60 ఏళ్ల వయసులోనూ 20లా కనిపిస్తున్న మోడల్ 

మన భారత్, సింగపూర్: 

వయస్సు పెరిగినా అందం, ఫిట్‌నెస్ కాపాడుకోవడం సాధ్యమేనని మరోసారి నిరూపించారు సింగపూర్‌కు చెందిన ప్రముఖ మోడల్ Chuando Tan. ఈ నెల 3న ఆయన 60వ పుట్టినరోజు జరుపుకున్నప్పటికీ, ఆయన లుక్స్ చూసి చాలా మంది ఇప్పటికీ 20–30 ఏళ్ల యువకుడని భావిస్తున్నారు. దీంతో ప్రపంచవ్యాప్తంగా ఆయన ఫిట్‌నెస్, యవ్వన లుక్ గురించి సోషల్ మీడియాలో విస్తృత చర్చ జరుగుతోంది.

చువాండో టాన్ తన ఆకర్షణీయమైన లుక్, ఫిట్ బాడీతో అంతర్జాతీయ స్థాయిలో గుర్తింపు పొందారు. ఇటీవల ఆయన పుట్టినరోజు సందర్భంగా సోషల్ మీడియాలో షేర్ చేసిన ఫొటోలు వైరల్‌గా మారాయి. ఆ ఫొటోలు చూసిన నెటిజన్లు “అరవైలో ఇరవైలా ఉన్నారు”, “ఇంత యవ్వనంగా ఎలా ఉంటారు?” అంటూ ఆశ్చర్యం వ్యక్తం చేస్తున్నారు. కొందరు సరదాగా “ఇతను వ్యాంపైర్ అయి ఉండొచ్చు” అంటూ కామెంట్లు చేస్తున్నారు.

తన యవ్వనానికి కారణం క్రమశిక్షణతో కూడిన జీవనశైలి అని చువాండో టాన్ చెబుతున్నారు. ముఖ్యంగా హై ప్రొటీన్ ఆహారం తీసుకోవడం, మద్యం, ధూమపానం, చక్కెరకు పూర్తిగా దూరంగా ఉండడం ఆయన పాటించే ముఖ్యమైన అలవాట్లు. అదనంగా ప్రతిరోజూ వ్యాయామం చేయడం, తరచూ స్విమ్మింగ్ చేయడం వల్ల శరీరం ఫిట్‌గా ఉంటుందని ఆయన వెల్లడించారు.

ఆరోగ్యకరమైన జీవనశైలి పాటిస్తే వయస్సు కేవలం ఒక సంఖ్య మాత్రమేనని చువాండో టాన్ మరోసారి నిరూపించారు. ఆయన ఫిట్‌నెస్, యవ్వన లుక్ ఇప్పుడు ప్రపంచవ్యాప్తంగా అనేక మందికి ప్రేరణగా నిలుస్తోంది.