71 ఏళ్ల పనస రాములమ్మ నేత్రాలు దానం చేసిన కుటుంబ సభ్యులు

మానవీయత సేవా సంస్థ, రెడ్ క్రాస్ సహకారంతో నేత్రాల సేకరణ

మన భారత్, విజయనగరం: విజయనగరం జిల్లా రావివలస గ్రామానికి చెందిన పనస రాములమ్మ (71) వృద్ధాప్య సమస్యలు, గత కొన్ని రోజులుగా కొనసాగిన తీవ్రమైన ఎండల ప్రభావంతో అనారోగ్యానికి గురై మృతి చెందారు. ఆమె మరణానంతరం కుటుంబ సభ్యులు తీసుకున్న గొప్ప నిర్ణయం ద్వారా ఇద్దరు దృష్టి లోపం ఉన్న వారికి వెలుగు అందే అవకాశం లభించింది.

మృతురాలి మనవళ్లు ఇడ దాసు శ్రీను, పనస రవి నేత్రదానం చేయాలనే సంకల్పంతో మానవీయత స్వచ్ఛంద సేవా సంస్థ అధ్యక్షుడు గోవిందరాజులుకు సమాచారం అందించారు. వెంటనే స్పందించిన ఆయన, విజయనగరం రెడ్ క్రాస్ టెక్నీషియన్ రమణ సహకారంతో మృతురాలి నేత్రాలను సేకరించే ఏర్పాట్లు చేశారు.

సేకరించిన నేత్రాలను ఎల్వీ ప్రసాద్ కంటి ఆసుపత్రి, విశాఖపట్నంకు పంపించారు. ఈ నేత్రాల ద్వారా ఇద్దరు అంధులకు చూపు కలిగే అవకాశం ఉందని నిర్వాహకులు తెలిపారు.

ఈ సందర్భంగా గ్రామ పెద్దలు మాట్లాడుతూ, దుఃఖ సమయంలో కూడా సమాజానికి ఉపయోగపడేలా నేత్రదానం చేయడం ఎంతో గొప్ప సేవ అని కొనియాడారు. నేత్రదానం ద్వారా మరణానంతరం కూడా మనిషి మరొకరికి వెలుగు పంచగలడని పేర్కొన్నారు.

నేత్రదానం చేసిన కుటుంబ సభ్యులను అభినందిస్తూ విజయనగరం రెడ్ క్రాస్ ప్రతినిధుల తరఫున నేత్రదాన ధ్రువీకరణ పత్రాన్ని ఇడ దాసు శ్రీను, పనస రవిలకు అందజేశారు. ఈ సందర్భంగా మానవీయత స్వచ్ఛంద సేవా సంస్థ అధ్యక్షుడు గోవిందరాజులు, గుడివాడ నారాయణమూర్తి నాయుడు, రెడ్ క్రాస్ ప్రతినిధులు నేత్రదానం ప్రాముఖ్యతపై అవగాహన కల్పించారు.

ఈ కార్యక్రమంలో రావివలస మాజీ సర్పంచ్, గ్రామ పెద్దలు, పైలిపేట గ్రామ ప్రముఖులు, బంధువులు మరియు పలువురు గ్రామస్తులు పాల్గొని మృతురాలికి నివాళులర్పించారు.

నేత్రదానం వంటి మహోన్నత కార్యక్రమాల ద్వారా మరెందరో జీవితాల్లో వెలుగులు నింపవచ్చని, ప్రతి ఒక్కరూ అవయవదానం, నేత్రదానం పట్ల అవగాహన పెంచుకోవాలని నిర్వాహకులు పిలుపునిచ్చారు.

📲 మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్‌పై క్లిక్ చేయండి.