గ్యాస్ బుకింగ్ పేరుతో కొత్త సైబర్ మోసం..

మన భారత్ న్యూఢిల్లీ:

దేశవ్యాప్తంగా ఎల్పీజీ గ్యాస్ వినియోగదారులను లక్ష్యంగా చేసుకుని కొత్త తరహా సైబర్ మోసాలు పెరుగుతున్నాయని కేంద్ర ప్రభుత్వం హెచ్చరించింది. ముఖ్యంగా ‘GAS BILL UPDATE APK’ వంటి హానికరమైన ఫైల్స్‌ను వాట్సాప్ ద్వారా పంపిస్తూ వినియోగదారులను మోసం చేసే ప్రయత్నాలు జరుగుతున్నట్లు వెల్లడించింది. ఈ నేపథ్యంలో ప్రజలు అత్యంత అప్రమత్తంగా ఉండాలని సూచించింది.

అధికారుల ప్రకారం, ఈ APK ఫైల్స్‌ను డౌన్‌లోడ్ చేసి ఇన్‌స్టాల్ చేస్తే మొబైల్‌లోని వ్యక్తిగత సమాచారం, బ్యాంకు ఖాతా వివరాలు, OTPలు సైబర్ నేరగాళ్ల చేతికి చేరే ప్రమాదం ఉంది. దీంతో వినియోగదారులు తీవ్రమైన ఆర్థిక నష్టాలను ఎదుర్కొనే అవకాశం ఉందని స్పష్టం చేశారు. కాబట్టి అనుమానాస్పద లింకులు, ఫైల్స్‌ను ఎట్టి పరిస్థితుల్లోనూ ఓపెన్ చేయకూడదని సూచించారు.

గ్యాస్ బుకింగ్ కోసం కేవలం అధికారిక యాప్స్, వెబ్‌సైట్లు లేదా గుర్తింపు పొందిన డీలర్ల సేవలను మాత్రమే వినియోగించాలని కేంద్రం ప్రజలకు విజ్ఞప్తి చేసింది. వాట్సాప్, SMS లేదా సోషల్ మీడియా ద్వారా వచ్చే అనధికారిక సందేశాలను నమ్మవద్దని హెచ్చరించింది.

మరోవైపు, దేశంలో ఎల్పీజీ సరఫరాకు ఎలాంటి అంతరాయం లేదని కేంద్రం స్పష్టం చేసింది. గ్యాస్ కొరతపై వస్తున్న వదంతులను నమ్మవద్దని ప్రజలకు సూచించింది. అవసరానికి మించి సిలిండర్లు బుక్ చేయడం వల్ల అనవసర ఒత్తిడి ఏర్పడుతుందని పేర్కొంది.

గ్యాస్ సరఫరా వ్యవస్థను మరింత పటిష్టం చేసేందుకు రాష్ట్రాలు, కేంద్రపాలిత ప్రాంతాలకు మార్గదర్శకాలు జారీ చేసింది. పట్టణ ప్రాంతాల్లో 25 రోజులకు, గ్రామీణ ప్రాంతాల్లో 45 రోజులకు ఒకసారి గ్యాస్ బుకింగ్ చేసుకునేలా వ్యవస్థను సవరించింది.

ఇంధన వినియోగంపై ఒత్తిడి తగ్గించేందుకు కిరోసిన్, బొగ్గు వంటి ప్రత్యామ్నాయాలను అందుబాటులో ఉంచినట్లు తెలిపింది. అలాగే, పీఎన్‌జీ (పిప్డ్ నేచురల్ గ్యాస్) కనెక్షన్లను ప్రోత్సహించాలని రాష్ట్రాలకు సూచించింది.

మొత్తంగా గ్యాస్ సరఫరా విషయంలో ఎలాంటి ఆందోళన అవసరం లేదని భరోసా ఇస్తూనే, సైబర్ మోసాల పట్ల అప్రమత్తంగా ఉండటం అత్యంత ముఖ్యమని కేంద్ర ప్రభుత్వం మరోసారి స్పష్టం చేసింది.