మన భారత్, తలమడుగు

వర్షాలతో కుంగిన వంతెనపై ప్రమాదం.. స్వల్ప గాయాలతో డ్రైవర్‌కు ప్రాణాపాయం తప్పింది

తలమడుగు, జూలై 10:
ఆదిలాబాద్ జిల్లా తలమడుగు మండలంలోని దేవాపూర్ గ్రామం వద్ద ఉన్న వంతెనపై శుక్రవారం ఇసుక లోడుతో వెళ్తున్న ట్రాక్టర్ బోల్తా పడిన ఘటన స్థానికంగా కలకలం రేపింది. ప్రమాదంలో ట్రాక్టర్ డ్రైవర్‌కు స్వల్ప గాయాలు కాగా, స్థానిక గ్రామస్తులు వెంటనే స్పందించి అతడిని సురక్షితంగా బయటకు తీసి ప్రాణాపాయం నుంచి కాపాడారు.

స్థానికుల వివరాల ప్రకారం, ఇటీవల కురిసిన భారీ వర్షాల కారణంగా దేవాపూర్ బ్రిడ్జి కొంత మేర కుంగిపోవడంతో వంతెన బలహీనంగా మారింది. ఇదే సమయంలో ఇసుక లోడుతో వెళ్తున్న ట్రాక్టర్ అదుపుతప్పి బోల్తా పడింది. ఘటనతో కొంతసేపు రాకపోకలకు అంతరాయం ఏర్పడగా, స్థానికులు వెంటనే వాహనాలను నిలిపివేసి ప్రమాదాన్ని మరింత పెరగకుండా చర్యలు చేపట్టారు.

ఈ రహదారి ఆదిలాబాద్ నుంచి ఝరి–పునగూడ ప్రాంతాలకు వెళ్లే ముఖ్యమైన మార్గం కావడంతో ప్రతిరోజూ భారీ సంఖ్యలో వాహనాలు ప్రయాణిస్తుంటాయి. వంతెన దెబ్బతిన్న నేపథ్యంలో ముఖ్యంగా రాత్రి వేళల్లో ప్రయాణించే వాహనదారులు అత్యంత అప్రమత్తంగా ఉండాలని గ్రామస్తులు సూచించారు.

గ్రామ సర్పంచ్ పోరండ్ల సంతోష్ మాట్లాడుతూ, వంతెన దెబ్బతిన్న విషయాన్ని సంబంధిత అధికారుల దృష్టికి తీసుకెళ్లినట్లు తెలిపారు. వీలైనంత త్వరగా మరమ్మత్తు పనులు చేపట్టి వంతెనను సురక్షితంగా మార్చేందుకు చర్యలు తీసుకుంటామని వెల్లడించారు.

స్థానికులు మాట్లాడుతూ, ఇటీవల వర్షాలతో దెబ్బతిన్న లో-లెవల్ వంతెనలు, కుంగిపోయిన బ్రిడ్జిలను అధికారులు ముందస్తుగా గుర్తించి తక్షణమే మరమ్మత్తులు చేపడితే ఇలాంటి ప్రమాదాలను నివారించవచ్చని అభిప్రాయపడ్డారు. ప్రజల ప్రాణాలు, ఆస్తుల భద్రత దృష్ట్యా ప్రమాదకర వంతెనలపై హెచ్చరిక బోర్డులు ఏర్పాటు చేయడంతో పాటు అత్యవసర మరమ్మత్తులు చేపట్టాలని వారు డిమాండ్ చేశారు.

దేవాపూర్ వంతెన ఘటన స్థానిక ప్రజల్లో ఆందోళన కలిగించగా, అధికారులు వెంటనే స్పందించి శాశ్వత పరిష్కారం చూపాలని గ్రామస్థులు కోరుతున్నారు.

మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..

మీ గొంటి ముక్కుల ప్రసాద్ రిపోర్టర్ మన భారత్