కొమురం భీమ్ చిత్రపటానికి పూలమాల వేసి నివాళులు..

సంప్రదాయ వాయిద్యాలతో ఆదివాసీ సంబరాలు

మన భారత్, తలమడుగు | ఆగస్టు 9, 

తలమడుగు మండలంలోని దేహేగాం గ్రామంలో ప్రపంచ ఆదివాసీ దినోత్సవాన్ని గ్రామస్థులు ఘనంగా నిర్వహించారు. గ్రామంలోని ఆదివాసీ ప్రజలు పెద్ద సంఖ్యలో ఒకచోట చేరి సంప్రదాయబద్ధంగా వేడుకలు నిర్వహించారు. ఆదివాసీ ఆచార సంప్రదాయాలకు అనుగుణంగా డప్పు, డోలు వాయిద్యాలతో గ్రామంలో సందడి నెలకొంది.

ఈ సందర్భంగా గ్రామంలోని ఆదివాసీ జెండాగద్దె వద్ద కొమురం భీమ్ చిత్రపటానికి ప్రత్యేక పూజలు నిర్వహించి, పూలమాలలు వేసి ఘనంగా నివాళులు అర్పించారు. అనంతరం గ్రామస్థులకు స్వీట్లు పంపిణీ చేసి ప్రపంచ ఆదివాసీ దినోత్సవ శుభాకాంక్షలు తెలియజేశారు.

ప్రకృతి పరిరక్షణలో ఆదివాసీల పాత్ర కీలకం

ఈ సందర్భంగా ఆదివాసీ సంక్షేమ పరిషత్ మండల సంయుక్త కార్యదర్శి ఆత్రం అంకుష్ మాట్లాడుతూ.. భారతదేశానికి ఆదివాసీలు మూలవాసులుగా ప్రకృతితో మమేకమై జీవిస్తున్నారని అన్నారు. తరతరాలుగా అడవులు, నదులు, చెట్లు, గుట్టలను ప్రకృతి సంపదగా భావిస్తూ వాటిని సంరక్షిస్తున్నారని తెలిపారు.

ఆదివాసీ సమాజం ప్రకృతిని కేవలం జీవనాధారంగా కాకుండా దైవంగా భావిస్తూ గౌరవిస్తుందని పేర్కొన్నారు. అడవులు, ప్రకృతి వనరుల పరిరక్షణలో ఆదివాసీల పాత్ర ఎంతో కీలకమని అన్నారు. నేటికీ అనేక ప్రాంతాల్లో ఆదివాసీలు అడవులను కాపాడుతూ ప్రకృతి సమతుల్యతను పరిరక్షించేందుకు తమ వంతు కృషి చేస్తున్నారని తెలిపారు.

ఆదివాసీ సంస్కృతి, సంప్రదాయాలను కాపాడాలి

ఆదివాసీ సంస్కృతి, సంప్రదాయాలు, ఆచారాలు, భాషలు, కళారూపాలను భావితరాలకు అందించాల్సిన బాధ్యత ప్రతి ఒక్కరిపై ఉందన్నారు. యువత తమ మూలాలను, సంస్కృతిని తెలుసుకుని ముందుకు సాగాలని సూచించారు. ఆదివాసీ హక్కులు, ఆత్మగౌరవం, సంక్షేమం కోసం ఐక్యంగా కృషి చేయాలని పిలుపునిచ్చారు.

ప్రపంచ ఆదివాసీ దినోత్సవం సందర్భంగా గ్రామంలో నిర్వహించిన కార్యక్రమం ఆదివాసీ ఐక్యతను చాటిచెప్పింది. సంప్రదాయ వాయిద్యాలతో నిర్వహించిన కార్యక్రమంలో చిన్నారులు, యువత, మహిళలు, గ్రామ పెద్దలు ఉత్సాహంగా పాల్గొన్నారు.

ఈ కార్యక్రమంలో గ్రామ పటేల్ అడా నాగోరావు, మహాజన్ పెందుర్ కృష్ణ, దేవరి ఆత్రం గణపతి, గటియల్ దుర్వ సూర్యబాన్, గ్రామ సర్పంచ్ సావిత్రిబాయి మనోహర్, గ్రామ పెద్దలు నైతం సురేందర్, సోయం సుభాష్, కేశవ్, పంద్ర అనిల్ తదితరులు పాల్గొన్నారు.

గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి

మీ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి