మన భారత్, బజార్హత్నూర్:
ఆదిలాబాద్ జిల్లా బజార్హత్నూర్ మండలం వర్తమన్నూర్ గ్రామానికి చెందిన భూస్వామి ఏనుగు ఆశాబాయి తనకు చెందిన 150 ఎకరాల భూమిని పేదలకు దానం చేస్తూ విశేషమైన సేవా కార్యక్రమానికి నాంది పలికారు. ఈ భూమిని మొత్తం 30 పేద కుటుంబాలకు రాసిచ్చినట్లు కుటుంబ సభ్యులు తెలిపారు.
సమాజంలో వెనుకబడిన వర్గాల ఆర్థిక స్థితిని మెరుగుపరచాలనే లక్ష్యంతో ఆశాబాయి ఈ నిర్ణయం తీసుకున్నట్లు తెలుస్తోంది. ఆమె తీసుకున్న ఈ గొప్ప నిర్ణయాన్ని ఆమె కుమారుడు విద్యా సాగర్ రెడ్డి పూర్తిగా సమర్థిస్తూ తల్లి మార్గాన్ని అనుసరించడం విశేషంగా నిలిచింది.
ఈ సందర్భంగా విద్యా సాగర్ రెడ్డి ‘మన భారత్’తో మాట్లాడుతూ పేదలకు భూదానం చేయడం తమ కుటుంబానికి గర్వకారణమని, మరింత మంది ఇలాంటి సేవా కార్యక్రమాలకు ముందుకు రావాలని పిలుపునిచ్చారు. ఆశాబాయి చేసిన ఈ ఉదారత గ్రామ ప్రజల్లో ప్రశంసలు అందుకుంటోంది.
గ్రామస్థులు, ప్రజాప్రతినిధులు ఈ చర్యను అభినందిస్తూ, ఇది సమాజానికి ఆదర్శంగా నిలుస్తుందని పేర్కొన్నారు.
