మన భారత్, తెలంగాణ:

ఇంటర్మీడియట్ వార్షిక పరీక్షలకు హాజరయ్యే విద్యార్థులకు హాల్ టికెట్లను సులభంగా అందుబాటులోకి తీసుకువచ్చినట్లు Telangana State Board of Intermediate Education వెల్లడించింది. హాల్ టికెట్ డౌన్‌లోడ్ లింకులను విద్యార్థుల తల్లిదండ్రుల వాట్సాప్ నంబర్లకు పంపినట్లు బోర్డు పేర్కొంది.

అధికారిక వెబ్‌సైట్ tgbie.cgg.gov.in సర్వర్లు బిజీగా ఉన్న సందర్భాల్లో ప్రత్యామ్నాయంగా వాట్సాప్ ద్వారా పంపిన లింక్‌ను ఉపయోగించి హాల్ టికెట్ డౌన్‌లోడ్ చేసుకోవచ్చని సూచించారు. సాంకేతిక సమస్యలు ఎదురైతే సంబంధిత కాలేజీ ప్రిన్సిపల్‌ను సంప్రదించాలని బోర్డు స్పష్టం చేసింది.

హాల్ టికెట్‌పై ముద్రించిన QR కోడ్‌ను స్కాన్ చేస్తే పరీక్షా కేంద్రం లొకేషన్ వివరాలు ప్రత్యక్షంగా మొబైల్‌లో కనిపిస్తాయని తెలిపారు. దీంతో విద్యార్థులు పరీక్షా కేంద్రాన్ని సులభంగా గుర్తించవచ్చని అధికారులు పేర్కొన్నారు.

ఇంటర్మీడియట్ వార్షిక పరీక్షలు ఈ నెల 25వ తేదీ నుంచి ప్రారంభం కానున్నాయి. విద్యార్థులు ముందుగానే హాల్ టికెట్ డౌన్‌లోడ్ చేసుకొని వివరాలు పరిశీలించుకోవాలని బోర్డు సూచించింది.