19న పుట్టపర్తికి ప్రధాని మోదీ రాక..

సత్యసాయిబాబా శత జయంతి ఉత్సవాలకు ఘన ఏర్పాట్లు – సీఎం చంద్రబాబు సమీక్ష

మన భారత్, అమరావతి: సత్యసాయిబాబా శతజయంతి ఉత్సవాల సందర్భంగా ఈ నెల 19న ప్రధాని నరేంద్ర మోదీ పుట్టపర్తిని సందర్శించనున్నారు. ఈ విషయం రాష్ట్ర ముఖ్యమంత్రి చంద్రబాబు నాయుడు వెల్లడించారు. ఆయన తెలిపిన వివరాల ప్రకారం, సత్యసాయి సేవా సంస్థ ఆధ్వర్యంలో జరుగుతున్న ఈ ఉత్సవాలు ప్రపంచవ్యాప్తంగా భక్తులను ఆకర్షించనున్నాయి.

సీఎం చంద్రబాబు, ఉత్సవాల ఏర్పాట్లపై ఉన్నతస్థాయి సమీక్ష నిర్వహించారు. రాష్ట్రపతి ద్రౌపదీ ముర్ము కూడా ఈ నెల 22న పుట్టపర్తికి రానున్నారని వెల్లడించారు. ఈ సందర్భంగా భద్రతా, వసతి, రవాణా, ప్రజా సౌకర్యాల ఏర్పాట్లను సమగ్రంగా పర్యవేక్షించాలని మంత్రుల కమిటీకి ఆయన సూచించారు.

రైల్వే శాఖ సమాచారం ప్రకారం, భక్తుల రాకపోకల దృష్ట్యా ప్రత్యేక రైళ్లను నడపనున్నారు. ఈ నెల 13నుంచి డిసెంబర్ 1 వరకు మొత్తం 682 రైళ్లు, అందులో 65 ప్రత్యేక రైళ్లు పుట్టపర్తికి నడుస్తాయని అధికారులు తెలిపారు. భక్తుల సౌకర్యార్థం అదనపు బస్ సర్వీసులు, తాత్కాలిక క్యాంపులు ఏర్పాటు చేయనున్నారు.

పుట్టపర్తిలో ప్రధాన రహదారులు, ఆధ్యాత్మిక కేంద్రాలు, సాయికుల్వంత్ హాల్ పరిసరాల్లో భద్రతా ఏర్పాట్లు కట్టుదిట్టంగా చేస్తున్నట్లు పోలీసులు వెల్లడించారు.