మే 12న టీజీ ఎడ్‌సెట్‌–2026 పరీక్ష..

దరఖాస్తులకు గడువు ఏప్రిల్‌ 15 వరకు – మే 30న ఫలితాలు

మన భారత్, తెలంగాణ

రాష్ట్రంలో బీఎడ్ ప్రవేశాల కోసం నిర్వహించే టీజీ ఎడ్‌సెట్‌–2026 పరీక్ష షెడ్యూల్‌ను అధికారులు ప్రకటించారు. ఎడ్‌సెట్ ఛైర్మన్‌, Kakatiya University వీసీ ఆచార్య ప్రతాప్‌రెడ్డి, కన్వీనర్ ఆచార్య వెంకట్రాంరెడ్డి వివరాలు వెల్లడించారు. వరంగల్‌లోని వర్సిటీ కామర్స్ విభాగ సెమినార్ హాలులో నిర్వహించిన సమావేశంలో పరీక్ష తేదీలు, దరఖాస్తు గడువులను తెలియజేశారు.

దరఖాస్తుల స్వీకరణ ప్రారంభం..

సోమవారం నుంచి ఆన్‌లైన్ దరఖాస్తుల స్వీకరణ ప్రారంభమైంది. ఏప్రిల్‌ 15ను సాధారణ గడువుగా నిర్ణయించారు.

* రూ.250 అపరాధ రుసుముతో ఏప్రిల్‌ 22 వరకు

* రూ.1,000 అపరాధ రుసుముతో ఏప్రిల్‌ 30 వరకు

* రూ.5,000 ప్రత్యేక అపరాధ రుసుముతో మే 8, 9 తేదీల్లో దరఖాస్తులకు అవకాశం కల్పించారు.

పరీక్ష, కీ, ఫలితాల తేదీలు..

మే 12న రెండు సెషన్లలో టీజీ ఎడ్‌సెట్ పరీక్ష నిర్వహించనున్నారు. మే 15న ప్రాథమిక ఆన్సర్ కీ విడుదల చేసి, మే 17 వరకు అభ్యంతరాలను స్వీకరిస్తారు. తుది ఫలితాలను మే 30న ప్రకటించనున్నట్లు అధికారులు తెలిపారు.

పరీక్షకు సంబంధించిన పూర్తి సమాచారం, సిలబస్, హాల్ టికెట్ డౌన్‌లోడ్ తదితర వివరాల కోసం అధికారిక టీజీ ఎడ్‌సెట్–2026 వెబ్‌సైట్‌ను సందర్శించాలని సూచించారు.

రాష్ట్రవ్యాప్తంగా బీఎడ్ కోర్సుల్లో ప్రవేశాల కోసం టీజీ ఎడ్‌సెట్ కీలక పరీక్షగా భావించబడుతోంది. అభ్యర్థులు గడువులను దృష్టిలో ఉంచుకుని సమయానికి దరఖాస్తు చేసుకోవాలని అధికారులు సూచించారు.