆదిలాబాద్ జిల్లా ఎస్పీ అఖిల్ మహాజన్ ఐపీఎస్ సూచించారు. వార్షిక తనిఖీల్లో భాగంగా మంగళవారం ఉట్నూర్ పోలీస్ స్టేషన్, సర్కిల్ కార్యాలయాన్ని ఆయన పరిశీలించారు.

ఉట్నూర్‌కు చేరుకున్న జిల్లా ఎస్పీ అఖిల్ మహాజన్‌కు ఏఎస్పీ రుత్విక్ సాయి కొట్టే ఐపీఎస్, సీఐ మడావి ప్రసాద్, ఎస్సై జి. విజయ్ పూల మొక్క అందజేసి స్వాగతం పలికారు. అనంతరం ఎస్పీ పోలీస్ స్టేషన్ పరిసరాలను పరిశీలించారు. స్టేషన్ ఆవరణను ఎప్పటికప్పుడు పరిశుభ్రంగా ఉంచాలని, పోలీస్ స్టేషన్‌కు వచ్చే ఫిర్యాదుదారులతో బాధ్యతాయుతంగా వ్యవహరించాలని సిబ్బందికి సూచించారు.

ఫిర్యాదులపై వేగంగా స్పందించాలి

ప్రజలు తమ సమస్యలను పరిష్కరించుకునేందుకు పోలీస్ స్టేషన్‌కు వచ్చినప్పుడు వారిని గౌరవంగా స్వీకరించి, ఫిర్యాదులపై త్వరితగతిన స్పందించాలని ఎస్పీ సూచించారు. బాధితులకు సకాలంలో న్యాయం అందేలా సిబ్బందిని కేటాయించి కేసుల దర్యాప్తును వేగవంతం చేయాలని ఆదేశించారు.

పోలీసు సిబ్బంది శారీరకంగా, మానసికంగా దృఢంగా ఉండేందుకు క్రమం తప్పకుండా వ్యాయామం చేయాలని తెలిపారు. ప్రతి శనివారం పరేడ్ నిర్వహించాలని సూచించారు. ఈ సందర్భంగా సిబ్బందితో ప్రత్యేక డ్రిల్ నిర్వహించారు.

పోలీసు సామగ్రి, వాహనాల పరిశీలన

పోలీస్ స్టేషన్‌లో సిబ్బందికి కేటాయించిన కిట్ ఆర్టికల్స్, పోలీసు సామగ్రి, ఇతర వస్తువులను ఎస్పీ పరిశీలించారు. వాటి నిర్వహణ, వినియోగం, భద్రతపై వివరాలు తెలుసుకున్నారు. పోలీస్ స్టేషన్‌లో దీర్ఘకాలంగా ఉన్న వాహనాల పరిస్థితి, వాటికి సంబంధించిన కేసుల వివరాలను కూడా పరిశీలించారు.

పోలీస్ స్టేషన్ ఆవరణలో ఎస్పీ మొక్క నాటి పచ్చదనాన్ని పెంపొందించాలని సిబ్బందికి సూచించారు.

రికార్డులు ఎప్పటికప్పుడు నవీకరించాలి

ప్రతి పోలీసు సిబ్బందికి విధుల్లో జవాబుదారితనం తప్పనిసరిగా ఉండాలని ఎస్పీ అఖిల్ మహాజన్ అన్నారు. క్రమశిక్షణ, నిజాయితీతో విధులు నిర్వర్తిస్తూ జిల్లా పోలీసు శాఖ కీర్తి ప్రతిష్టలను పెంచేలా పనిచేయాలని సూచించారు.

వర్టికల్స్ విధానాన్ని సమర్థవంతంగా అమలు చేస్తూ ఎలాంటి పెండెన్సీ లేకుండా రికార్డులను ఎప్పటికప్పుడు నవీకరించాలని ఆదేశించారు. రిసెప్షన్ సెంటర్‌ను పరిశీలించిన ఆయన.. బాధితుల నుంచి వచ్చిన ఫిర్యాదులపై దర్యాప్తును పూర్తి చేసి సకాలంలో న్యాయం అందించాలని తెలిపారు.

 విపిఓ వ్యవస్థను బలోపేతం చేయాలి

విలేజ్ పోలీస్ ఆఫీసర్ (VPO) విధానాన్ని పకడ్బందీగా అమలు చేయాలని ఎస్పీ స్పష్టం చేశారు. గ్రామస్థాయిలో సమాచార వ్యవస్థను మరింత పటిష్టం చేసుకోవాలని, అసాంఘిక కార్యకలాపాలకు సంబంధించిన సమాచారం పోలీసులకు తక్షణమే అందేలా నిఘా వ్యవస్థను అభివృద్ధి చేయాలని సూచించారు.

కేసుల దర్యాప్తుతో పాటు కోర్టుల్లో పెండింగ్‌లో ఉన్న కేసులు, సమన్లు, వారెంట్లను పరిశీలించి వాటిని నిర్ణీత సమయంలో పూర్తి చేయాలని ఆదేశించారు. దీర్ఘకాలంగా పెండింగ్‌లో ఉన్న కేసులపై ప్రత్యేక దృష్టి సారించి దర్యాప్తు పూర్తి చేసి బాధితులకు న్యాయం చేయాలని అన్నారు.

 నేరాల నియంత్రణపై ప్రత్యేక నిఘా

పోలీస్ స్టేషన్ పరిధిలో రాత్రి వేళల్లో గస్తీని ముమ్మరం చేయాలని ఎస్పీ సూచించారు. ఆర్థిక నేరాలను అరికట్టేందుకు ప్రత్యేక చర్యలు చేపట్టాలని తెలిపారు. రాత్రి వేళల్లో ఫింగర్‌ప్రింట్ యంత్రాల ద్వారా తనిఖీలు నిర్వహిస్తూ అనుమానాస్పద వ్యక్తుల వేలిముద్రలను సేకరించాలని సూచించారు.

ఆర్థిక నేరాలకు సంబంధించిన కేసుల్లో దర్యాప్తును వేగవంతం చేసి నిందితులను గుర్తించి అరెస్టు చేయడంతో పాటు చోరీకి గురైన సొత్తును రికవరీ చేసి బాధితులకు న్యాయం చేయాలని అన్నారు.

గంజాయి, గుడుంబా, గ్యాంబ్లింగ్‌పై ఉక్కుపాదం

పోలీస్ స్టేషన్ పరిధిలో గంజాయి, గుడుంబా, గ్యాంబ్లింగ్, ఓపెన్ డ్రింకింగ్ తదితర అసాంఘిక కార్యకలాపాలకు తావులేకుండా కఠిన చర్యలు తీసుకోవాలని ఎస్పీ ఆదేశించారు. మండల పరిధిలో శాంతిభద్రతలకు విఘాతం కలిగించే పరిస్థితులు తలెత్తకుండా ముందస్తు సమాచారాన్ని సేకరించి అవసరమైన చర్యలు చేపట్టాలని సూచించారు.

ప్రజల రక్షణలో పోలీసులు నిరంతరం అప్రమత్తంగా ఉండాలని, ప్రజలకు అందుబాటులో ఉంటూ వారి భద్రతకు భరోసా కల్పించాలని ఎస్పీ అఖిల్ మహాజన్ తెలిపారు.

సర్కిల్ కార్యాలయంలో రికార్డుల పరిశీలన

అనంతరం ఉట్నూర్ సర్కిల్ కార్యాలయాన్ని ఎస్పీ పూర్తిగా పరిశీలించారు. కార్యాలయంలోని రికార్డులను ఎప్పటికప్పుడు నవీకరించాలని సూచించారు. సర్కిల్ పరిధిలో నమోదైన కేసుల వివరాలను అధికారులను అడిగి తెలుసుకుని, పెండింగ్ కేసుల దర్యాప్తును పూర్తి చేసి బాధితులకు సకాలంలో న్యాయం అందించాలని ఆదేశించారు.

కోర్టులో కేసులకు శిక్షలు పడటం ద్వారా బాధితులకు పోలీసు శాఖ తరఫున న్యాయం లభిస్తుందనే విషయాన్ని అధికారులు, సిబ్బంది గుర్తుంచుకుని విధులు నిర్వహించాలని ఎస్పీ సూచించారు.

ఈ తనిఖీల్లో ఉట్నూర్ ఏఎస్పీ రుత్విక్ సాయి కొట్టే ఐపీఎస్, ఉట్నూర్ సీఐ మడావి ప్రసాద్, ఉట్నూర్ ఎస్సై జి. విజయ్, ఇంద్రవెల్లి ఎస్సై ఈ. సాయన్న, ఎస్సై చిన్న గంగారం, పోలీసు సిబ్బంది తదితరులు పాల్గొన్నారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి

ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.