మన భారత్ | సినిమా డెస్క్
‘రామ్ చరణ్ నటనపై ప్రశంసల వర్షం
బాడీ లాంగ్వేజ్, ఎమోషనల్ సన్నివేశాల్లో రామ్ చరణ్ అదరగొట్టాడంటున్న ప్రేక్షకులు
హైదరాబాద్, జూన్ 3 (మన భారత్):
గ్లోబల్ స్టార్ రామ్ చరణ్ హీరోగా, దర్శకుడు బుచ్చిబాబు సానా తెరకెక్కించిన భారీ పాన్ ఇండియా చిత్రం ‘పెద్ది’ ప్రీమియర్ షోలు ప్రారంభమైన నేపథ్యంలో సోషల్ మీడియాలో ప్రేక్షకుల నుంచి తొలి స్పందనలు వెల్లువెత్తుతున్నాయి. సినిమా చూసిన అభిమానులు, సినీ ప్రేక్షకులు రామ్ చరణ్ నటనపై ప్రశంసలు కురిపిస్తున్నారు.
సినిమాలో రామ్ చరణ్ తన పాత్ర కోసం చూపించిన శారీరక మార్పులు, బాడీ లాంగ్వేజ్, నటన ఎంతో ఆకట్టుకున్నాయని ప్రేక్షకులు అభిప్రాయపడుతున్నారు. ముఖ్యంగా భావోద్వేగ సన్నివేశాల్లో ఆయన ప్రదర్శన హృదయాలను తాకేలా ఉందని సోషల్ మీడియాలో పోస్టులు చేస్తున్నారు.
హీరోయిన్ జాన్వీ కపూర్ తన అందం, అభినయంతో ప్రేక్షకులను ఆకట్టుకుందని, రామ్ చరణ్తో ఆమె కెమిస్ట్రీ బాగా కుదిరిందని సినీ అభిమానులు పేర్కొంటున్నారు. సినిమాలోని పాటలు, నేపథ్య సంగీతం కథను మరింత బలపరిచాయని కామెంట్లు వినిపిస్తున్నాయి.
ఇక సీనియర్ నటుడు జగపతి బాబు పోషించిన అప్పలసూరి పాత్ర సినిమాకు ప్రత్యేక ఆకర్షణగా నిలిచిందని ప్రేక్షకులు చెబుతున్నారు. ఆయన నటన, పాత్ర రూపకల్పన మరో స్థాయిలో ఉందని ప్రశంసిస్తున్నారు.
కథలో భావోద్వేగాలకు పెద్దపీట వేయడంతో పాటు గ్రామీణ నేపథ్యం, కుటుంబ బంధాలు, సంఘర్షణలను దర్శకుడు బుచ్చిబాబు ఆకట్టుకునే విధంగా తెరపై ఆవిష్కరించారని తొలి స్పందనలు సూచిస్తున్నాయి. అయితే పూర్తి స్థాయి తీర్పు ప్రేక్షకులందరూ సినిమా చూసిన తర్వాతే స్పష్టమవుతుందని సినీ విశ్లేషకులు పేర్కొంటున్నారు.
ప్రస్తుతం సోషల్ మీడియాలో #Peddi, #RamCharan, #BuchiBabu వంటి హ్యాష్ట్యాగ్లు ట్రెండింగ్లో ఉండగా, అభిమానులు సినిమాను భారీ విజయంగా అభివర్ణిస్తున్నారు.
📲 మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్పై క్లిక్ చేయండి.
