44 ద్విచక్ర వాహనాలు స్వాధీనం..

8 మంది అరెస్ట్.. మరో 20 మంది కొనుగోలుదారులపై పోలీసుల దృష్టి

మన భారత్, ఆగస్టు 12, ఆదిలాబాద్: ఉమ్మడి ఆదిలాబాద్ జిల్లాతో పాటు మహారాష్ట్ర సరిహద్దు ప్రాంతాల్లో వరుసగా ద్విచక్ర వాహనాల చోరీలకు పాల్పడుతున్న అంతర్రాష్ట్ర ముఠా గుట్టును ఆదిలాబాద్ జిల్లా పోలీసులు రట్టు చేశారు. సాంకేతిక ఆధారాలు, సీసీటీవీ ఫుటేజీలు, విశ్వసనీయ సమాచారంతో దర్యాప్తు చేపట్టిన పోలీసులు ఐదుగురు బైక్ దొంగలను, దొంగిలించిన వాహనాలను కొనుగోలు చేసిన ముగ్గురిని అరెస్టు చేశారు. నిందితుల నుంచి 44 ద్విచక్ర వాహనాలను స్వాధీనం చేసుకున్నారు.

ఈ కేసు వివరాలను జిల్లా ఎస్పీ అఖిల్ మహాజన్, ఐపీఎస్ బుధవారం ఆదిలాబాద్ పోలీస్ హెడ్‌క్వార్టర్స్ సమావేశ మందిరంలో ఏర్పాటు చేసిన మీడియా సమావేశంలో వెల్లడించారు.

ఇచ్చోడలో ఫిర్యాదుతో దర్యాప్తు ప్రారంభం

ఇచ్చోడ పోలీస్ స్టేషన్ పరిధిలో ద్విచక్ర వాహనాల చోరీలపై ప్రత్యేక దృష్టి సారించిన పోలీసులు దర్యాప్తును ముమ్మరం చేశారు. ఈ క్రమంలో శుభాష్‌నగర్ కాలనీకి చెందిన ధరాడే బాలాజీ తన ఇంటి ఆవరణలో పార్క్ చేసిన మోటార్‌సైకిల్ ఆగస్టు 5 రాత్రి చోరీకి గురైనట్లు ఆగస్టు 6న ఇచ్చోడ పోలీస్ స్టేషన్‌లో ఫిర్యాదు చేశారు.

కేసు నమోదు చేసిన పోలీసులు సీసీటీవీ కెమెరాల ఫుటేజీ, సాంకేతిక ఆధారాలు, ఇతర సమాచారాన్ని విశ్లేషించారు. దర్యాప్తులో అనుమానితుల కదలికలను గుర్తించి అదుపులోకి తీసుకుని విచారించగా కీలక విషయాలు వెలుగులోకి వచ్చినట్లు ఎస్పీ తెలిపారు.

జిల్లాలు దాటి బైక్‌ల చోరీ

పోలీసుల విచారణలో నిందితులు ఒక ముఠాగా ఏర్పడి అక్రమంగా డబ్బు సంపాదించేందుకు ద్విచక్ర వాహనాలను చోరీ చేస్తున్నట్లు వెల్లడైనట్లు పోలీసులు తెలిపారు. ఇచ్చోడ, ఆదిలాబాద్, నిర్మల్, నిజామాబాద్ జిల్లాలతో పాటు మహారాష్ట్ర పరిసర ప్రాంతాల్లోనూ బైక్‌లను చోరీ చేసినట్లు విచారణలో వెల్లడైంది.

చోరీ చేసిన వాహనాల గుర్తింపు వివరాలను మార్చేందుకు నంబర్ ప్లేట్లను మార్చి, అనంతరం వాటిని ఇతరులకు విక్రయించినట్లు పోలీసులు గుర్తించారు. నిందితులు ఇచ్చిన సమాచారంతో ఇప్పటివరకు 44 ద్విచక్ర వాహనాలను పోలీసులు స్వాధీనం చేసుకున్నారు.

ఐదుగురు ప్రధాన నిందితులు అరెస్ట్

పోలీసులు అరెస్టు చేసిన ప్రధాన నిందితులుగా మారంపెళ్లి అనిల్ (21), షేక్ షబ్బీర్ (39), షేక్ ముస్తాషాహిద్ (36), మహమ్మద్ జాకీర్ (55), మహమ్మద్ షఫీ (37)లను గుర్తించారు. వీరంతా ఇచ్చోడ పరిసర ప్రాంతాలకు చెందినవారిగా పోలీసులు వెల్లడించారు.

దొంగ బైక్‌లు కొనుగోలు చేసిన వారిపైనా కేసులు

చోరీ చేసిన ద్విచక్ర వాహనాలను కొనుగోలు చేసిన వారిపైనా పోలీసులు చర్యలు చేపట్టారు. కేశవపట్నం, గుండాల ప్రాంతాలకు చెందిన ముజాహిద్, ఇక్బాల్, కరీంలను అరెస్టు చేసినట్లు తెలిపారు.

మొత్తంగా ఐదుగురు బైక్ దొంగలు, వాహనాలను కొనుగోలు చేసిన ముగ్గురిని అరెస్టు చేయగా, మరికొందరు కొనుగోలుదారులపై కేసులు నమోదు చేసి దర్యాప్తు కొనసాగిస్తున్నట్లు పోలీసులు తెలిపారు. మరో 20 మంది వరకు దొంగిలించిన వాహనాలను కొనుగోలు చేసిన వారి వివరాలను పోలీసులు సేకరిస్తున్నట్లు వెల్లడించారు.

అసలు వాహన యజమానుల గుర్తింపు

స్వాధీనం చేసుకున్న 44 ద్విచక్ర వాహనాలకు సంబంధించిన అసలు యజమానులను గుర్తించే ప్రక్రియ కొనసాగుతోందని పోలీసులు తెలిపారు. గతంలో నమోదైన ఇతర బైక్ చోరీ కేసులతోనూ ఈ ముఠాకు సంబంధాలు ఉన్నాయా అనే కోణంలో దర్యాప్తు చేస్తున్నట్లు వెల్లడించారు.

వాహన యజమానులకు ఎస్పీ సూచనలు

ద్విచక్ర వాహనాల యజమానులు అప్రమత్తంగా ఉండాలని ఎస్పీ అఖిల్ మహాజన్ సూచించారు. వాహనాలను సురక్షిత ప్రదేశాల్లో పార్క్ చేయడంతో పాటు తప్పనిసరిగా తాళాలు వేయాలని తెలిపారు. వీలైనంత వరకు సీసీటీవీ కెమెరాల నిఘా ఉన్న ప్రాంతాల్లోనే వాహనాలను నిలిపి ఉంచాలని సూచించారు. అనుమానాస్పద వ్యక్తులు లేదా కార్యకలాపాలు కనిపించిన వెంటనే పోలీసులకు సమాచారం అందించాలని కోరారు.

సాంకేతిక ఆధారాలను ఉపయోగించి అంతర్రాష్ట్ర బైక్ దొంగతనాల ముఠాను గుర్తించి, భారీగా ద్విచక్ర వాహనాలను రికవరీ చేయడంలో కీలకంగా వ్యవహరించిన ఇచ్చోడ పోలీసులను ఎస్పీ అభినందించారు.

ఈ మీడియా సమావేశంలో ఉట్నూర్ ఏఎస్పీ రుత్విక్ సాయి కొట్టే, ఐపీఎస్, ఇచ్చోడ ఎస్‌హెచ్‌ఓ కె. నరేష్ కుమార్, సీసీఎస్ ఇన్‌స్పెక్టర్ చంద్రశేఖర్, పోలీసు సిబ్బంది పాల్గొన్నారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి

ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.