మన భారత్ ప్రతినిధి:
ప్రభుత్వ పాఠశాలల్లో నిర్వహిస్తున్న 15 రోజుల వేసవి శిబిరాలను విద్యార్థులు సద్వినియోగం చేసుకోవాలని కలెక్టర్ రాజర్షి షా సూచించారు. విద్యార్థుల్లో దాగి ఉన్న ప్రతిభను వెలికితీసేందుకు ప్రభుత్వం ప్రత్యేకంగా ఈ శిబిరాలను ఏర్పాటు చేసిందని తెలిపారు. విద్యతో పాటు సృజనాత్మకత, క్రీడా నైపుణ్యాలు, సాంకేతిక పరిజ్ఞానం పెంపొందించేందుకు ఈ శిబిరాలు ఎంతో ఉపయోగపడతాయని పేర్కొన్నారు.

వేసవి సెలవుల సమయంలో విద్యార్థులు సమయాన్ని వృథా చేయకుండా మ్యూజిక్, కోడింగ్, యోగా, క్రీడలు వంటి విభిన్న రంగాల్లో శిక్షణ పొందాలని కలెక్టర్ కోరారు. భవిష్యత్‌లో పోటీ ప్రపంచంలో నిలదొక్కుకోవాలంటే విద్యార్థులు చిన్న వయసులోనే పలు నైపుణ్యాలను అభివృద్ధి చేసుకోవాల్సిన అవసరం ఉందన్నారు.

ఈ శిబిరాల ద్వారా పిల్లల్లో ఆత్మవిశ్వాసం పెరగడంతో పాటు నాయకత్వ లక్షణాలు, సృజనాత్మక ఆలోచనలు కూడా అభివృద్ధి చెందుతాయని వివరించారు. ముఖ్యంగా ప్రభుత్వ పాఠశాల విద్యార్థులకు ప్రైవేట్ శిక్షణా కేంద్రాలకు వెళ్లాల్సిన అవసరం లేకుండా ఉచితంగానే ప్రభుత్వం అన్ని సౌకర్యాలు కల్పిస్తోందన్నారు.

తబల వాయించి.. సరిగమలు పలికి..

జిల్లా కలెక్టర్ రాజర్షి షా స్వయంగా విద్యార్థులకు తబలా, హార్మోనియం పేటి వాయిస్తూ విద్యార్థులను అబ్బురపరిచారు. ఏ విధంగా నేర్చుకోవాలో విద్యార్థులకు తనదైన శైలిలో సూచించారు. జిల్లా కలెక్టర్ తబలా, హార్మోనియం పేటి వాయించడం చూసి అధికారులు నివ్వెర పోయారు. కలెక్టర్ సార్ అన్ని రంగాల్లో కళాపోషకులని అనుకున్నారు.

శిక్షణ ముగిసిన అనంతరం విద్యార్థుల ప్రతిభను ప్రదర్శించేలా ప్రత్యేకంగా “టాలెంట్ మేళా” నిర్వహించనున్నట్లు కలెక్టర్ తెలిపారు. ఇందులో విద్యార్థులు నేర్చుకున్న కళలు, క్రీడా ప్రతిభ, సాంకేతిక నైపుణ్యాలను ప్రదర్శించే అవకాశం కల్పించనున్నట్లు చెప్పారు. దీని ద్వారా గ్రామీణ ప్రాంతాల విద్యార్థులకు కూడా తమ ప్రతిభను చాటుకునే వేదిక లభిస్తుందన్నారు.

తల్లిదండ్రులపై ఆర్థిక భారం పడకుండా ప్రభుత్వం ఉచితంగా ఈ వేసవి శిబిరాలను నిర్వహిస్తోందని, ప్రతి విద్యార్థి ఈ అవకాశాన్ని వినియోగించుకోవాలని కోరారు. విద్యార్థులు నిరంతర అభ్యాసంతో ముందుకు సాగితే ఉన్నత శిఖరాలను అధిరోహించడం సాధ్యమవుతుందని ప్రోత్సహించారు.

ప్రస్తుతం విద్యా రంగంలో సాంకేతిక పరిజ్ఞానం వేగంగా అభివృద్ధి చెందుతున్న నేపథ్యంలో కోడింగ్, డిజిటల్ లెర్నింగ్ వంటి అంశాలపై విద్యార్థులకు అవగాహన కల్పించడం ఎంతో అవసరమని విద్యావేత్తలు అభిప్రాయపడుతున్నారు. ఈ శిబిరాలు విద్యార్థుల భవిష్యత్‌కు బలమైన పునాది వేస్తాయని అధికారులు పేర్కొంటున్నారు.

మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..