మన భారత్, గజ్వేల్

SIR ప్రక్రియ నేపథ్యంలో బూత్ లెవెల్ ఏజెంట్లకు సమగ్ర అవగాహన

గజ్వేల్ నియోజకవర్గంలో కాంగ్రెస్ పార్టీ బూత్ లెవెల్ ఏజెంట్ల (BLA) సామర్థ్యాన్ని పెంపొందించేందుకు ప్రత్యేక శిక్షణ కార్యక్రమాన్ని నిర్వహించనున్నారు. రానున్న SIR (Special Intensive Revision) ప్రక్రియను దృష్టిలో ఉంచుకుని ఈ శిక్షణ శిబిరాన్ని సోమవారం నిర్వహించనున్నట్లు పార్టీ నాయకత్వం వెల్లడించింది.

ఈ కార్యక్రమం ముట్రాజ్‌పల్లి రింగ్ రోడ్ సమీపంలోని ఎస్.ఎం. గార్డెన్‌లో ఉదయం 9 గంటలకు ప్రారంభం కానుంది. నియోజకవర్గ పరిధిలోని అన్ని బూత్ లెవెల్ ఏజెంట్లు తప్పనిసరిగా హాజరుకావాలని పార్టీ నాయకత్వం సూచించింది.

శిక్షణ శిబిరంలో ఓటరు జాబితా సవరణ ప్రక్రియ, బూత్ స్థాయిలో చేపట్టాల్సిన చర్యలు, ఓటర్ల నమోదు, తొలగింపులు, మార్పులు, ఎన్నికల నిబంధనలు, పార్టీ సంస్థాగత బలోపేతం వంటి అంశాలపై సమగ్ర అవగాహన కల్పించనున్నారు. ఆధునిక సాంకేతిక పరిజ్ఞానాన్ని వినియోగిస్తూ ఎల్‌ఈడీ స్క్రీన్ ద్వారా శిక్షణ అందించనున్నారు.

టీపీసీసీ తరఫున మాస్టర్ ట్రైనర్ బి. రణధీర్ ఈ కార్యక్రమానికి హాజరై బూత్ లెవెల్ ఏజెంట్లకు మార్గనిర్దేశం చేయనున్నారు. పార్టీ బలోపేతానికి బూత్ స్థాయి కార్యకర్తల పాత్ర ఎంతో కీలకమని, ఎన్నికల ప్రక్రియలో వారు సమర్థవంతంగా పనిచేసేలా ఈ శిక్షణ ఉపయోగపడుతుందని నాయకులు పేర్కొన్నారు.

సిద్దిపేట జిల్లా కాంగ్రెస్ పార్టీ అధ్యక్షురాలు తూంకుంట ఆంక్ష రెడ్డి ఆధ్వర్యంలో నిర్వహిస్తున్న ఈ కార్యక్రమం ద్వారా BLAలకు ఎన్నికల నిర్వహణ, ఓటరు జాబితా పరిశీలన, ప్రజలతో అనుసంధానం వంటి అంశాలపై ప్రాక్టికల్ అవగాహన కల్పించనున్నారు.

రానున్న ఎన్నికల నేపథ్యంలో కాంగ్రెస్ పార్టీ సంస్థాగతంగా మరింత బలోపేతం కావాలనే లక్ష్యంతో ఈ శిక్షణ శిబిరాలను నిర్వహిస్తున్నట్లు పార్టీ వర్గాలు వెల్లడించాయి. గజ్వేల్ నియోజకవర్గంలోని అన్ని బూత్ లెవెల్ ఏజెంట్లు, పార్టీ కార్యకర్తలు ఈ అవకాశాన్ని సద్వినియోగం చేసుకోవాలని పిలుపునిచ్చారు.

మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..