స్టీల్ ప్లేట్లు, గ్లాసులతో ఆదర్శంగా నిలిచిన ఉపాధ్యాయులు
మన భారత్, నారాయణపేట, జూలై 20:
పర్యావరణ పరిరక్షణపై విద్యార్థులకు బోధించే ఉపాధ్యాయులు అదే సందేశాన్ని ఆచరణలోనూ చూపిస్తూ ఆదర్శంగా నిలిచారు. నారాయణపేట జిల్లాలోని జిల్లా స్థాయి శిక్షణ కేంద్రం, జిల్లా పరిషత్ ఉన్నత పాఠశాల జాజాపూర్లో నిర్వహిస్తున్న మూడు రోజుల ఇంటిగ్రేటెడ్ ఇన్-సర్వీస్ టీచర్ ట్రైనింగ్ కార్యక్రమంలో ప్లాస్టిక్ వినియోగాన్ని పూర్తిగా నివారించి స్టీల్ ప్లేట్లు, స్టీల్ గ్లాసులను ఉపయోగించడం అందరి ప్రశంసలు అందుకుంటోంది.
ప్రభుత్వ ఉన్నత పాఠశాలలు, యూపీఎస్లకు చెందిన ఉపాధ్యాయుల బోధనా నైపుణ్యాలను పెంపొందించేందుకు జిల్లా స్థాయిలో ఈ శిక్షణ కార్యక్రమం నిర్వహిస్తున్నారు. జీవశాస్త్రం, తెలుగు, సాంఘిక శాస్త్రం బోధించే ఉపాధ్యాయులు శిక్షణలో పాల్గొంటున్నారు. సాధారణంగా ఇలాంటి కార్యక్రమాల్లో ప్లాస్టిక్ ప్లేట్లు, గ్లాసులు వినియోగించే పరిస్థితి ఉండగా, ఈసారి వాటికి బదులుగా పునర్వినియోగం చేసే స్టీల్ పాత్రలను ఉపయోగించడం ప్రత్యేక ఆకర్షణగా నిలిచింది.
శిక్షణలో పాల్గొన్న ఉపాధ్యాయులందరూ మూడు రోజుల పాటు మధ్యాహ్న భోజనం, టీ, అల్పాహారం కోసం స్టీల్ ప్లేట్లు, స్టీల్ గ్లాసులనే వినియోగించారు. పర్యావరణ పరిరక్షణపై విద్యార్థులకు చెప్పే విషయాలను ముందుగా తామే ఆచరించాలని భావించి ఈ నిర్ణయం తీసుకున్నట్లు నిర్వాహకులు తెలిపారు. ప్లాస్టిక్ వినియోగం తగ్గించడం ద్వారా పర్యావరణానికి మేలు చేయడమే కాకుండా, సమాజానికి మంచి సందేశం కూడా అందిస్తున్నామని పేర్కొన్నారు.
ఈ సందర్భంగా జిల్లా సైన్స్ అధికారి హెచ్. భాను ప్రకాష్ మాట్లాడుతూ, ప్లాస్టిక్ రహిత సమాజ నిర్మాణంలో ఉపాధ్యాయులు ముందుండటం అభినందనీయమని అన్నారు. పర్యావరణ పరిరక్షణ ప్రతి ఒక్కరి బాధ్యత అని, ఇలాంటి కార్యక్రమాలు విద్యార్థులు, సమాజంలో అవగాహన పెంచేందుకు ఎంతో ఉపయోగపడతాయని తెలిపారు.
ఈ కార్యక్రమంలో సాంఘిక శాస్త్ర డీఆర్పీలు నాగేష్, శ్రీనివాసులు, అయ్యప్పరెడ్డి, శంకర్, జీవశాస్త్ర డీఆర్పీలు సంతోష్ కుమార్, శ్రావణి, జహంగీర్, తెలుగు డీఆర్పీలు వీరేంద్ర కుమార్, శ్రీనివాస్, భాస్కర్ పాల్గొన్నారు. అలాగే పాఠశాల సిబ్బంది నరసింహ, లక్ష్మణ్తో పాటు శిక్షణలో పాల్గొన్న ఉపాధ్యాయులు కార్యక్రమాన్ని విజయవంతం చేశారు.
పర్యావరణ పరిరక్షణకు మాటలకే పరిమితం కాకుండా ఆచరణలో చూపించిన ఈ చర్య ఇతర విద్యాసంస్థలకు కూడా ఆదర్శంగా నిలుస్తుందని పలువురు అభిప్రాయపడ్డారు.
తెలంగాణ రాష్ట్రంలో పని చేయుటకు జిల్లా స్టాఫ్ రిపోర్టర్స్ నియోజకవర్గ ఇన్చార్జి లు మండల రిపోర్టర్స్ నియోజకవర్గ ఇన్చార్జి లు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి..
