సివిల్ రైట్స్ డే విజయవంతం చేయాలి..

21 మండలాల్లో సివిల్ రైట్స్ డే విజయవంతం చేయాలి

ఎస్సీ, ఎస్టీ హక్కులు, చట్టాలపై గ్రామస్థాయి వరకు అవగాహన కల్పించాలి: డీవీఎంసీ సభ్యులు

మన భారత్, సెప్టెంబర్ 29, ఆదిలాబాద్: జిల్లాలోని 21 మండలాల్లో బుధవారం నిర్వహించనున్న సివిల్ రైట్స్ డే కార్యక్రమాలను విజయవంతంగా నిర్వహించాలని జిల్లా ఎస్సీ/ఎస్టీ విజిలెన్స్ అండ్ మానిటరింగ్ కమిటీ (డీవీఎంసీ) సభ్యులు అధికారులను కోరారు. జిల్లా కలెక్టర్ రూపొందించిన షెడ్యూల్ ప్రకారం ఆయా మండలాల తహసీల్దార్లు, సంబంధిత శాఖల అధికారులు సమన్వయంతో కార్యక్రమాలను నిర్వహించాలని సూచించారు.

ఎస్సీ, ఎస్టీ వర్గాలపై జరిగే అఘాయిత్యాలను అరికట్టడం, బాధితులకు చట్టపరమైన రక్షణ కల్పించడం, వారికి సత్వర న్యాయం అందించడం, సామాజిక సమానత్వాన్ని పరిరక్షించడం లక్ష్యంగా SC/ST (Prevention of Atrocities) Act, 1989 అమల్లో ఉందని డీవీఎంసీ సభ్యులు తెలిపారు. ఈ చట్టంలోని నిబంధనలు, బాధితులకు అందుబాటులో ఉన్న రక్షణలు, న్యాయపరమైన హక్కులపై ప్రజలకు అవగాహన కల్పించడం అత్యంత అవసరమని పేర్కొన్నారు.

హక్కులపై ప్రజలకు అవగాహన కల్పించాలి

సివిల్ రైట్స్ డే సందర్భంగా గ్రామస్థాయి నుంచి మండల స్థాయి వరకు ప్రజలకు తమ హక్కులు, చట్టపరమైన రక్షణలు, వివక్షకు వ్యతిరేకంగా ఉన్న చట్టాలు, అఘాయిత్యాలు జరిగినప్పుడు ఫిర్యాదు చేసే విధానం తదితర అంశాలపై అవగాహన కల్పించాలని డీవీఎంసీ సభ్యులు సూచించారు. ముఖ్యంగా అణగారిన వర్గాలకు చెందిన ప్రజలు తమ హక్కులను తెలుసుకుని, అవసరమైన సమయంలో చట్టపరమైన సహాయం పొందేలా అధికారులు అవగాహన కార్యక్రమాలు చేపట్టాలని కోరారు.

అదేవిధంగా అఘాయిత్యాలకు గురైన బాధితులకు ప్రభుత్వం ద్వారా అందాల్సిన నష్టపరిహారం, ఇతర సహాయాన్ని నిర్ణీత సమయంలో అందేలా సంబంధిత అధికారులు చర్యలు తీసుకోవాలని తెలిపారు. బాధితులకు న్యాయం అందించడంలో అధికార యంత్రాంగం సమన్వయంతో పనిచేయాల్సిన అవసరం ఉందన్నారు.

గ్రామస్థాయి వరకు అవగాహన కార్యక్రమాలు

మహనీయుల చిత్రాలతో కూడిన బ్యానర్లు ఏర్పాటు చేసి, ప్రజలకు స్ఫూర్తినిచ్చే విధంగా అవగాహన కార్యక్రమాలు నిర్వహించాలని డీవీఎంసీ సభ్యులు కోరారు. చట్టంపై ప్రజల్లో నమ్మకం పెంపొందించడం, తమ హక్కులపై అవగాహన కల్పించడం, వివక్షకు తావులేని సమాజ నిర్మాణానికి కృషి చేయడం కార్యక్రమాల ప్రధాన ఉద్దేశంగా ఉండాలని పేర్కొన్నారు.

జిల్లాలోని అన్ని మండలాల్లో షెడ్యూల్ ప్రకారం గ్రామ, మండల స్థాయిలోని అన్ని శాఖల అధికారులు పరస్పర సమన్వయంతో సివిల్ రైట్స్ డే కార్యక్రమాలను నిర్వహించి విజయవంతం చేయాలని డీవీఎంసీ సభ్యులు విజ్ఞప్తి చేశారు.

డీవీఎంసీ సభ్యులు:ఆరెల్లి మల్లేష్, ఆయిండ్ల శశికాంత్, మెస్రం జంగు బాపూ, లక్ష్మీకాంత్, శ్యామల, ఉషారాణి, తోట విజయ తదితరులు, పాల్గొన్నారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్‌చార్జి.

జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.