ప్రయాణికుల భద్రతకు హైటెక్ కవచం..
ఆదిలాబాద్లో పైలట్ ప్రాజెక్ట్ ప్రారంభం
మన భారత్, ఆదిలాబాద్:
ప్రజల సురక్షిత ప్రయాణమే లక్ష్యంగా తెలంగాణ రాష్ట్ర రోడ్డు రవాణా సంస్థ (టీజీఆర్టీసీ) కీలక నిర్ణయం తీసుకుంది. ప్రయాణికుల భద్రతను మరింత బలోపేతం చేయడానికి బస్సుల్లో అత్యాధునిక సీసీ కెమెరాల నిఘా వ్యవస్థను అమలు చేస్తోంది. “బస్సులో భరోసా” పేరుతో చేపట్టిన ఈ ప్రత్యేక భద్రతా ప్రాజెక్ట్ను ఉమ్మడి ఆదిలాబాద్ జిల్లాలో పైలట్ ప్రాజెక్ట్గా ప్రారంభించడం విశేషం.
ప్రస్తుతం ఆదిలాబాద్ రీజియన్ పరిధిలో నడుస్తున్న సుమారు 175 బస్సుల్లో హైటెక్ సీసీ కెమెరాలను ఏర్పాటు చేశారు. బస్సులోని ప్రతి మూల భాగం స్పష్టంగా కనిపించేలా డ్రైవర్ క్యాబిన్, మహిళలకు కేటాయించిన సీట్లు, ఫుట్బోర్డ్ ప్రాంతం, చివరి సీటు వరకు ప్రత్యేకంగా కెమెరాలను అమర్చారు. బస్సులో ఎక్కే ప్రతి వ్యక్తి కదలికలు, ప్రయాణ సమయంలో జరిగే ప్రతి సంఘటన ఈ కెమెరాల్లో రికార్డు కానుంది.
ఈ నిఘా వ్యవస్థను ఆర్టీసీ కంట్రోల్ రూమ్కు అనుసంధానం చేయడంతో అధికారులు నిరంతరం పర్యవేక్షణ చేపడుతున్నారు. అనుమానాస్పద వ్యక్తుల కదలికలు, దొంగతనాలకు పాల్పడే ముఠాల కార్యకలాపాలను ముందుగానే గుర్తించే అవకాశం ఈ వ్యవస్థ ద్వారా కలుగుతుందని అధికారులు తెలిపారు. ప్రయాణికులకు మరింత భద్రత కల్పించడమే ఈ ప్రాజెక్ట్ ప్రధాన ఉద్దేశమని పేర్కొన్నారు.
మహిళల భద్రతకు ప్రాధాన్యం
ముఖ్యంగా మహిళా ప్రయాణికులపై వేధింపులు, చోరీలు, అనుచిత ప్రవర్తనలను అరికట్టడంలో ఈ సీసీ కెమెరాలు కీలక పాత్ర పోషించనున్నాయి. రాత్రి వేళల్లో ఒంటరిగా ప్రయాణించే మహిళలు, వృద్ధులు ఈ నిర్ణయంపై హర్షం వ్యక్తం చేస్తున్నారు. బస్సుల్లో కెమెరాల నిఘా ఉండటంతో నేరగాళ్లలో భయం పెరిగి, ప్రయాణం మరింత సురక్షితంగా మారుతుందని ప్రజలు అభిప్రాయపడుతున్నారు.
డ్రైవింగ్ ప్రమాణాల్లోనూ మెరుగుదల
సీసీ కెమెరాల ఏర్పాటు వల్ల డ్రైవర్లు, కండక్టర్లు మరింత బాధ్యతాయుతంగా వ్యవహరించే అవకాశం ఉందని టీజీఆర్టీసీ అధికారులు చెబుతున్నారు. డ్రైవింగ్ విధానంలో క్రమశిక్షణ పెరగడంతో పాటు ప్రయాణికులకు మరింత మెరుగైన సేవలు అందే అవకాశముందని పేర్కొన్నారు. ప్రయాణికుల ఫిర్యాదులను కూడా సులభంగా పరిశీలించి తక్షణ చర్యలు తీసుకునే వీలు కలుగుతుందని తెలిపారు.
రాష్ట్రవ్యాప్తంగా విస్తరణకు ప్రణాళిక
ఆదిలాబాద్ జిల్లాలో అమలు చేస్తున్న పైలట్ ప్రాజెక్ట్ విజయవంతమైతే, రాష్ట్రంలోని అన్ని డిపోల బస్సుల్లో సీసీ కెమెరాల వ్యవస్థను విస్తరించేందుకు టీజీఆర్టీసీ ప్రణాళికలు సిద్ధం చేస్తోంది. ప్రజా రవాణా వ్యవస్థలో టెక్నాలజీ వినియోగాన్ని పెంచుతూ, ప్రయాణికులకు సురక్షితమైన మరియు విశ్వసనీయమైన సేవలు అందించే దిశగా ఈ చర్యలు కీలకంగా మారనున్నాయి.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..
