మన భారత్, ఆదిలాబాద్ టౌన్:
ఆదిలాబాద్ మున్సిపాలిటీలో కోఆప్షన్ సభ్యుల ఎన్నిక ప్రక్రియ ప్రారంభమైంది. రాష్ట్ర ప్రభుత్వం ఇటీవల జారీ చేసిన ఉత్తర్వుల మేరకు నలుగురు కోఆప్షన్ సభ్యులను ఎంపిక చేసేందుకు అధికార యంత్రాంగం కసరత్తు ప్రారంభించింది.
ఈ ప్రక్రియలో భాగంగా ఇద్దరు మైనారిటీ వర్గాలకు చెందిన వారిని, అలాగే ఇప్పటికే కౌన్సిలర్లుగా సేవలందించిన ఇద్దరిని ఎంపిక చేయనున్నారు. ఈ రెండు విభాగాల్లో కనీసం ఒక మహిళ సభ్యురాలికి అవకాశం కల్పించనున్నట్లు అధికారులు తెలిపారు. దీంతో మహిళలకు ప్రాధాన్యత కల్పిస్తూ సమతుల్యతను పాటించే విధంగా ఎంపిక ప్రక్రియ కొనసాగనుంది.
అర్హత గల అభ్యర్థులు ఈ నెల 25వ తేదీ లోపు తమ పూర్తి వివరాలు, అవసరమైన పత్రాలను సమర్పించాలని మున్సిపల్ కమిషనర్ రాజు సూచించారు. నిర్దిష్ట నిబంధనల ప్రకారం పరిశీలన అనంతరం అర్హులైన వారిని ఎంపిక చేస్తామని తెలిపారు.
ఈ నిర్ణయం స్థానిక రాజకీయాల్లో ఆసక్తి రేకెత్తిస్తుండగా, కోఆప్షన్ సభ్యుల ఎంపికలో పలువురు ఆశావాహులు ముందుకు వస్తున్నట్లు సమాచారం. మున్సిపల్ పరిపాలనలో కొత్త సభ్యుల చేరికతో అభివృద్ధి కార్యక్రమాలకు మరింత వేగం అందుతుందని అధికారులు భావిస్తున్నారు.
