మన భారత్, హైదరాబాద్:
ఆగ్నేయ బంగాళాఖాతం మరియు దక్షిణ అండమాన్ నికోబార్ దీవుల పరిసర ప్రాంతాల్లోకి నైరుతి రుతుపవనాలు ప్రవేశించినప్పటికీ, తెలంగాణ మరియు ఆంధ్రప్రదేశ్ రాష్ట్రాల్లో రానున్న వారం రోజుల పాటు తీవ్ర ఎండలు, వడగాల్పులు కొనసాగనున్నట్లు వాతావరణ నిపుణులు హెచ్చరిస్తున్నారు. మే 19వ తేదీ నుండి 25వ తేదీ వరకు రెండు తెలుగు రాష్ట్రాల్లో అధిక వేడిమి, పొడి వాతావరణ పరిస్థితులు నెలకొనే అవకాశముందని తెలిపారు.
ఈ వేసవి సీజన్లో ఇప్పటివరకు రెండు తెలుగు రాష్ట్రాల్లో సాధారణం కంటే తక్కువ వర్షపాతం నమోదైంది. ముఖ్యంగా తెలంగాణ జిల్లాల్లో వర్షాలు అస్తవ్యస్తంగా కురవడం వల్ల తీవ్ర పొడి వాతావరణ పరిస్థితులు ఏర్పడ్డాయి. ఇలాంటి పరిస్థితులు గత కొన్నేళ్లలో చాలా అరుదుగా నమోదయ్యాయని వాతావరణ నిపుణులు పేర్కొంటున్నారు.
పసిఫిక్ మహాసముద్రంలో ఇప్పటికే ప్రభావం చూపుతున్న ఎల్నినో (El Nino) పరిస్థితుల కారణంగా ఈ ఏడాది వర్షాకాలంలో కూడా ప్రభావం కనిపించే అవకాశముందని అంచనా వేస్తున్నారు. ముఖ్యంగా తెలంగాణ రాష్ట్రంలోని పశ్చిమ, ఉత్తర, ఈశాన్య, మధ్య ప్రాంతాల్లో, హైదరాబాద్ సహా పలు జిల్లాల్లో వర్షాభావ పరిస్థితులు నెలకొనే సూచనలు ఉన్నాయని నిపుణులు హెచ్చరిస్తున్నారు.
మే 19 నుండి 25 వరకు రెండు రాష్ట్రాల్లోని చాలా ప్రాంతాల్లో పూర్తిగా పొడి వాతావరణం కొనసాగుతుందని, పగటి ఉష్ణోగ్రతలు 42 నుండి 45 డిగ్రీల సెల్సియస్ వరకు నమోదయ్యే అవకాశం ఉందని తెలిపారు. ముఖ్యంగా సింగరేణి పరిసర ప్రాంతాల్లో కొన్నిచోట్ల 45 డిగ్రీలకు పైగా ఉష్ణోగ్రతలు నమోదయ్యే అవకాశముందని పేర్కొన్నారు.
ఈ నేపథ్యంలో ప్రజలు అత్యవసర పనులు తప్ప మధ్యాహ్న సమయంలో బయటకు వెళ్లకూడదని సూచిస్తున్నారు. వడదెబ్బ ప్రమాదం ఎక్కువగా ఉండే అవకాశం ఉన్నందున తగిన జాగ్రత్తలు తీసుకోవాలని వైద్య నిపుణులు సూచిస్తున్నారు. ముఖ్యంగా చిన్నపిల్లలు, వృద్ధులు, గర్భిణీలు, బయట పనులు చేసే కార్మికులు అప్రమత్తంగా ఉండాలని హెచ్చరిస్తున్నారు. తరచుగా నీరు, మజ్జిగ, పండ్ల రసాలు తీసుకోవడం, తేలికపాటి దుస్తులు ధరించడం, తలపై గుడ్డ కట్టుకోవడం వంటి జాగ్రత్తలు పాటించాలని సూచించారు.
ఇదిలా ఉండగా భారత వాతావరణ శాఖ సమాచారం ప్రకారం మే 26వ తేదీ నాటికి కేరళలోకి నైరుతి రుతుపవనాలు ప్రవేశించే అవకాశాలు ఉన్నాయని వెల్లడించింది. సాధారణంగా కంటే కొద్దిగా ఆలస్యంగా రుతుపవనాలు కేరళ తీరాన్ని తాకే అవకాశముందని వాతావరణ శాఖ అంచనా వేస్తోంది.
రాబోయే రోజుల్లో వాతావరణ పరిస్థితులను దృష్టిలో ఉంచుకుని ప్రజలు అప్రమత్తంగా ఉండాలని అధికారులు సూచిస్తున్నారు.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..
