కాగ్ నివేదిక కళ్యాణ లక్ష్మి లో ₹55 కోట్ల అవకతవకలు..

మన భారత్, తెలంగాణ:

తెలంగాణ ప్రభుత్వ ప్రతిష్టాత్మక సంక్షేమ పథకం ‘కళ్యాణ లక్ష్మి/షాదీ ముబారక్’ అమలులో తీవ్రమైన లోపాలు, అవకతవకలు చోటుచేసుకున్నట్లు కంప్ట్రోలర్ అండ్ ఆడిటర్ జనరల్ (CAG) తాజా నివేదికలో వెల్లడించింది. పేద కుటుంబాల ఆడపిల్లల వివాహాల కోసం ఆర్థిక సహాయం అందించేందుకు రూపొందించిన ఈ పథకంలో పారదర్శకత లోపాలు, బలహీన ధృవీకరణ వ్యవస్థలు కారణంగా భారీ స్థాయిలో నిధుల దుర్వినియోగం జరిగినట్లు గుర్తించారు.

2014లో ప్రారంభమైన ఈ పథకం ద్వారా అర్హులైన వధువులకు రూ.1,00,116 ఆర్థిక సాయం అందిస్తున్నారు. అయితే అర్హతా నిబంధనలను పాటించకుండా మైనర్ వధువులు, అధిక ఆదాయం గల కుటుంబాలు, ఇప్పటికే వివాహం జరిగిన కేసుల్లోనూ నిధులు మంజూరు చేసినట్లు ఆడిట్‌లో బయటపడింది.

మొత్తం 5,522 కేసులను పరిశీలించిన కాగ్, దాదాపు ₹55.12 కోట్ల నిధులు అనర్హులైన లబ్ధిదారులకు వెళ్లినట్లు గుర్తించింది. ఇది వ్యవస్థలో ఉన్న లోపాలను స్పష్టంగా చూపిస్తోందని నిపుణులు అంటున్నారు. పలు సంక్షేమ పథకాల డేటాలో వ్యత్యాసాలు, తారుమారు, సరైన పర్యవేక్షణ లేకపోవడం వంటి సమస్యలు కూడా ఈ నివేదికలో వెల్లడయ్యాయి.

ప్రధానంగా సమగ్ర ధృవీకరణ వ్యవస్థలు లేకపోవడం వల్ల నకిలీ దరఖాస్తులు, మోసపూరిత క్లెయిమ్‌లు సులభంగా ఆమోదం పొందినట్లు కాగ్ పేర్కొంది. ప్రభుత్వ డేటాబేస్‌ల మధ్య సరైన సమన్వయం లేకపోవడం వల్ల కొంతమంది ఒకేసారి పలు పథకాల ప్రయోజనాలు పొందినట్లు కూడా గుర్తించారు.

ఇక ప్రత్యక్ష ప్రయోజన బదిలీ (DBT) వ్యవస్థ బలహీనంగా ఉండటం, చెక్కుల ద్వారా నిధుల పంపిణీ జరగడం వల్ల జాప్యాలు, అక్రమాలకు అవకాశం పెరిగిందని నివేదిక పేర్కొంది. అలాగే ఫిర్యాదుల పరిష్కార వ్యవస్థ సరిగా లేకపోవడం వల్ల లబ్ధిదారులు కార్యాలయాల చుట్టూ తిరగాల్సి వస్తోందని ఆందోళన వ్యక్తమైంది.

ఈ పరిస్థితులపై స్పందించిన కాగ్, పథకాన్ని మరింత పారదర్శకంగా, సమర్థవంతంగా అమలు చేయాలంటే డిజిటలైజేషన్, కఠినమైన ధృవీకరణ విధానాలు, విభాగాల మధ్య సమన్వయం, రియల్ టైమ్ డేటా సమీకరణ అవసరమని సూచించింది. అర్హులైన లబ్ధిదారులకు మాత్రమే ప్రయోజనాలు చేరేలా చర్యలు తీసుకోవాలని స్పష్టం చేసింది.

పథకం లక్ష్యం పేద కుటుంబాలకు ఆర్థిక భారం తగ్గించడం, బాల్య వివాహాలను నిరోధించడం అయినప్పటికీ, ప్రస్తుతం బయటపడిన లోపాలు దాని విశ్వసనీయతపై ప్రశ్నలు తలెత్తిస్తున్నాయి. ప్రభుత్వం తక్షణమే సవరణ చర్యలు తీసుకోవాలని ప్రజలు, నిపుణులు సూచిస్తున్నారు.

మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి .